کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

جہانگیر ترین گروپ کا پنجاب اسمبلی میں حمزہ شہباز کی حمایت کا اعلان

پاکستان تحریک انصاف منحرف اراکین پر مشتمل جہانگیر ترین گروپ نے پنجاب اسمبلی میں قائد ایوان کے لیے پاکستان مسلم لیگ (ن) کے رہنما حمزہ شہباز کی حمایت کا باضابطہ اعلان کردیا ہے۔

لاہور میں حمزہ شہباز کے ہمراہ پریس کانفرنس میں جہانگیر ترین گروپ کے رہنما نعمان لنگڑیال نے کہا کہ انہیں امید ہے کہ حمزہ شہباز اس صوبے کی خدمت کریں گے اور صوبے سے کرپشن کو ختم کریں گے۔

انہوں نے کہا کہ جہانگیر ترین گروپ کے اراکین گزشتہ ڈیڑھ برس سے حکومت میں رہ کر اپوزیشن کا کردار ادا کر رہے تھے۔ جہانگیرترین کے پی ٹی آئی پر بے شمار احسانات ہیں۔ ان کی وفاداری پر نہ صرف حملہ کیا گیا بلکہ ان کے بقول ایک ''جھوٹا مقدمہ'' کیا گیا۔

پنجاب اسمبلی کا اجلاس اتوار کی صبح ساڑھے گیارہ بجے تک ملتوی

پنجاب اسمبلی کا اجلاس اتوار کی صبح ساڑھے گیارہ بجے تک ملتوی کردیا گیا ہے جہاں قائد ایوان کے انتخاب کے لیے ووٹنگ ہوگی۔

ہفتے کو اسمبلی کا اجلاس چار گھنٹے کی تاخیر کے بعد اسپیکر قومی اسمبلی چوہدری پرویز الٰہی کی صدارت میں ہوا۔ جہاں مرحوم رکن اسمبلی رانا اعجاز کے لیے فاتحہ خوانی کی گئی۔

بعد ازاں چوہدری پرویز الٰہی نے اسمبلی کی مزید کارروائی سیکریٹری اسمبلی محمد خان بھٹی کے سپرد کردی۔ اسپیکر نے کہا کہ نئے قائد ایوان کے لیے شام چھ بجے تک کاغذاتِ نامزدگی جمع کرائے جاسکتے ہیں۔

پنجاب اسمبلی میں قائد ایوان کے لیے حکومتی اتحاد کے امیدوار چوہدری پرویز الٰہی ہیں جب کہ اپوزیشن جماعتوں نے حمزہ شہباز کو نامزد کیا ہے۔

حکومت کے خلاف مبینہ سازش کی تحقیقات تک عدم اعتماد کی کارروائی روکنے کی درخواست مسترد

سپریم کورٹ آف پاکستان نے حکومت کے خلاف مبینہ سازش کی تحقیقات تک عدم اعتماد کی کارروائی روکنے کی درخواست مسترد کر دی ہے۔

درخواست گزار نعیم الحسن ایڈووکیٹ نے درخواست میں مؤقف اختیار کیا تھا کہ موجودہ حکومت کے خلاف عالمی سازش کے تحت عدم اعتماد کی تحریک لائی گئی ہے۔ جس کی تحقیقات کے لیے کمیشن بنایا جا رہا ہے، لہذٰا عدالت کمیشن کی تحقیقات تک عدم اعتماد کی کارروائی روک دے۔

البتہ رجسٹرار سپریم کورٹ نے درخواست پر اعتراض عائد کر دیا۔ رجسٹرار کے مطابق درخواست گزار نے عوامی مفاد کی نشان دہی نہیں کی۔

عدالت نے یہ بھی قرار دیا کہ درخواست آرٹیکل 184 کی شق تین کے طے کردہ اصولوں پر پوری نہیں اترتی۔

عدالت کے مطابق درخواست گزار نے متعلقہ فورم پر رابطہ کرنے کے بجائے براہ راست سپریم کورٹ سے رجوع کیا۔

وزیرِ اعظم نے نوجوانوں کو ملک بھر میں احتجاج کی کال دے دی

پاکستان کے وزیرِ اعظم عمران خان نے کہا ہے کہ تحریکِ عدم اعتماد کے ذریعے اُن کے خلاف سازش ہو رہی ہے، لہذٰا نوجوان اس سازش کو ناکام بنانے کے لیے اُٹھ کھڑے ہوئے اور پرامن احتجاج کریں۔

ہفتے کو ٹی وی پر نشر ہونے والے براہِ راست پروگرام 'آپ کا وزیرِ اعظم آپ کے ساتھ' میں عمران خان کا کہنا تھا کہ یہ ثابت ہو گیا ہے کہ اُن کی حکومت کو ہٹانے کے لیے سازش کی جا رہی ہے۔ پارلیمان کی نیشنل سیکیورٹی کمیٹی کو بھی اس معاملے کا علم ہے۔

اُن کا کہنا تھا کہ کہا جا رہا ہے کہ اگر عمران خان کو ہٹائیں گے تو امریکہ کے ساتھ ہمارے تعلقات اچھے ہوں گے۔ لہذٰا وہ چاہتے ہیں کہ نوجوان اس بیرونی سازش کے خلاف اُٹھ کھڑے ہوں۔

وزیرِ اعظم بولے کہ کیا ایسا ہو سکتا ہے کہ ایٹمی طاقت کے حامل ملک کی قیادت کو محض 15 یا 16 ارب روپے کے عوض تبدیل کیا جا سکے۔ اگر یہی سلسلہ چلتا رہا تو ملک کا کوئی مستقبل نہیں۔

عمران خان کا کہنا تھا کہ نوجوان پرامن احتجاج کریں کیوں کہ اب قوم کو فیصلہ کرنا ہے کہ ملک کو کس جانب لے کر جانا ہے۔