پاڪستان جو پرڏيهي وزير بلاول ڀٽو زرداري ’شنگهائي سهڪار تنظيم’ (ايس سي او) جي پرڏيهي وزيرن جي اجلاس ۾ شرڪت جي لاءِ ڀارت ويندو.
اهو اجلاس ڀارت جي شهر گوا ۾ ٿي رهيو آهي. پرڏيهي آفيس جي ترجمان ممتاز زهرا بلوچ چيو آهي ته پرڏيهي وزير بلاول ڀٽو زرداري به ان اجلاس ۾ شرڪت ڪندو، جنهن ڳالهه جو هن خميس جي شام جو باضابطه اعلان ڪيو.
ڀارت پاڪستان کي اجلاس ۾ شرڪت جي دعوت ڏني هئي، ليڪن پاڪستان جي پرڏيهي آفيس اڳ ۾ چيو هو هو ته مناسب وقت ۾ ان دعوت نامي جو جواب ڏنو ويندو.
ليڪن پرڏيهي آفيس بلاول ڀٽي زرداريءَ جي ان دوري متعلق تفصيل نه ٻڌايا.
ايس سي او اجلاس کي رڳو ڀارت جي نظرن سان نه ڏسڻ کپي
خميس ڏينهن اسلام آباد ۾ اخباري ڪانفرنس ڪندي پرڏيهي وزير بلاول ڀٽي زرداريءَ چيو ته هو ’ايس سي او’ اجلاس ۾پاڪستان جي نمائندگي ڪندو.
وائس آف آمريڪا جي نمائندي علي فرقان جي سوال تي هن چيو ته ڀارت جي دوري کان اڳ هو سمورين سياسي پارٽين سان رابطو ڪندو، جن کان سندن راءِ پڇندو جنهن جي روشنيءَ ۾ حڪمت عملي ترتيب ڏني ويندي.
ڀارتي عهديدارن سان ملاقات جي سوال تي بلاول ڀٽي چيو ته ’ايس سي او’ جو چارٽر ان ڳالهه جي اجازت نه ٿو ڏئي ته ٻه طرفي اختلافن يا تنازعن کي ان گهڻ ملڪي فورم تي اٿاريو وڃي.
هن چيو ته ’ايس سي او’ اجلاس کي صرف ڀارت جي نظر سان نه ڏسڻ کپي.
ڀارت جي انتظام هيٺ ڪشمير جي خودمختيار حيثيت ختم ٿيڻ کان پوءِ ٻنهين ملڪن جي وچ ۾ اعليٰ سطح تي ٿيڻ وارو هيءُ پهريون رابطو آهي.
ليڪن هاڻي تائين اهو معلوم نه ٿي سگهيو آهي ته بلاول ڀٽو زرداري پنهنجي ڀارتي رتبي واري وزير سان ملاقات ڪندو يا سندس ڀارتي وفد سان سائيڊلائين ملاقات ٿيندي يا نه.
ذريعن جي مطابق پاڪستاني پرڏيهي وزير ڀارتي عهديدارن سان سائيڊ لائين تي ملاقات نه ڪندو، ليڪن تنظيم جي ٻين ميمبر ملڪن سان ان موقعي تي ملاقاتون طئي ڪيون پيون وڃن.
گزريل سال ’ايس سي او’ ملڪن جو سربراهي اجلاس سمرقند ۾ ٿيو هو، جتي شهباز شريف ۽ وزير اعظم موديءَ به شرڪت ڪئي هئي.
بلاول جي اجمير وڃڻ جي خواهش
پرڏيهي وزير جي ان دوري متعلق معاملا طئي ڪرڻ جي لاءِ پرڏيهي آفيس پنهنجي ڏکڻ ايشيائي ڊيسڪ جي عيد جي موڪلن کي منسوخ ڪري ڇڏيو آهي.
ان حوالي سان پاڪستاني عمل دارن جو هڪ وفد 27 اپريل تي ڀارت پهچندو ۽ ’ايس سي او’ اجلاس ۾ پاڪساني وفد جا تفصيل ۽ معاملن کي آخري شڪل ڏيندو.
ذريعن ٻڌايو آهي ته پرڏيهي وزير بلاول ڀٽو زرداري ڀارت جي پنهنجي پهرين دوري ۾ صوفي بزرگ خواجا معين الدين چشتي جي اجمير ۾ واقع درگاه وڃڻ گهري ٿو. ليڪن، نئين دهليءَ کان هيسيتائين ان حوالي سان ڪو جواب نه ڏنو ويو آهي.
ان کان اڳ بلاول ڀٽو 2012 ۾ به پنهنجي پيءُ ۽ ان وقت جي پاڪستان جي صدر آصف علي زرداريءَ سان گڏ ڀارت جو دورو ڪيو هو ۽ اجمير ويو هو.
بلاول جي ماءُ ۽ پاڪستان جي وزير اعظم بينظير ڀٽو به ٻه ڀيرا اجمير وئي هئي.
