پاڪستان ۾ چونڊن جي معاملي تي سياسي اتفاق جي لاءِ حڪمران اتحاد ۽ پاڪستان تحريڪ انصاف (پي ٽي آءِ) جي وچ ۾ مذاڪرات جون ڪوششون شروع ٿي ويون آهن. اطلاعن مطابق، ان سلسلي ۾ مولانا فضل الرحمان ۽ مسلم ليگ (ن) جي وچ ۾ تحفظات آهن، جڏهن ته پاڪستان پيپلز پارٽي (پي پي پي) ۽ ٻيون اتحادي جماعتون مذاڪراتي عمل اڳتي وڌائڻ گهرن ٿيون.
اڱاري ڏينهن ان حوالي سان اتحادي جماعتن جو اجلاس ڪنهن نتيجي تي نه پهتو. ليڪن، اربع ڏينهن اٽارني جنرل آف پاڪستان سپريم ڪورٽ کي ٻڌايو ته مولانا فضل الرحمان کي پرچائڻ جون ڪوششون جاري آهن ۽ بلاول ڀٽي زرداريءَ ان سلسلي ۾ هن سان ملاقات ڪري رهيو آهي.
ان تي چيف جسٽس چيو ته جيڪڏهن سياسي جماعتون اليڪشن جي تاريخ جي حوالي سان متفق ٿي ويون ته سپريم ڪورٽ به پنجاب ۾ 14 مئي تي چونڊن جي حڪم متعلق ڪا گنجائش ڪڍي سگهي ٿي.
اڱاري ڏينهن ٽي پهريءَ جي مهل وزير اعظم هائوس ۾ حڪومتي سياسي پارٽين جي اڳواڻن کان شروع ٿيڻ وارو اجلاس رات تائين جاري رهيو، ليڪن ان جو ڪو باضابطه اعلان سامهون نه آيو آهي.
ميڊيا جي ذريعن اهي خبرون ڏنيون آهن ته حڪومتي اتحاد ۾ شامل پارٽين ۾ پي ٽي آءِ سان مذاڪرات جي معاملي تي اختلاف پيدا ٿيا آهن. مسلم ليگ (ن) ۽ جمعيت علما اسلام (ف) مذاڪرات جي مخالفت ڪري رهيون آهن جڏهن ته پاڪستان پيپلز پارٽي (پي پي پي) ۽ قوم پرست پارٽيون ڳالهه ٻولهه شروع ڪرڻ چاهن ٿيون.
اطلاعات واري کاتي جي وزير مريم اورنگزيب انهن خبرن جي ترديد ڪندي چيو آهي ته اجلاس ۾ ٿيڻ واري صلاح مشوري جو باضابطه گڏيل اعلان ڪيو ويندو، ليڪن هينئر تائين ڪو اعلان جاري نه ٿي سگهيو آهي.
ان جي برعڪس پيپلز پارٽيءَ چيو آهي ته هوءَ ان ڳالهه تي يقين رکي ٿي ته ڊائيلاگ جي ذريعي ئي مسئلا حل ٿيندا. بلاول ڀٽي جي ترجمان پاران جاري ٿيل بيان ۾ چيو ويو آهي ته پيپلز پارٽي ان ڳالهه تي يقين رکي ٿي ته ڊائيلاگ جو رستو بند نه ٿيڻ کپي.
خيال رهي ته سول سوسائٽيءَ جي پاران ملڪ ۾ جاري سياسي بحران جي خاتمي جي لاءِ حڪومت ۽ مخالف ڌر ٻنهي تي ڳالهه ٻولهه لاءِ دٻاءُ وڌندو پيو وڃي.
حڪومت ۽ مخالف ڌر جي وچ ۾ مذاڪرات جي لاءِ سرگرم سول سوسائٽيءَ جي وفد سان ملاقات ۾ عمران خان حڪومت سان مذاڪرات ۾ شموليت جي حامي ڀري. ليڪن نواز شريف ان وفد جي ملاقات تي ڪو بيان نه ڏنو آهي.
ان کان اڳ دهشت گرديءَ جي حوالي سان فيبروريءَ ۾ حڪومت ڪل جماعتي ڪانفرنس سڏائڻ جو اعلان ڪيو هو جنهني جي تاريخ ۾ ٻه ڀيرا تبديليءَ جي باوجود اهو سياسي ميڙ ممڪن نه ٿي سگهيو آهي.
مبصرن چيو آهي ته حڪومت ۽ مخالف ڌر ۾ ستت ڳالهه ٻولهه جو امڪان ڏسڻ ۾ نه پيو اچي، ليڪن ڏکين مسئلن مان نڪرڻ جي لاءِ ڌرين کي جلد يا دير سان مذاڪرات ڏانهن ئي اچڻو پوندو.
