سپريم ڪورٽ جي فيصلي جي روشنيءَ ۾ اليڪشن ڪميشن پنجاب اسيمبليءَ جي چونڊن جو شڊول جاري ڪيو آهي. اليڪشن ڪميشن جي اعلان ۾ چيو ويو آهي ته پنجاب ۾ چونڊون 14 مئي تي ٿينديون.
واضح رهي ته سپريم ڪورٽ اڱاري ڏينهن پنجاب ۽ خيبرپختونخوا ۾ اليڪشن کي پوئتي ڪرڻ جي ڪيس ۾ فيصلو ٻڌائيندي پنجاب اسيمبليءَ جون چونڊون 14 مئي تي ڪرائڻ جو حڪم ڏنو هو، جڏهن ته خيبرپختونخوا جي چونڊن جي معاملي تي تعلق رکندڙ فورم سان رابطو ڪرڻ جي هدايت ڏني هئي.
اليڪشن ڪميشن جي فيصلي جي روشنيءَ ۾ نامزدگيءَ جي ڪاغذن ۾ اپيل داخل ڪرڻ جي آخري تاريخ 10 اپريل مقرر ڪئي وئي هئي.
اليڪشن ڪميشن جي نوٽي فيڪيشن جي مطابق ايپليٽ ٽربيونل نامزدگيءَ جي فارمن تي اپيلن جو 17 اپريل تائين فيصلو ڪندو، جڏهن ته 18 اپريل تي اميدوارن جي نظر ثاني ٿيل فهرست جاري ڪئي ويندي.
اميدوارن جي لاءِ نامزدگيءَ جا ڪاغذ واپس وٺڻ جي آخري تاريخ 19 اپريل مقرر ڪئي وئي آهي، جڏهن ته اميدوارن کي انتخابي نشان 20 اپريل تائين جاري ڪيا ويندا.
سپريم ڪورٽ وفاقي حڪومت کي چونڊون ڪرائڻ جي لاءِ اليڪشن ڪميشن کي 10 اپريل تائين 21 ارب روپيا ڏيڻ جي به هدايت ڪئي هئي. پر پاڪستان جي وفاقي ڪابينا جو هڪ هنگامي اجلاس عدالتي فيصلي اچڻ کان پوءِ اڱاري جي رات ٿيو جنهن ۾ سپريم ڪورٽ جي پنجاب ۽ خيبرپختونخوا ۾ اليڪشن التوا ڪيس ۾ فيصلي کي مسترد ڪيو ويو.
وفاقي ڪابينا چيو ته سپريم ڪورٽ جو فيصلو اقليتي آهي، ان ڪري ڪابينا ان کي رد ڪري ٿي.
وفاقي ڪابينا جي اجلاس کان پوءِ وزير اعظم شهباز شريف قومي اسيمبليءَ جي اجلاس ۾ خطاب ڪندي چيو ته چونڊن جي تاريخ کي پوئتي ڪرڻ جي ڪيس ۾ هڪ دفعو ٻيهر عدل ۽ انصاف کي قتل ڪيو ويو.
قومي اسيمبليءَ ۾ خطاب ڪندي قانون جي وفاقي وزير نذير تارڙ چيو ته اڪثريتي فيصلي کي اقليتي رائي سان تبديل نه ٿو ڪري سگهجي.
