پاڪستان جي موسمن جي تبديليءَ جي وزارت هلندڙ سال گرميءَ جي درجي ۾ ممڪن چاڙهه جي خطري جو چتاءُ جاري ڪيو آهي جنهن ۾ تعلق رکندڙ سمورن ادارن ۽ اسٽيڪ هولڊرز کي ايندڙ مهينن ۾ وڌندڙ گرميءَ کي منهن ڏيڻ جا اڳواٽ گهربل ممڪن قدم کڻڻ جي هدايت ڪئي وئي آهي.
اهو چتاءُ اهڙي وقت جاري ڪيو ويو آهي جڏهن پاڪستان جي موسميات جي کاتي جي پاران هلندڙ سال مارچ ۾ ئي گرميءَ جي درجي وڌڻ جي اڳ ڪٿي ڪئي وئي هئي، جڏهن ته مئي تائين پاڪستان جي مختلف علائقن ۾ گرميءَ جو سراسري درجو عام حالت کان وڌيڪ ٿيڻ جو امڪان ٻڌايو عو وڃي. ان سان گڏ جهولو لڳڻ جو امڪان آهي.
پاڪستان جو شمار دنيا جي انهن ڏهن ملڪن ۾ ٿئي ٿو جيڪو موسمياتي تبديلين جي ڪري گهڻو متاثر ٿيو آهي.
آب و هوا جي تغير جي ڪري نه رڳو غير معمولي برساتيون پيون بلڪه پوئين سال ملڪي تاريخ جو غير معمولي سيلاب ۽ ٻوڏ تمام گهڻو اثر ڏيکاريو.
گزريل سال به مارچ ۽ اپريل ۾ تمام گهڻي گرميءَ جي لهر آيل هئي. پاڪستان ۾ عام طور تي اپريل ۾ سراسري گرميءَ جو درجو 24.32 سينٽي گريڊ رڪارڊ ڪيو ويندو آهي. ليڪن گزريل سال اپريل ۾ سراسري گرميءَ جو درجو 28.3سينٽي گريڊ هيو، جيڪو رواجي درجي کان لڳ ڀڳ 4.5 سينٽي گريڊ وڌيڪ هيو.
موسم جي ماهر ڊاڪٽر محمد حنيف ٻڌايو آهي ته هلندڙ سال مارچ کان پوءِ هونئن ته پاڪستان ۾ گرميءَ جي لهر ۽ گرميءَ جو درجو عام رواجي درجي کا وڌيڪ رهڻ جي اڳ ڪٿي ڪئي وئي آهي، ليڪن سندس خيال ۾ پوئين سال جي ڀيٽ ۾ هلندڙ سال گرمي جي لهر جو مدو ٿورو گهٽ ٿي سگهي ٿو.
هن چيو ته گزريل سال جهولي ۽ لو لڳڻ جي شدت گهڻي هئي، جنهن کان پوءِ مون سون جا مينهن عام رواجي حد کان تمام گهڻا پيا، جنهن جي ڪري ملڪ جو ڏاکڻيون علائقو تمام گهڻو متاثر ٿيو هيو.
