فن لينڊ اڱاري ڏينهن نيٽو جي فوجي اتحاد ۾ شامل ٿي ويو آهي، جيڪو ماسڪو جي يوڪرين تي حملي جي نتيجي ۾ يورپ جي ’سرد جنگ’ کان پوءِ سيڪيورٽي جي منظرنامي ۾ نئين سر ٿيڻ واري هڪ اهڙي تاريخي تبديلي آهي جنهن سان روسي صدر ولادي مير پوٽن کي وڏو ڌڪ لڳو آهي.
اتر يورپ ۽ اتر ايٽلانٽڪ جي هن ملڪ جي رڪنيت دنيا جي سڀ کان وڏي سيڪيورٽي اتحاد سان روس جي سرحد کي ٻيڻون ڪري ڇڏيو آهي.
فن لينڊ ٻي عالمي لڙائيءَ ۾ سويت يونين کان هار کائڻ کان پوءِ غير جانبداري اختيار ڪري ورتي هئي، ليڪن ان جي اڳواڻن يوڪرين تي ماسڪو جي حملي کان رڳو ڪجهه ئي مهينا پوءِ اهو اشارو ڏنو هو ته هو نيٽو ۾ شامل ٿيڻ گهرن ٿا ڇو ته ان حملي جي ڪري پاڙيسري ملڪن ۾ خوف ۽ ڊڄ ويهي رهيو آهي.
هيءُ قدم پوٽن جي لاءِ حڪمت عملي ۽ سياسي نقصان جو باعث آهي، جيڪو هڪ عرصي کان روس جي پاران نيٽو کي اينگهه ڏيڻ جي شڪايت ڪندو رهيو آهي ۽ هن ان کي حملي جو هڪ سبب قرار ڏنو هو.
روس چتاءُ ڏنو آهي ته فن لينڊ جي رڪنيت جي ڪري پيدا ٿيڻ واري سيڪيورٽيءَ جي خطرن سان منهن ڏيڻ جي لاءِ جوابي قدم کڻڻ تي مجبور ٿيندو. هن اهو چتاءُ به ڏنو آهي ته جيڪڏهن نيٽو پنهنجي ايڪٽيهين رڪن ملڪ کي واڌو فوجي يا هٿيار موڪليا ته هو فن لينڊ جي ويجهو پنهنجي فورسز ۾ واڌ آڻيندو.
اتحاد چيو آهي ته ماسڪو کي ان سان ڪو خطرو درپيش ڪونهي.
گزريل سال يوڪرين تي روس جي حملي کان گهٻرائي فن لينڊ، جنهن جي روس سان 1340 ڪلوميٽر ڊگهي سرحد آهي، نيٽو جي سيڪيورٽيءَ تحت تحفظ حاصل ڪرڻ جي لاءِ سالن جي فوجي اڪيلائپ کي هڪ پاسي تي رکي مئي ۾ تنظيم ۾ شامل ٿيڻ جي درخواست ڏني هئي.
فن لينڊ جي صدر سولي نينسٽو چيو آهي ته فن لينڊ ۽ نيٽو جي لاءِ اڄ تمام وڏو ڏينهن آهي. مون کي يقين آهي ته فن لينڊ جا باشندا اهو سوچي پاڻ کي وڌيڪ محفوظ محسوس ڪري رهيا آهن ته اهي هڪ وڌيڪ محفوظ دنيا ۾ رهي رهيا آهن.
(هن رپورٽ جو مواد ايسو سي ايٽڊ پريس تان ورتو ويو آهي)
