سعودي عرب ۽ ايران جي پرڏيهي وزيرن جي ملاقات چين جي گاديءَ واري شهر بيجنگ ۾ ٿي آهي. ٻنهي ملڪن جي پرڏيهي وزيرن وچ ۾ اها اعليٰ سطحي ملاقات ستن سالن کانپوءِ ٿي آهي.
سعودي عرب جي سرڪاري نشرياتي اداري ’الاخباريه’ ان ملاقات جي وڊيو خميس ڏينهن هڪ ٽوئيٽ ۾ جاري ڪئي جنهن ۾ سعودي پرڏيهي وزير شهزاده فيصل بن فرحان ۽ سندس ايراني هم منصب حسين امير عبدالله کي گرمجوشيءَ سان هٿ ملائيندي ڏسي سگھجي ٿو.
وڊيو ۾ ڏسي سگهجي ٿو ته ميڊيا جي ڪيمرائن جي سامهون ملاقات کانپوءِ ٻئي اڳواڻ ميٽنگ روم ڏانهن روانا ٿيا جتي سندن وچ ۾ ’ون آن ون’ ملاقات ٿي.
ٻنهي ملڪن ڊگهي ڇڪتاڻ کانپوءِ گذريل مهيني چين جي ٽياڪڙيءَ ۾ لاڳاپا بحال ڪرڻ تي اتفاق ڪيو هو. تازو ئي ٻنهي ملڪن باضابطه اعلان ڪيو هو ته پرڏيهي وزيرن جي ملاقات رمضان ۾ ٿيندي.
بيجنگ ۾ ملاقات کان اڳ ٻنهي پرڏيهي وزيرن گذريل ڪجھ هفتن ۾ ٻه ڀيرا ٽيليفون تي رابطو پڻ ڪيو ھو.
خبرن جي ايجنسي 'اي ايف پي' ايران جي سرڪاري نيوز ايجنسي جو حوالو ڏيندي چيو آهي ته ٻنهي ملڪن جي پرڏيهي وزيرن سفارتخانا ۽ قونصل خانا ٻيهر کولڻ جي معاملي تي به ڳالهه ٻولهه ڪئي آهي.
ماهرن جو چوڻ آهي ته وچ اوڀر جي ٻن وڏين مخالف طاقتن وچ ۾ سفارتي لاڳاپا قائم ٿيڻ سان نه رڳو علائقائي سياست ۾ تبديليون اينديون پر وچ اوڀر ۾ هٿياربند ٽڪراءُ جا خطرا به گهٽ ٿيندا.
واضع رهي ته سعودي عرب 2016 ۾ تهران ۾ پنهنجي سفارتخاني تي ٿيندڙ حملي کانپوءِ ايران سان لاڳاپا ختم ڪري ڇڏيا هئا. ان کان اڳ سعودي حڪومت شيعه عالم نمر باقر النمر کي ڦاهي ڏني هئي، جنهن جي ايران مذمت ڪئي هئي.
ان بعد ٻنهي ملڪن وچ ۾ ستن سالن تائين ڇڪتاڻ جاري رهي، پر سعودي عرب ۽ ايران 11 مارچ تي چِين جي ٽياڪڙي ۾ سفارتي لاڳاپا بحال ڪرڻ جي ھڪ معاهدي تي صحيون ڪيون.
ايران جي سپريم نيشنل سيڪيورٽي ڪائونسل جي سيڪريٽري علي شامخاني ۽ سعودي عرب جي قومي سلامتيءَ واري صلاحڪار مساعد بن محمد العيبان، چِين جي پرڏيهي وزير وانگ يي جي موجودگي ۾ معاهدي تي صحيون ڪيون ھيون.
