دنيا جي امير ترين جمهوري ملڪن تي مشتمل ’جي سيون گروپ’ چين جي پاران تائيوان جي لاءِ وڌندڙ خطري ۽ اتر ڪوريا جي وڏي فاصلي تائين مار ڪرڻ وارن ميزائيلن جي جاري تجربن تي سخت موقت اختيار ڪرڻ جي حامي ڀري آهي.
جاپان ۾ ٿيڻ واري ان اجلاس ۾ گروپ جي سرواڻي ڪرڻ وارن سفارت ڪارن يوڪرين جي لاءِ پنهنجي حمايت وڌائڻ ۽ روس کي ان حملي جي سزا ڏيڻ جي ڪوششن کي هٿي ڏيڻ جي وعدي کي به ورجايو ويو.
بهار جي مند جي جاپان جي سياحتي شهر ڪروابزاوا ۾ منعقد ميڙ جي ٻئي ڏينهن تي سفارت ڪارن جو وڌيڪ وقت يوڪرين تي روس جي اڳرائيءَ جي موضوع تي گفتگو ۾ لڳندو. ان اجلاس جو مقصد ايندڙ مهيني هيروشيما ۾ ٿيڻ واري ’جي سيون’ صدارتي اجلاس ۾ ڳالهه ٻولهه جي راه هموار ڪرڻ آهي.
ان موقعي تي لڙائيءَ جي حوالي سان ڳالهائيندي جاپان جي پرڏيهي وزير چيو ته دنيا فصيلي جي اهم چوواٽي تي بيٺي آهي. پرڏيهي وزير هوشي ماسا جياشي جي رمارڪس مطابق، دنيا کي طاقت جي زور تي عالمي صورت حال تبديل ڪرڻ جي هڪ طرفي ڪوشش، يوڪرين جي خلاف روس جي اڳرائي ۽ ايٽمي هٿيارن جي استعمال جي ڌمڪين کي سختيءَ سان رد ڪرڻ گهرجي.
خبرن جي اداري، ايسو سي ايٽڊ پريس مطابق، آمريڪي وفد جي لاءِ جي سيون سفارت ڪارن سان هيءَ ملاقات روس جي يوڪرين تي حملي ۽ چين سان نبرڻ جي ڪوششن جي سلسلي ۾ تمام اهم آهي.
اهي ٻئي اهڙا مسئلا آهن جن کي ’جي سيون گروپ’ ۾ شامل ملڪ جاپان، آمريڪا، برطانيه، فرانس، جرمني، ڪيناڊا، اٽلي ۽ يورپي يونين ٻئي مها ڀاري لڙائيءَ کان پوءِ قانون تي ٻڌل بين الاقوامي نظام جي لاءِ وڏا چيلينج سمجهيا وڃن ٿا.
آمريڪي پرڏيهي وزير، اينٽني بلنڪن سان گڏ سفر ڪرڻ واري هڪ سينئر آمريڪي عهدديدار صحافين کي ٻڌايو ته ان فورم تي ڳالهه ٻولهه ۾ صدر جو بائيڊن جي انتظاميا جو مقصد يوڪرين جي لاءِ گروپ جي گزريل سال جي توانائي جي بنيادي ڍانچي جي پروگرام ۽ ڪئيف جي لاءِ فوجي امداد جي مسلسل فراهميءَ سميت حمايت کي وڌائڻ آهي.
آمريڪي اهل ڪار ٻڌايو ته ويڙهه جي نتيجي ۾ روس جي خلاف انهن اقتصادي ۽ مالياتي پابندين جي ذريعي سزا کي وڌائڻ به ترجيح جو معاملو هوندو، جن جي باري ۾ ڊسمبر 2021 ۾ جنگ شروع ٿيڻ کان اڳ ماسڪو کي ڌمڪي ڏني وئي هئي.
اي پيءَ مطابق يوڪرين کي ايندڙ ڪجهه هفتن دوران هڪ اهم لمحو آڏو ايندو جڏهن روس جي موجوده اڳرائي گهڻي حد تائين رڪجي وڃي ۽ يوڪرين جوابي ڪاروائيءَ جي تياري ڪري رهيو هجي.
(خبر جو مواد ايسو سي ايٽڊ پريس تان ورتو ويو آهي)
