ڪنڌڪوٽ جي ٻهراڙيءَ جي علائقي ۾ خميس ڏينهن هٿياربند ماڻهن فائرنگ ڪري يونيورسٽيءَ جي اسسٽينٽ پروفيسر کي قتل ڪري ڇڏيو آهي. مقتول اجمل ساوند فرانس جي هڪ يونيورسٽيءَ مان ’اي هيلٿ مانيٽرنگ’ ۾ ڊاڪٽوريٽ جي ڊگري حاصل ڪرڻ کان پوءِ سکر ۾ قائم انسٽي ٽيوٽ آف بزنيس ايڊمنسٽريشن (آئي بي اي) ۾ پڙهائيندو هو.
ان کان اڳ اجمل ساوند فرانس ۾ به پڙهائڻ سان لاڳاپيل رهيو هو. ڊاڪٽر ساوند مهراڻ يونيورسٽي آف انجنيئرنگ اينڊ ٽيڪنالاجيءَ ۾ سافٽ ويئر انجنيئرنگ ۾ گريجوئيشن ڪئي هئي.
اطلاعن موجب اجمل ساوند ڪڻڪ جي لاباري جي سلسلي ۾ پنهنجي آبائي علائقي ڏانهن ويل هو.
ايس ايس پي ڪشمور، عرفان سمون مطابق، اجمل کي خميس جي ڏينهن ان وقت نشانو بنايو ويو جڏهن هو ڪنڌڪوٽ ۾ پنهنجي زمينن مان پنهنجي اباڻي گهر جي طرف واپس اچي رهيو هو.
ايس ايس پيءَ مطابق، ان قتل جو سبب قبائلي دشمني ٻڌائي ٿي وڃي، جنهن معاملي جي تحقيقات شروع ڪئي وئي آهي. پوليس قتل کان پوءِ ڪاروائي ڪندي مبينه طور تي مخالف قبيلي جا ڪجهه گهر ڊاهيا آهن، جڏهن ته فصل کي به باهه ڏئي ڇڏي آهي. ليڪن هاڻي تائين ڪا گرفتاري عمل ۾ نه آئي آهي.
ٻڌايو ويو آهي ته ساوند ۽ سندراڻي قبيلي جي وچ ۾ دشمني ڪيترا سال پراڻي آهي، جنهن جي شروعات غيرت جي نالي تي ٿيڻ واري هڪ قتل سان ٿي هئي. ڪيترا سال گزرڻ جي باوجود اها دشمني برقرار آهي جنهن ۾ هاڻي تائين گهٽ ۾ گهٽ پنج ماڻهو قتل ٿي چڪا آهن.
ان کان اڳ، ساوند قبيلي جي سبزوئي قبيلي سان به دشمني رهي چڪي آهي.
پروفيسر اجمل ساوند کي بي درديءَ سان قتل ڪرڻ کان پوءِ مخالفن سوشل ميڊيا تي هڪ وڊيو به جاري ڪئي جنهن ۾ اهي سندس قتل تي خوشي ملهائي رهيا آهن.
سنڌ مدرسي جي اڳوڻي وائيس چانسلر ۽ ڊاڪٽر اجمل ساوند جي ويجهي دوست، ڊاڪٽر محمد علي شيخ چيو آهي ته ڊاڪٽر اجمل هڪ سٺي ذهن وارو نوجوان هيو جيڪو قبائلي جهڙي جي ور چڙهي ويو.
هن چيو ته گزريل ٻن صدين کان سنڌ قبائلي، جاگيردارانا نظام جي بدترين زنجيرن ۾ جڪڙيل آهي. هن جي لفظن ۾، حڪومتون آيون ۽ هلي ويون، ليڪن صوبي ۾ قبائلي تنازعا ختم نه ٿي سگهيا ڇو ته انهن ماڻهن کي سياسي مدد حاصل رهي آهي.
ڪنڌڪوٽ جي رهندڙ صحافي حسن علي ڀنگوار چيو آهي ته گهوٽڪي، ڪشمور، شڪارپور، ڪنڌڪوٽ ۽ صوبي جي ٻين اترئن ضلعن ۾ قبائلي تنازعا ۽ دشمنيون سالن کان جاري آهن. ليڪن سيلاب کان پوءِ ڏوهن ۾ تمام گهڻي واڌ آئي آهي. ڪچي جو علائقو جتي سفر جو سهولتون ڪونهن، اتي ڏوهارين جو ديس آهي، جتي ڪو پڇڻ آکڻ وارو ڪونهي.
هن چيو ته ڪچي جي علائقي ۾ اغوا ڪرڻ ۽ ڀنگ گهرڻ عام ڳالهه آهي. ايتري حد تائين جو اغوا ڪيلن جون سوشل ميڊيا تي تصويرون ڏئي سندن وارثن کان تاوان گهريو ويندو آهي، جتي پوليس جي عمل داري نه هئڻ جي برابر آهي.
