پنهنجي فوجي طاقت کي هٿي ڏيڻ جي لاءِ، ڀارت خميص ڏينهن ساڍن اٺن ارب ڊالرجي ماليت جا ميزائيل، هيلي ڪاپٽر، آرٽلري گنز ۽ اليڪٽرانڪ جنگي نظام جي خريداريءَ جي منظوري ڏني آهي.
بچاءَ واري وزارت هڪ بيان ۾ چيو آهي ته ڀارتي فوج جي لاءِ رقم جي منظوري ڏيڻ واري سرڪاري اداري، ’ڊفينس اڪوئيزيشن ڪائونسل’ (ڊي اي سي) پنهنجي سمورين خريدارن جي لاءِ 705 ارب روپيا (8.5 ارب ڊالر) جي منظوري ڏني آهي.
ملڪي بچاءَ جي لاءِ مينوفيڪچرنگ کي هٿي ڏيڻ جي لاءِ وزير اعظم نريندر موديءَ جي حڪومت جي طرفان زور ڏنو ويو آهي ته سمورا آرڊر ڀارتي ڪمپنين کي ڏنا ويندا.
جوهري هٿيارن سان ليس طاقتن چين ۽ پاڪستان جي پاڙي ۾ هئڻ جي ڪري ۽ متنازعه هماليه سرحد تي چيني فوجن سان ڇڪتاڻ جي ڪري، ڀارت پنهنجي فوجي ساز و سامان کي، جيڪو گهڻي ڀاڱي سويت دور سان تعلق رکندو آهي، جديد بنائڻ جون ڪوششون ڪري رهيو آهي.
خميص ڏينهن بحري فوج جي ترقيءَ جي لاءِ 56 ڪروڙ روپين جي منظوري ڏني وئي. سامونڊي فوج تي ڌيان ڏيڻ جي ضرورت ان وقت محسوس ٿي جڏهن گزريل سال بحر هند ۾ چيني سرگرميون تيز ٿيون. ان تي ڀارت گهڻي ڳڻتيءَ جو اظهار ڪيو.
منظور ڪيل خريدارن جي فهرست ۾ سامونڊي فوج جي لاءِ 200 واڌو ’براهموس’ ميزائيل، 50 يوٽيلٽي هيلي ڪاپٽر ۽ اليڪٽرانڪ وارفيئر سسٽم شامل آهن.
’براهموس سپر سانڪ’ ميزائيل آهي جنهن جي رينج تقريبا 300 ڪلوميٽر آهي جنهن کي ڀارت ۽ روس گڏجي تيار ڪيو آهي.
ڀارتي فوج جون ٽئي سروسز هڪ ڏهاڪي کان وڌيڪ عرصي کان وٺي ميزائيل جي مختلف ورزن استعمال ڪري رهيون آهن.
ڊي اي سي ڊيزل ميرين انجن جي تياريءَ جي به منظوري ڏني. ڀارت ۾ اهو پنهنجي قسم جو پهريون انجن هوندو.
فضائي فورس جي تجويز منظور ڪندي، ڊگهي فاصلي جي ’اسٽينڊ آف هٿيار’ خريدڻ جي اجازت ڏني جن کي سخوئي 30 لڙاڪا جيٽ جي ذريعي استعمال ڪيو ويندو.
فوج کي 155 ملي ميٽر 52 ڪيليبر جي توپن کي کڻي وڃڻ جي لاءِ 307 يونٽن کي خريدڻ جي منظوري ڏني وئي جن سان تيزيءَ سان حرڪت ڪرڻ واريون گاڏيون ۽ توپون کڻي وڃڻ واريون گاڏيون خريد ڪرڻ به شامل آهي.
(خبر جو مواد رائيٽرز تان ورتو ويو آهي)
