پاڪستان ۾سيلاب کان پوءِ ٿورن ئي مهينن اندر خريف جي موسم جي فصلن کي پاڻيءَ جي کوٽ درپيش آهي.
انڊس رور سسٽم اٿارٽيءَ (ارسا) جي اختياريءَ وارن مطابق هلندڙ موسم جي لاءِ 27 سيڪڙو گهٽ پاڻي دستياب هوندو، جنهن جي باري ۾ صوبن کي اطلاع ڏنو ويو آهي.
پاڻيءَ جي کوٽ جي ڪري فصلن جي پيداوار متاثر ٿيڻ جو انديشو آهي.
لاهور مان وائس آف آمريڪا جي نمائندي جي رپورٽ مطابق، پاڪستان ۾ خريف جي فصل جي مند عام طور تي اپريل کان سيپٽيمبر تائين هوندي آهي، جنهن ۾ ڪپهه، ڪمند، چانور ۽ ماش جي دال جا فصل پوکيا ويندا آهن.
هلندڙ سال ملڪ ۾ غير متوقع برساتن جي ڪري ڪڻڪ جو فصل متاثر ٿيو هو ۽ پنجاب جي زراعت جي محڪمي مطابق صرف پنجاب صوبي ۾ اٺ لک ايڪڙ ڪڻڪ جو فصل متاثر ٿيڻ جو انديشو آهي.
ڇهين اپريل تي انڊس رور سسٽم اٿارٽي (ارسا) جي چيئرمين امتياز عليءَ جي صدارت ۾ اجلاس ۾ اها ڳالهه سامهون آئي ته پنجاب ۽ سنڌ صوبي ۾ خريف جي فصلن جي لاءِ 27 سيڪڙو پاڻي گهٽ پهچندو.
اجلاس ۾ صوبن جي وچ ۾ پاڻيءَ جي ورهاست جي لاءِ اڳ ۾ ئي جاري ’ٽه درجاتي فارمولا’ کي جاري رکڻ جو فيصلو ڪيو ويو آهي.
اجلاس ۾ چئني صوبن جي نمائندن، ارسا ۽ واٽر اينڊ پاور ڊولپمنٽ اٿارٽي (واپڊا) جي ميمبرن به شرڪت ڪئي.
ارسا جي سيڪريٽري ۽ ترجمان، خالد رانا ٻڌايو آهي ته پاڪستان ۾ ربيع جي فصل جو پهريون مرحلو پهرين اپريل کان ڏهين جون تائين هلندو آهي، جيڪو پوک جي لاءِ اهم وقت هوندو آهي.
ان ۾ خريف جي فصلن کي پوکڻ يا ٻيجارو جاري رهندو آهي، جنهن ۾ ڪپهه سرفهرست آهي. ان کان پوءِ چانورن جو ٻيجارو لڳائڻ شروع ٿيندو آهي. ساڳيءَ موسم دوران ڪمند، مختلف ميون جي باغن ۽ ڀاڄين جي واڙين کي پاڻيءَ جي گهرج پوندي آهي.
وائس آف آمريڪا سان ڳالهائيندي، خالد رانا چيو ته عام حالتن ۾ پاڪستان ۾ مارچ جي ڏينهن ۾ پاڻيءَ جا ڊيم خالي ٿي ويندا آهن. ليڪن هلندڙ سال مارچ جي آخري هفتي ۽ اپريل جي پهرين هفتي تائين برساتن جي ڪري هڪ پاسي ته ڪڻڪ جي فصل کي نقصان رسيو ته ٻئي پاسي نه صرف درياهن ۾ پاڻيءَ جي صورت حال بهتر ٿي بلڪه پاڻيءَ جي وهڪري ۾ به واڌ آئي هئي.
