پاڪستان فوج بلوچ عليحدگي پسند تنظيم، بلوچ نيشنلسٽ آرمي (بي اين اي) جي اڳواڻ گلزار امام جي گرفتاري پڌري ڪئي آهي، جڏهن ته تنظيم لڳ ڀڳ ساڍا چار مهينا اڳ گرفتاريءَ جو اطلاع ڏنو هو.
فوج جي شعبه تعلقات عامه (آءِ ايس پي آر) خميس تي جاري ٿيل بيان ۾ دعوا ڪئي آهي ته سيڪيورٽي فورسز پوري رٿا ڪري ڪامياب انٽيلي جينس آپريشن کان پوءِ گلزار امام عرف شمبيءَ کي گرفتار ڪري ورتو آهي.
فوج دعوا ڪئي آهي ته گلزار امام جي گرفتاري بي اين اي سميت ٻين هٿياربند گروهن جي لاءِ وڏو ڌڪ آهي. ليڪن فوج پنهنجي بيان ۾ اهو نه ٻڌايو آهي ته گلزاز امام کي ڪڏهن ۽ ڪٿان گرفتار ڪيو ويو.
آئي ايس پي آر مطابق، گلزار امام جا افغانستان ۽ ڀارت جا دورا رڪارڊ تي آهن، جڏهن ته، سندس بقول، ’’دشمن انٽيلي جينس ايجنسين سان رابطن جي ڇنڊ ڇاڻ ٿي رهي آهي’’.
واضح رهي ته گلزار امام جي گرفتاريءَ جون خبرون سيپٽمبر 2022 جي وچ ڌاران سامهون آيون هيون. اطلاع مليا هيا ته ان کي ايران ۽ ترڪيه پهچڻ تي حراست ۾ وٺي پاڪستاني اختياريءَ وارن جي حوالي ڪيو ويو.
بي اين اي جي ترجمان مريد بلوچ نومبر 2022 ۾ جاري ڪيل هڪ اعلان ۾ چيو هو ته گلزار امام پاڪستان جي خفيه ادارن جي تحويل ۾ آهي.
ياد رهي ته بي اين اي، عليحدگي پسند بلوچ تنظيمن، بلوچ ريپبلڪ آرمي ۽ يونائيٽڊ بلوچ آرمي جي پاڻ ۾ ضم ٿيڻ سان وجود ۾ آئي هئي ۽ ان تنظيم 20 جنوري 2022 تي لاهور جي انارڪلي بازار ۾ بم ڌماڪي جي ذمه داري قبول ڪئي هئي.
فوج جي مطابق، بي اين اي بلوچستان جي علائقن پنجگور ۽ نوشڪيءَ ۾ قانون نافذ ڪرڻ وارن ادارن تي حملن ۾ ملوث رهي آهي.
گلزار امام بي اين اي جو باني اڳواڻ آهي ۽ آءِ ايس پي آر جي بيان جي مطابق عليحدگي پسند تنظيمن جي اتحاد، ’بلوچ راجي آجوئي سانگر (براس)’ کي ٺاهڻ ۾ به گلزار امام جو ڪردار رهيو آهي، جڏهن ته هو ’بلوچ راجي آجوئي سانگر’ جو آپريشنل سربراه به هيو.
گلزار امام ڪير آهي؟
وائس آف آمريڪا جي لاءِ ضيا الرحمان جي رپورٽ مطابق، بلوچستان جي شهر پنجگور سان تعلق رکڻ واري گلزار امام سياست جو آغاز 2002 ۾ بلوچ اسٽوڊنٽس آرگينائزيشن (بي ايس او) جي ’امان’ نالي ڌڙي مان ڪيو.
انهن سالن دوران جڏهن بلوچ اسٽوڊينٽس آرگينائزيشن جا ٽي ڌڙا پاڻ ۾ ضم ٿيا ۽ ان کان پوءِ ڀڃ ڊاهه شروع ٿي ته گلزار امام بلوچ عليحدگي پسند رهنما بشير زيب جي اڳواڻيءَ ۾ ٺهڻ واري هڪ ڌڙي ۾ شامل ٿي ويو.
بشير زيب اڄ ڪلهه بلوچ لبريشن آرمي (بي ايل اي) جي هڪ ڌڙي جو اڳواڻ آهي.
پنجگور جي هڪ سياسي اڳواڻ ٻڌايو ته 2008 ۾ بلوچ عليحدگي پسند تنظيمن کي افرادي قوت فراهم ڪرڻ جي الزامن ۾ قانون نافذ ڪرڻ وارن ادارن بي ايس او (آزاد) جي خلاف ڪريڪ ڊائون تيز ڪري ڇڏيو هيو.
ان دوران گلزار امام بلوچ عسڪريت پسند اڳواڻ براهمداغ بگٽيءَ جي تنظيم بلوچ ريپبليڪن آرمي (بي آر اي) نالي تنظيم جو اڳواڻ به رهيو آهي.
سنه 2006 ۾ فوجي آپريشن ۾ نواب اڪبر بگٽيءَ جي مارجي وڃڻ کان پوءِ براهمداغ بگٽي افغانستان ڀاڄ کاڌي، جتان ڪجهه عرصي بعد هو سوزرلينڊ هليو ويو هو.
سال 2018 جي وچ ۾ گلزار امام جي براهمداغ بگٽيءَ سان مختلف معاملن تي اختلاف شدت اختيار ڪري ويا، جن جو هڪ سبب طبقي جي بنياد تي قيادت هو.
آڪٽوبر 2018 ۾ ’بي آر اي’ جي پاران هڪ اعلان ۾ گلزار امام تي عدالت کان مٿاهين قتل ۽ ’ڀتي جي وصوليءَ’ ۾ ملوث ٿيڻ جا الزام لڳا ۽ کيس تنظيم مان ڪڍڻ جو اعلان ڪيو ويو. ائين، ’بي آر اي’ جي ٻن ڌڙن ۾ ورهاست ٿي وئي. هڪ ڌڙي جي اڳواڻي براهمداغ بگٽي جڏهن ته ٻئي ڌڙي جي سربراهي گلزار امام ڪري رهيو هو.
بي آر اي ۾ ڌڙي بنديءَ کان پوءِ گلزار امام هڪ بيان ۾ يورپ ۾ ترسيل براهمداغ بگٽي، حربيار مري ۽ مهراڻ مريءَ جا نالا وٺڻ بنان بلوچ شورش ۾ شامل سردارن تي سخت تنقيد ڪئي هئي.
هن چيو هو ته ’’بلوچ تحريڪ جي اها قيادت جيڪا سردار گهراڻن تي مشتمل آهي، انهن کي ڪارڪنن سان قبائلي رويو جاري رکڻ بند ڪرڻو پوندو ۽ تنظيم اندر موجود مسئلن جو حل قبائلي نه بلڪه سياسي طريقه ڪار ذريعي ڪڍڻو پوندو’’.
مبصرن مطابق پنهنجو ڌڙو ٺاهڻ کان پوءِ گلزار امام مڪران جي سطح تي خصوصن پنجگور ۾ هڪ اهم عليحدگي پسند اڳواڻ جي طور تي اڳيان آيو جڏهن ته براهمداغ بگٽيءَ جو ڌڙو ڪافي ڪمزور ٿيو.
گلزار امام بي آر اي پنهنجي ڌڙي کي بلوچ راجي آجوئي سانگر (براس) نالي گڏيل محاذ جو به حصو بڻايو جيڪو جولاءِ 2020 ۾ پاڪستان ۾ سيڪيورٽي ادارن ۽ چيني مفادن کي نشانو بنائڻ جي لاءِ ٺاهيو ويو.
براس ۾ بلوچ عليحدگي پسند ليڊر الله نذر بلوچ جي بلوچ لبريشن فرنٽ، بشير زيب جي بلوچ لبريشن آرمي، گلزار امام جي ريپبليڪن آرمي ۽ بختيار ڊومڪيءَ جي بلوچ ريپبليڪن گارڊز نالي چار تنظيمون شامل هيون.
يارهين جنوري 2022 تي ٻن بلوچ عليحدگي پسند تنظيمن گلزار امام جي بي آر اي ۽ سرفراز بنگلزئيءَ جي اڳواڻيءَ ۾ قائم يونائيٽڊ بلوچ آرمي (يو بي اي) جي هڪ ڌڙي پاڻ ۾ضم ڪري ’بي اين اي’ نالي هڪ نئين عليحدگي پسند تنظيم قائم ڪرڻ جو اعلان ڪيو.
قانون نافذ ڪرڻ واري اداري چيو آهي ته گلزار امام جي گرفتاريءَ کي بلوچستان ۾ جاري عليحدگي پسنديءَ جي هٿياربند تحريڪ جي لاءِ هڪ وڏو ڌڪ آهي.
