لاهور هائي ڪورٽ پنجاب جي نگران حڪومت جي پاران صوبي ۾ هزارين ايڪڙ زرعي اراضي پاڪستاني فوج کي ليز تي ڏيڻ جي ڪم کي روڪيندي ڌرين کي نوٽيس جاري ڪيا آهن.
عدالت پنهنجي لکت ۾ ڏنل حڪم ۾ چيو آهي ته درخواست ڏيندڙ جي مطابق فوج جو ڪم اندروني ۽ ٻاهرين سيڪيورٽيءَ جي خطرن کي منهن ڏيڻ آهي.
لاهور هائي ڪورٽ جي جج جسٽس عابد حيسن چٺا جمعي ڏينهن ٻن صفحن تي مشتمل لکت ۾ حڪم جاري ڪندي چيو ته درخواست گزار مطابق ’اليڪشن ايڪٽ’ هيٺ نگران حڪومت ان قسم جا وڏا فيصلا نه ٿي ڪري سگهي.
عدالتي حڪم ۾ چيو ويو آهي ته نگران حڪومت ڪنهن به زمين کي 30 سالن تائين ليز تي ڏيڻ جو فيصلو نه ٿي ڪري سگهي. ان حوالي سان، عدالت پنجاب حڪومت جي نوٽيفيڪيشن تي عمل درآمد روڪي ڇڏيو آهي.
ان ڪيس جي ٻڌڻي 29 مارچ تي ٿي هئي جنهن جو فيصلو محفوظ ڪيو ويو هو. عدالت مدد جي لاءِ اٽارني جنرل ۽ ايڊوڪيٽ جنرل پنجاب کي به نوٽيس جاري ڪيا آهن.
زمين فوج جي حوالي ڇو ڪئي وئي؟
ڪيل هڪ معاهدي هيٺ پنجاب جي نگران حڪومت هلندڙ مهيني ساهيوال، خوشاب ۽ بکر ۾ ايگريڪلچر فارمنگ جي لاءِ پاڪستان فوج کي 45000 کان وڌيڪ ايڪڙ اراضي ليز تي ڏيڻ جو نوٽيفيڪيشن جاري ڪيو هو.
درخواست ڏيندڙ وڪيل احمد رافع عالم ٻڌايو ته ڪيس فائيل ٿيندي ئي عدالت پهرين ٻڌڻيءَ ۾ ’اسٽي آرڊر’ جاري ڪيو آهي.
هن عدالت ۾ اهو موقف اختيار ڪيو آهي ته ڪارپوريٽ فارمنگ ۽ ان نوعيت جا ٻيا ڪم حڪومت جو ڪم آهي ۽ فوج اهڙن منصوبن تي ڪم نه ٿي ڪري سگهي.
(ضياالرحمان جي رپورٽ)
