پاڪستان جي قومي اسيمبليءَ پنجاب ۾ 14 مئي تي چونڊون ڪرائڻ جي عدالتي حڪم جي خلاف قرارداد منظور ڪئي آهي. قرارداد ۾ وزير اعظم کي چيو ويو آهي ته هو سپريم ڪورٽ جي فيصلي تي عمل درآمد نه ڪري. وفاقي ڪابينا اڳ ۾ ئي سپريم ڪورٽ جي ان حڪم کي رد ڪري چڪي آهي.
قرارداد ۾ چيو ويو آهي ته پارليامينٽ عدالتي فيصلي کي رد ڪري ٿي ۽ وزير اعظم کي پابند ڪري ٿي ته هو ڪابينا کي چوي ته اها فيصلي تي عمل نه ڪري.
قرارداد ۾ چيو ويو آهي ته سياسي معاملن ۾ سپريم ڪورٽ جي مداخلت تي تشويش آهي.
سپريم ڪورٽ جي ٽه رڪني بينچ جي خلاف قرارداد بلوچستان عوامي پارٽيءَ جي رڪن قومي اسيمبلي خالد مگسيءَ پيش ڪئي.
خيال رهي ته ان کان اڳ وفاقي ڪابينا به سپريم ڪورٽ جي فيصلي کي مسترد ڪندي ان کي آئين سان مذاق قرار ڏنو هو.
وفاقي ڪابينا چيو هو ته سپريم ڪورٽ جو فيصلو اقليتي آهي ان جي ڪري ڪابينا جا ميمبر ان کي رد ڪن ٿا.
واضح رهي ته سپريم ڪورٽ پنجاب ۽ خيبرپختونخوا ۾ چونڊن جي التوا ڪيس جو فيصلو ٻڌائيندي پنجاب اسيمبليءَ جون چونڊون 14 مئي تي ڪرائڻ جو حڪم ڏنو آهي، جڏهن ته خيبرپختونخوا جي چونڊن جي معاملي تي متعلق فورم سان رابطي جي هدايت ڪئي آهي.
چيف جسٽس عمر عطا بنديال اڱاري ڏينهن ئي اليڪشن پوئتي ڪرڻ متعلق تحريڪ انصاف جي درخواستن تي محفوظ فيصلو ٻڌائيندي اليڪشن ڪميشن جو 22 مارچ جو فيصلو غلط قرار ڏنو.
خيال رهي ته وفاقي حڪومت ۾ شامل جماعتن جو موقف آهي ته ان ڪيس ۾ پهريون ستن ججن جو بينچ هو جن مان چئن هن ڪيس سان اختلاف ڪيو آهي. ان ڪري چونڊن جي حوالي سان فيصلو اقليتي آهي، جڏهن ته سپريم ڪورٽ جي پنجن کان ستن منجهان چئن ججن الڳ ٿيڻ کان پوءِ ان ڪيس کي ٽه رڪني بينچ ٻڌو، جنهن سومر جي ڏينهن فيصلو محفوظ ڪيو هو ۽ اڱاري ڏينهن ان کي جاري ڪيو.
