قومي اسمبليءَ پنجاب ۾ چونڊون ڪرائڻ جي لاءِ اليڪشن ڪميشن کي 21 ارب روپيا فراهم ڪرڻ جي تحريڪ رائي جي اڪثريت سان رد ڪري ڇڏي آهي.
ان ڏس ۾ قومي اسيمبليءَ جي قائم ٿيل ڪاميٽيءَ اليڪشن ڪميشن کي فنڊ فراهم نه ڪرڻ جي رپورٽ جي منظوري ڏني هئي. ان کان پوءِ ان ڪاميٽيءَ جي رپورٽ کي قانون واري وفاقي وزير اعظم تارڙ تحريڪ جي صورت ۾ قومي اسيمبليءَ آڏو پيش ڪيو هو.
قائما ڪاميٽيءَ ۾ معاملو وڃڻ کان اڳ وفاقي ڪابينا جو اجلاس ٿيو هو جنهن جي صدارت وزير اعظم شهباز شريف ڪئي هئي. ڪابينا جي ان اجلاس ۾ فيصلو ڪيو ويو ته اليڪشن ڪميشن کي فنڊز جي فراهميءَ جو معاملو قومي اسمبليءَ کي موڪليو ويندو ۽ پارليامينٽ فوصلو ڪندي ته رقم جاري ٿئي يا نه.
قومي اسمبليءَ کي خطاب ڪندي قانون واري وفاقي وزير اعظم نذير تارڙ چيو ته هڪ شخص کي خوش ڪرڻ جي لاءِ چونڊن جو حڪم ڏنو ويو.
ٻئي پاسي تحريڪ انصاف چونڊن جي لاءِ رقم جاري نه ڪرڻ کي عدالت جي توهين قرار ڏنو آهي.
پي ٽي آءِ جي اڳواڻ ۽ اڳوڻي وفاقي وزير فواد چوڌريءَ چيو آهي ته سپريم ڪورٽ جي فيصلي کان پوءِ اسٽيٽ بينڪ کي اڃان تائين رقم جاري نه ڪرڻ عدالت جي حڪم جي ڀڇڪڙيءَ جي ڏس ۾ اچي ٿو.
هن وڌيڪ چيو ته سپريم ڪورٽ وزير اعظم ۽ ڪابينا جي خلاف عدالت جي توهين جي ڪاروائي شروع ڪري.
خيال رهي ته پوئين هفتي سپريم ڪورٽ پنجاب جي چونڊن جي لاءِ رقم جاري ڪرڻ جي ڪيس ۾ اسٽيٽ بينڪ کي هدايت ڪئي هئي ته اليڪشن ڪميشن کي 21 ارب روپيا جاري ڪيا وڃن.
ان وقت حڪومت جي پاران پيش ٿيڻ واري اٽارني جنرل چيو ته حڪومت پارليامينٽ کي رقم ڏيڻ کان روڪيو آهي ته فنڊ ڪيئن جاري ڪري سگهجن ٿا.
جمعي ڏينهن چيف جسٽس عمر عطا بنديال ان معاملي تي ’ان چيمبر’ ٻڌڻي ڪئي هئي جنهن ۾ عدالت اسٽيٽ بينڪ جي گورنر، خزاني جي وزارت ۽ اليڪشن ڪميشن جي اختياريءَ وارن کي ذاتي حيثيت ۾ گهرايو هو.
ان کان پوءِ چيف جسٽس نون صفحن تي مشتمل لکت ۾ ڏنل حڪم نامي ۾ اسٽيٽ بينڪ ۽ خزاني جي اختياريءَ وارن چيو هو ته 18 اپريل تائين حڪم نامي تي عمل درآمد تي رپورٽ جمع ڪرائي وڃي. حڪم جي تعميل متعلق اها رپورٽ اڱاري ڏينهن عدالت ۾ جمع ڪرائي ويندي.
ياد رهي ته سپريم ڪورٽ 14 مئي تي پنجاب ۾ چونڊون ڪرائڻ جو حڪم ڏنو هو. ليڪن، وفاقي حڪومت سپريم ڪورٽ جي ان فيصلي کي رد ڪيو هو. حڪومتي اتحاد پارليمان کان سموري ملڪ ۾ هڪ ئي وقت چونڊون ڪرائڻ جي قرارداد به منظور ڪري چڪو آهي.
ٻئي پاسي، چيف جسٽس جا اختيار گهٽائڻ جي حوالي سان به قانون سازي ڪئي وئي آهي.
