اسرائيل جي وزيراعظم بنيامين نيتن ياهو اسرائيلي عدالتن جي ’اختلافي‘ سڌارن کي روڪيندڙ بچاءَ واري وزير کي عھدي تان ھٽائي ڇڏيو آهي، جنھن کان پوءِ سڄي ملڪ ۾ وڏي پيماني تي عوامي احتجاج شروع ٿي ويو آهي.
خابرو اداري ’رائٽرز’ موجب بچاءَ واري اسرائيلي وزير يواف گيلانٽ ملڪ جي عدالتي نظام جي تجديد ۽ سڌاري کي روڪڻ جو مطالبو ڪيو، جنهن کانپوءِ وزيراعظم نيتن ياهو کيس آچر تي عهدي تان هٽائي ڇڏيو.
بچاءَ واري وزير جي برطرفي جي خبر کانپوءِ اسرائيل ۾ هزارين شهري احتجاج ڪندي ملڪ جا جھنڊا کڻي رات دير سان روڊن تي نڪري آيا.
شھري وزيراعظم نيتن ياهو جي گهر جي ٻاهران به گڏ ٿيا ۽ هڪ موقعي تي سيڪيورٽي جي صورتحال بي قابو ٿي وئي.
واضح رهي ته اقتدار سنڀالڻ جي ٽن مهينن کانپوءِ ئي نيتن ياهو جي قومپرست مذهبي اتحادي حڪومت عدليه جي تجديد ۽ اصلاح جي پاليسي سبب بحران جي ور چڙھيل آهي.
مخالف ڌر جي اڳواڻن يائر لاپيڊ ۽ بيني گينٽز هڪ گڏيل بيان ۾ چيو ته ملڪ جي سلامتي سياسي ڪارڊ طور استعمال نه ٿيڻ گھرجي. هنن چيو ته نيتن ياهو اڄ پنھنجن فيصلن سبب ’’آخري حد’’به اورانگهي ويو آهي.
گيلنٽ جي برطرفيءَ بعد نيتن ياهو جي آفيس سندس متبادل طور ڪنھن کي نامزد ناھي ڪيو نه ئي ان سلسلي ۾ ڪا وڌيڪ تفصيل ٻڌائي وئي آھي. وزيراعظم آفيس جي بيان ۾ فقط ايترو ٻڌايو ويو آهي ته وزيراعظم بچاءَ واري وزير کي عهدي تان هٽائڻ جو فيصلو ڪيو آهي.
ان فيصلي کان ٿوريءَ دير پوءِ گيلنٽ ٽوئيٽر تي لکيو ته اسرائيلي رياست جي حفاظت هميشه سندس زندگيءَ جو مشن رهيو آهي.
اسرائيلي وزيرِ دفاع گيلنٽ رٿيل عدالتي سڌارن کي روڪڻ جي گُھر ڪندي چيو هو ته ان سان ملڪ جي سلامتي کي خطرو آهي. هن ڇنڇر جي ڏينھن ٽي وي تي خطاب دوران چيو ته ملڪ خاطر ھو ڪنھن به خطري کي منھن ڏيڻ لاءِ تيار آهي.
اھڙي بيان بعد وزيراعظم نيتن ياھو گيلنٽ کي هٽائڻ جو فيصلو ڪيو.
اسرائيلي حڪومت پاران رٿيل عدالتي سڌارن تحت حڪومت کي سپريم ڪورٽ جا جج نامزد ڪرڻ جا اختيار حاصل ٿي ويندا.
هن مهيني جي شروع ۾ اسرائيلي صدر آئيزڪ هرزوگ پڻ خبردار ڪيو هو ته عدالتي سڌارن جي معاملي ۾ جيڪڏهن وسيع اتفاق پيدا نه ڪيو ويو ته صورتحال سگھو ئي تباهي ڏانهن وڃي سگهي ٿي.
جڏھن ته اسرائيلي وزيراعظم جو چوڻ آهي ته ان فيصلي سان "سرگرم ڪارڪن" ججن کي واڳ وجھي سگھجي ٿي ۽ ان سان ملڪ جي چونڊيل حڪومت ۽ عدليه وچ ۾ طاقت جو توازن پڻ قائم ٿيندو.
(هن خبر ۾ شامل معلومات 'رائٽرز' تان ورتي وئي آهي)
ويب ڊيسڪ —
