پاڪستان هن هفتي پنهنجو سفير افغانستان موڪلڻ جو فيصلو ڪيو آهي، جنهن کي ان وقت واپس گهرايو ويو هو جڏهن چئن مهينن کان وڌيڪ عرصو اڳ دولت اسلاميه جي گروه ڪابل ۾ ان تي قاتلاڻو حملو ڪيو هو. اها ڳالهه آچر جي ڏينهن ڪيترن ئي ذريعن وائس آف آمريڪا کي ٻڌائي آهي.
اهو فيصلو گزريل رات پاڪستان جي پرڏيهي وزير بلاول ڀٽي زرداريءَ ۽ افغان پرڏيهي وزير امير خان متقيءَ جي وچ ۾ ٽيلي فون تي ڳالهه ٻولهه کان پوءِ ڪيو ويو.
پاڪستاني سرڪاري اهل ڪار، جنهن کي ميڊيا کي ڪجهه ٻڌائڻ جي اجازت ناهي، نالو ظاهر نه ڪرڻ جي شرط تي ٻڌايو ته ’’سفير عيد الفطر جي جشن کان اڳ ۾ ڪابل پهچي ويندو’’.
عهديدار وڌيڪ تفصيل ٻڌائڻ کان انڪار ڪيو، اهو چوندي ته سيڪيورٽي سببن جي ڪري سفارتي اچ وڃ کي پوشيدي رکڻ جي ضرورت پوندي آهي.
عيد جون ٽن ڏينهن جون موڪلون رمضان جي روزن جي مهيني جي پڄاڻيءَ تي ڪيون وينديون آهن، جيڪي افغانستان ۾ هن هفتي جي اختتام تي متوقع آهن.
ٻنهي ڌرين مختصر بيان جاري ڪيا آهن جن ۾ ڇنڇر ڏينهن ٻنهي عهديدارن جي وچ ۾ ٿيڻ واري رابطي جي تصديق ڪئي وئي آهي، ليڪن انهن ۾ پاڪستان جي چارچ ڊي افيئرز عبيد الرحمان نظاماڻيءَ جي افغان گاديءَ واري هنڌ واپس وڃڻ جي ڳالهه نه ڪئي وئي آهي.
طالبان جي پرڏيهي وزارت پنهنجي بيان ۾ چيو آهي ته متقيءَ پنهنجي پاڪستاني هم منصب سان ٻه طرفي سياسي، معاشي، واپار ۽ ’ٽرانزٽ’ جي معاملن تي ڳالهايو. بيان ۾ وڌيڪ تفصيل ڏيڻ بنا، چيو ويو آهي ته ٻنهي ڌرين سفارتي ناتن ۾ بهتري آڻڻ تي به اتفاق ڪيو.
اسلام آباد ۾ بلاول ڀٽي زرداريءَ جي آفيس چيو آهي ته رابطي دوران ٻه طرفي مفاد جي نوعيت جا معاملا بحث هيٺ آيا، ليکن ان جو تفصيل پيش نه ڪيو ويو. بيان ۾ چيو ويو آهي ته پرڏيهي وزير افغانستان جي استحڪام، امن ۽ خوش حاليءَ جي پاڪستان جي عزم جو اظهار ڪيو.
ٻي ڊسمبر 2022 تي عبيد نظاماڻي ڪابل ۾ پنهنجي سفارت خاني جي وڏي ڪمپائونڊ اندر گهمي رهيو هو جڏهن ويجهين عمارتن منجهان گوليون هلائيندڙن ان تي فائرنگ ڪئي. هو بچي ويو، ليڪن پاڪستان جي هڪ سيڪيورٽي محافظ جي ٽنگن ۾ گوليون لڳيون. ان کان جلد پوءِ پاڪستان پنهنجي چوٽيءَ واري سفارت ڪار کي ملڪ مان ٻاهر ڪڍيو ۽ طالبان کان مطالبو ڪيو ته سندس سفارت خاني جي حفاظت جي ڪم کي مضبوط ڪيو وڃي.
هڪ بيان ۾ دولت اسلاميه جي گروپ شوٽنگ جي ذمي داري قبول ڪئي، اهو چوندي ته سندس علائقائي ساٿي، جنهن کي داعش خوراسان جي نالي سان ڄاتو ويندو آهي، ’’دين جي منڪر پاڪستاني سفير ۽ ان جي محافظن کي نشانو بڻايو ويو’’.
هن واقعي جي نتيجي ۾ طالبان انتظاميا ۽ پاڪستان جي وچ ۾ دوستاڻن ناتن ۾ ڇڪتاڻ پيدا ٿي.
(اياز گل، وي او اي نيوز)
