پاڪستان تحريڪ انصاف (پي ٽي آءِ) جي چيئرمين ۽ اڳوڻي وزير اعظم عمران خان جي گرفتاريءَ جي لاءِ زمان پارڪ ۾ موجود پوليس کي مزاحمت آڏو آيل آهي. پوليس ۽ ڪارڪنن جي وچ ۾ تصادم جي نتيجي ۾ اسلام آباد پوليس جو ڊي آءِ جي به زخمي ٿيو آهي، جڏهن ته عمران خان جي گهر جي اندر به ڳوڙها آڻيندڙ گيس جا شيل ڪريا آهن.
اڱاري ڏينهن منجهند جو اڳوڻي وزير اعظم جي رهائش گاه تي پهچڻ واري پوليس توشاخانه ڪيس ۾ هينئر تائين عمران خان کي گرفتار نه ڪري سگهي آهي. انهيءَ دوران پوليس ۽ ڪارڪنن جي وچ ۾ ڏڦيڙ جاري آهي. ڪارڪنن پاران پوليس تي پٿراءُ ڪيو ويو، جنهن کان پوءِ پوليس لاٺي چارج ڪيو ۽ شيلنگ جو سلسلو وقفي وقفي سان جاري آهي.
پوليس جي وڏي نفريءَ سان گڏ لاهور جي ڪيپيٽل پوليس جو چيف بلال ڪميانه ۽ ڊي آءِ جي آپريشنز افضال ڪوثر به زمان پارڪ پهچي چڪا آهن ۽ گرفتاريءَ جي عمل جي نگراني ڪري رهيا آهن.
پوليس مظاهري ڪندڙن کي ڇڙ و ڇڙ ڪرڻ جي لاءِ واٽر ڪينن به استعمال ڪيو آهي، جڏهن ته ڪيترن ئي درجن ڪارڪنن کي حراست ۾ ورتو ويو آهي. عمران خان جي گرفتاريءَ جي معاملي تي پاڪستان رينجرز جو دستو به زمان پارڪ پهچي ويو آهي، جڏهن ته فضائي نگراني به ڪئي پئي وڃي.
’پوليس مون کي پڪڙڻ اچي وئي آهي، گرفتاريءَ جي باوجود تحريڪ جاري رکو’
پاڪستان تحريڪ انصاف جي چيئرمين ۽ اڳوڻي وزير اعظم عمران خان هڪ وڊيو پيغام ۾ چيو آهي ته پوليس مون کي پڪڙڻ جي لاءِ اچي وئي آهي. انهن جو خيال آهي ته عمران خان جيل هليو ويو ته قوم سمهين پوندي. ليڪن توهان کي ثابت ڪرڻو آهي ته اهي غلط آهن.
پنهنجي رهائش گاه جي ٻاهران گرفتاريءَ جي لاءِ موجود پوليس جو حوالو ڏيندي اڱاري ڏينهن پنهنجي وڊيو پيغام ۾ هن چيو ته جيڪڏحن عمران خان جيل وڃي ٿو تڏهن به توهان کي پنهنجي حقن جي لاءِ ٻاهر نڪرڻو آهي ڇو ته مان توهان جي جنگ وڙهي رهيو آهيان.
عمران خان جو هيءُ پيغام اهڙي وقت سامهون آيو آهي جڏهن پاڪستان تحريڪ انصاف جي چيئرمين جي گرفتاري۽ جي لاءِ موجود پوليس ۽ پي ٽي آءِ جي ڪارڪنن جي وچ ۾ زمان پارڪ ۾ ڏڦيڙ جاري آهي. ڪارڪنن پوليس تي پٿراءُ ڪيو، جنهن تي پوليس لاٺي چارج ڪيو آهي ۽ واٽر ڪينن جو به استعمال ڪيو ويو آهي.
عمران خان جي رهائش گاه جي اندران به پوليس تي پٿراءُ ڪيو ويو جنهن تي پوليس شيلنگ ڪئي ۽ ڪجهه شيل عمران خان جي رهائش گاه جي اندر به ڪريا آهن.
داخله جي وفاقي وزير رانا ثنا الله چيو آهي ته عدالت کان ڀڳل شخص کي عدالت جي حڪم تي گرفتار ڪندا سين ۽ گرفتار ڪري عدالت ۾ پيش ڪيو ويندو.
ڊي آئي جي اسلام آباد زخمي، رينجرز به پهچي وئي
تصادم جي نتيجي ۾ گرفتاريءَ جي لاءِ آيل ڊي آءِ جي اسلام آباد، شهزاد بخاري به زخمي ٿيو آهي، جڏهن ته پوليس پي ٽي آءِ جي ڪيترا ئي درجن ڪارڪنن کي حراست ۾ ورتو آهي. پاڪستان رينجرز جو دستو به زمان پارڪ پهچي ويو آهي.
پوليس جي بڪتربند گاڏي به اتي موجود آهي ۽ تصادم جي دوران پوليس عمران خان جي رهائش گاه جي مرڪزي گيٽ جو ڪنٽرول سنڀالي ورتو آهي. پوليس ڪارڪنن کي ڃڙ و ڇڙ ڪرڻ جي لاءِ شيلنگ به ڪئي.
لاهور مان وائس آف آمريڪا جي نمائندي ضياالرحمان مطابق زمان پارڪ جي ارد گرد سڙڪن تي قيدي وين ۽ پوليس جو گاڏيون موجود آهن.
پوليس اهل ڪارن وٽ عمران خان جي گرفتاريءَ جا وارنٽ آهن ۽ عمران خان جي رهائش گاه جي اندر وڃڻ گهرن ٿا.
ڪارڪن گرفتاريءَ جي اجازت نه ڏيندا
عمران خان جي ڀيڻ عليمه خان ميڊيا سان گفتگو ڪندي چيو آهي ته جيڪڏهن عمران خان گرفتاري ڏيڻ جي لاءِ تيار به ٿي وڃي تڏهن به ڪارڪن ان جي اجازت نه ڏيندا ڇو ته ملڪ کي عمران خان جي ضرورت آهي.
هن چيو ته عمران خان صرف اليڪشن گهري رهيو آهي جنهن جو حق پاڪستان جي آئين ۾ ڏنل آهي.
عليمه خان چيو ته عمران خان جي خلاف 70 کان وڌيڪ مقدما درج آهن ۽ اهو معلوم نه ٿي سگهيو آهي ته پوليس انهن جي گرفتاري ڪهڙي مقدمي ۾ ڪرڻ گهري ٿي.
چاهيون ٿا ته رتو ڇاڻ نه ٿئي
تحريڪ انصاف جي وائيس چيئرمين شاه محمود قريشيءَ چيو آهي ته مناسب رستو ڪڍڻ چاهيون ٿا ته جيئن رتو ڇاڻ نه ٿئي.
زمان پارڪ کان ٻاهر ميڊيا سان ڳالهائيندي هن چيو ته هو ڊي آئي جي آپريشنز سان ملندو ۽ ان کان پڇندو ته هتي اچڻ جو مقصد ڇا آهي؟
هن چيو ته هو پوليس کي ملڻ واري آرڊر کي ڏسڻ گهري ٿو ۽ پوءِ ان تي چيئرمين عمران خان سان ڳالهائيندو.
شاه محمود قريشيءَ چيو ته هو پوليس جي ارادن کان بي خبر ناهي. عمران خان حفاظتي ضمانت تي آهي آخر اڄ ڪهڙي قيامت آئي آهي جو اڄ ئي گرفتاريءَجي لاءِ آيا آهن.
ڊي آءِ جي آپريشنز اسلام آباد هڪ صحافيءَ سان مختصر ڳالهه ٻولهه ۾ چيو آهي ته هو عدالتي احڪامات جي تعميل جي لاءِ آيو آهي. صحافيءَ کيس کان پڇيو ته گرفتاريءَ کان پوءِ عمران خان کي ڪاٿي رکيو ويندو، جنهن تي پوليس عمل دار چيو ته ان جو فيصلو گرفتاريءَ کان پوءِ ٿيندو.
توشاخانه ڪيس ۾ اسلام آباد جي مڪاني عدالت سومر تي عمران خان جي گرفتاريءَ جا وارنٽ بحال ڪيا هيا، جڏهن ته خاتون جج ڌمڪي ڪيس ۾ سول ڪورٽ ان جا وارنٽ جاري ڪيا، جن کي پي ٽي آءِ اسلام آباد جي سيشن ڪورٽ ۾ چيلينج ڪيو هو.
اڱاري ڏينهن سيشن ڪورٽ خاتون جج ڌمڪي ڪيس ۾ عمران خان جي خلاف جاري ٿيڻ وارا گرفتاريءَ جا وارنٽ ٽن ڏينهن جي لاءِ معطل ڪيا ويا آهن.
