لاهور هائي ڪورٽ اڳوڻي وزير اعظم عمران خان جي خلاف داخل مختلف مقدمن ۾سندس ضمانت منظور ڪري ورتي آهي. اڳوڻي وزير اعظم جي خلاف لاهور ۾ داخل مقدمن ۾ 10 ڏينهن جڏهن ته اسلام آباد جي مقدمن ۾ 24 مارچ تائين حفاظتي ضمانت منظور ڪئي وئي آهي.
عمران خان پنهنجي خلاف داخل نون مقدمن ۾ حفاظت جي ضمانت جي لاءِ لاهور هائي ڪورٽ سان رجوع ڪيو هو. انهن نون مقدمن منجهان ستن ۾ عمران خان تي دهشت گرديءَ جا قلم لڳايا ويا آهن.
لاهور هائي ڪورٽ جي جسٽس طارق سليم شيخ ۽ جسٽس فاروق حيدر تي مشتمل ڊويزن بينچ عمران خان جي درخواست ٻڌي.
وائس آف آمريڪا جي نمائندي ضيا الرحمان جي مطابق، لاهور هائي ڪورٽ عمران خان کي ساڍي پنجين وڳي تائين عدالت پهچڻ جي هدايت ڪئي هئي. عمران خان ڪارڪنن سان گڏ قافلي جي صورت ۾ لاهور هائي ڪورٽ پهتو.
عمران خان عدالت ۾ درخواست ڏني ته کيس پنهنجي خلاف داخل ٻين مقدمن جو به تفصيل فراهم ڪيو وڃي، ته جيئن انهن ۾ به ضمانت جي درخواست ڏئي سگهي.
گرفتاريءَ جي وارنٽ جي تعميل لازم هوندي آهي
انهيءَ دوران لاهور هائي ڪورٽ جي جسٽس طارق سليم شيخ رمارڪس ڏنا ته’’ گرفتاريءَ جي لاءِ وارنٽ لاءِ سمن موڪليا ويا، ليڪن تعميل نه ٿي. تاثر اهو ٿو ملي ته رياست جي رٽ ڪانهي. ٻيهر ائين نه ٿيڻ کپي’’.
ان تي اڳوڻي وزير اعظم عمران خان چيو ته کيس معلوم هو ته 18 مارچ تي عدالت آڏو پيش ٿيڻو آهي، ليڪن هي ايتري وڏيءَ فورس سان اچي ويا جنهن جو ان کان اڳ ڪو مثال نه ٿو ملي. اسان جي ته پارٽيءَ جي نالي ۾ ئا انصاف آهي، پر اسان جي ڪارڪنن تي بدترين تشدد ڪيو ويو.
جسٽس طارق سليم شيخ عمران خان کي مخاطب ڪندي چيو ته هو پوليس سان سهڪار ڪري.
عمران خان چيو ته کيس خطرو آهي ته اهي اسلام آباد بجاءِ ڪوئٽا وٺي ويندا. رانا ثنا الله جا گرفتاريءَ جا وارنٽ به جاري ٿي چڪا آهن. ان جو ڇا ٿيو؟ ان تي جسٽس طارق سليم شيخ چيو ته اهو معاملو سندس آڏو آيو ته پوءِ ڏسندا سين.
اسلام آباد هائي ڪورٽ ۾ ٻڌڻي
هوڏانهن اسلام آباد هائي ڪورٽ عمران خان کي 18 مارچ تائين گرفتار نه ڪرڻ جو حڪم ڏنو آهي.
عمران خان توشا خانه ڪيس ۾ ضمانت نه ٿيڻ جوڳا وارنٽ برقرار رکڻ جو فيصلو اسلام آباد هائي ڪورٽ ۾ چيلينج ڪيو هو. خميص تي سيشن عدالت گرفتاريءَ جا وارنٽ معطل ڪرڻ جي درخواست مسترد ڪئي هئي.
چيف جسٽس اسلام آباد هائي ڪورٽ جسٽس عامر فاروق ريمارڪس ڏنا هيا ته عمران خان عدالتي وقت جي دوران ٽرايل ڪورٽ جي آڏو پيش ٿئي ته ان جا نتيجا نڪرندا ۽ عدالت جي توهين جي ڪاروائي به ٿي سگهي ٿي.
عدالت جمعي ڏينهن مختصر فيصلو ٻڌائيندي انتظاميه ۽ اسلام آباد پوليس کي سيڪيورٽي انتظام ڪرڻ جو به حڪم ڏنو.
