پاڪستان جي صوبي پنجاب ۾ عام چونڊن جي تاريخ جي اعلان ۽ اليڪشن شيڊول جاري ٿيڻ باوجود وفاقي حڪومت پنجاب اسيمبليءَ جي چونڊن بابت اعليٰ عدالتي فيصلو نه مڃڻ واري ڳالھ تي قائم آهي.
وفاقي حڪومت پنجاب اسيمبليءَ جون چونڊون ڪرائڻ بابت سپريم ڪورٽ جي فيصلي کي تڪراري قرار ڏئي رھي آھي ۽ ان خلاف پارليامينٽ ۾ ھڪ قرارداد منظور ڪرائڻ جو ارادو رکي ٿي.
گهرو کاتي واري وفاقي وزير رانا ثناءُ الله حڪومت جي حڪمت عملي جو ذڪر ڪندي چيو آهي ته ڪابينا سپريم ڪورٽ جي فيصلي کي رد ڪري ڇڏيو آهي. هاڻ ڪابينا جي فيصلي کي پارليامينٽ ۾ ھڪ قرارداد جي صورت ۾ پيش ڪيو ويندو.
جيو ٽي وي جي پروگرام ’آج شاھزيب خانزاده ڪي ساٿ’ ۾ ڳالهائيندي رانا ثناءُ الله چيو ته سپريم ڪورٽ جي فيصلي تي قانون واري وزارت جيڪا رائي ڏني آھي تنھن سان وفاقي ڪابينا متفق آهي، ۽ اتحادي پارٽين جي سربراهن به ان رائي سان اتفاق ڪيو.
رانا ثناءُ الله وزارتِ قانون طرفان پيش ڪيل رائي جو تفصيل نه ٻڌايو
هن چيو ته پنجاب ۾ چونڊن بابت سپريم ڪورٽ جي حڪم تي ڪابينا فيصلو ڪري ورتو آهي جنھن کي پارليامينٽ آڏو رکيو ويندو. جڏهن ته ڪابينا پنهنجي حتمي فيصلي کي پارليامينٽ جي هدايتن سان مشروط ڪري ڇڏيو آهي. جيڪڏهن پارليامينٽ ڪا ٻي راءِ ڏئي ٿي ته ڪابينا ان جي پابندي ڪندي.
واضح رهي ته سپريم ڪورٽ 4 اپريل تي پنجاب ۽ خيبرپختونخواه اسيمبليءَ جون چونڊون ملتوي ڪرڻ واري ڪيس جو فيصلو ٻڌائيندي 14 مئي تي پنجاب ۾ چونڊون ڪرائڻ جو حڪم ڏنو هو.
سپريم ڪورٽ اليڪشن شيڊول جاري ڪندي حڪم ڏنو هو ته وفاقي حڪومت اليڪشن ڪميشن کي 10 اپريل تائين 21 ارب رپيا جاري ڪري.
ميڊيا رپورٽن موجب وزيراعظم شهباز شريف جي صدارت هيٺ ٿيل وفاقي ڪابينا سپريم ڪورٽ جي فيصلي کي رد ڪري ڇڏيو آهي.
هوڏانهن تحريڪ انصاف جي مرڪزي اڳواڻ فواد چوڌري جو چوڻ آهي ته جيڪڏهن ڪابينا اجلاس ۾ شرڪت ڪندڙ وزيرن فيصلي کان لاتعلقي اختيار نه ڪئي ته عهدي تان ھٽائڻ لاءِ آرٽيڪل 63 اي تحت اليڪشن ڪميشن ڏانهن ريفرنس موڪليو ويندو.
توهينِ عدالت جي ڪاروائي جو انديشو؟
سپريم ڪورٽ جي فيصلي تي عمل نه ڪري ڇا حڪومت توهينِ عدالت جي ڪاروائيءَ لاءِ تيار آهي؟ ان سوال تي رانا ثناءُ الله چيو ته حڪومت ٽن ججن جي اقليتي فيصلي کي فيصلو ئي نٿي مڃي ته پوءِ توهين عدالت ڇا جي؟
هن چيو ته اليڪشن ملتوي ڪرڻ واري پاڻمرادي نوٽيس تي چئن ججن جو فيصلو موجود آهي، جيڪي چئي چڪا آھن ته پاڻمرادي نوٽيس کي خارج سمجھيو وڃي. ان صورت ۾ سپريم ڪورٽ جو فيصلو اقليتي آهي.
وفاقي گهرو وزير چيو ته جيڪڏهن ٽي جج توهين عدالت جي الزام ۾ پوري پارليامينٽ کي گهر موڪلڻ چاهين ٿا ته پوءِ اهو ڪم به هڪ ڀيرو ٿيڻ گھرجي ته جيئن روز روز جو مسئلو ھڪڙي پاسي ٿي وڃي.
قانوني ماهرن جو خيال آهي ته پارليامينٽ کي اعليٰ عدالت جي دوبدو ڪرڻ نظام لاءِ خطرناڪ ثابت ٿيندو.
حڪومت جو موقف آهي ته سڄي ملڪ ۾ هڪ ئي وقت چونڊون ڪرايون وڃن. رڳو ٻن صوبن ۾ چونڊون ڪرائڻ ٻين صوبن سان ظلم ٿيندو.
ٻئي طرف اليڪشن ڪميشن آف پاڪستان پنجاب اسيمبليء جي چونڊن جو شيڊول جاري ڪري ڇڏيو آهي، جنهن موجب چونڊون 14 مئي تي ٿينديون.
