پاڪستان جي پنجاب صوبي ۾ چونڊن جي لاءِ فنڊ جاري ڪرڻ جي ڪيس ۾ سپريم ڪورٽ اسٽيش بينڪ ۽ خزاني جي وزارت کي 21 ارب روپيا جاري ڪرڻ جو حڪم ڏنو آهي.
اٽارني جنرل آف پاڪستان چيو آهي ته حڪومت کي پارليامينٽ فنڊ ڏيڻ کان انڪار ڪيو آهي، ته اهي ڪيئن جاري ڪري سگهجن ٿا. وفاقي حڪومت وٽ اليڪشن جي لاءِ فنڊز جاري ڪرڻ جو ڪو اختيار ڪونهي.
جمعي جي ڏينهن چيف جسٽس عمر عطا بنديال ان معاملي تي ’ان چيمبر’ بڌڻي ڪئي، جتي عدالت گورنر اسٽيٽ بينڪ، خزاني جي وزارت ۽ اليڪشن ڪميشن جي اختياريءَ وارن کي ذاتي حيثيت ۾ سڏيو هو.
ميڊيا رپورٽن جي مطابق، خزاني جي وزارت جي اختياريءَ وارن ’ان چيمبر’ ٻڌڻيءَ ۾ موقف ڏنو ته اسان جي مٿان قرض آهن. اسٽيٽ بينڪ کي اختياريءَ وارن بريفنگ ڏني ته 21 ارب روپين جي رقم خزاني ۾ موجود آهي ته حڪومت جي منظوريءَ سان جاري ڪري سگهجي ٿي.
اٽارني جنرل حڪومتي موقف پيش ڪيو جنهن تي انهن کان سخت سوال پڇيا ويا. ججن فنڊ جاري نه ڪرڻ تي ناراضگيءَ جو اظهار ڪندي واضح ڪيو ته عدالتي حڪم تي عمل ڪرڻو پوندو.
چيف جسٽس جي چيمبر ۾ ٿيڻ واري سماعت کان اڳ اٽارني جنرل جي خزاني واري وزارت جي اختياريءَ وارن سان ملاقات ٿي، جڏهن ته وزير اعظم به اٽارني جنرل کي صلاح مشوري جي لاءِ پاڻ وٽ گهرايو هو.
ٻڌڻيءَ جي دوران عيوضي گورنر اسٽيٽ بينڪ سيما ڪامل، ڊپٽي گورنر اسٽيٽ بينڪ عنايت حسين چوڌري، ڊائريڪٽر اسٽيٽ بينڪ قدير بخش ۽ پروٽوڪول آفيسر اسٽيٽ بينڪ محسن افضال به ٻڌڻيءَ ۾ موجود هيو. سيڪريٽري اليڪشن ڪميشن عمر حميد، ايڊيشنل سيڪريٽري اليڪشن ڪميشن ۽ ڊي جي لا اليڪشن ڪميشن به سماعت ۾ موجود هيا.
واضح رهي ته سپريم ڪورٽ اسٽيٽ بينڪ جي گورنر، خزاني جي وزارت ۽ اليڪشن ڪميشن اختياريءَ وارن کي ذاتي حيثيت ۾ سڏايو هو. سپريم ڪورٽ 12 اپريل تي اليڪشن ڪميشن جي پاران فنڊ فراهم نه ڪرڻ جي رپورٽ تي نوٽيس جاري ڪيا هيا.
عدالت پنجاب ۾ چونڊون ڪرائڻ جي لاءِ حڪومت کي 21 ارب روپيا جاري ڪرڻ جي هدايت ڪئي هئي، جڏهن ته 4 اپريل جي فيصلي ۾ اليڪشن ڪميشن کي 11 اپريل تائين فنڊز متعلق عدالت کي آگاه ڪرڻ جو حڪم ڏنو هو.
يارهين اپريل تي اليڪشن ڪميشن پنهنجي رپورٽ ۾ ٻڌايو هو ته وفاقي حڪومت چونڊن جي لاءِ فنڊ فراهم نه ڪيا آهن.
سپريم ڪورٽ 14 مئي تي پنجاب ۾ چونڊن ڪرائڻ جو حڪم ڏنو آهي، ليڪن حڪومت سپريم ڪورٽ جي هن فيصلي کي رد ڪيو آهي.
