دستاويز ليڪ: مشڪوڪ شخص خدا، بندوقن ۽ جنگي رازن بابت ڳالهائيندو هو

سوشل ميڊيا جي هن دنيا ۾ اوهان جون پوسٽون فنگر پرنٽ وارو ڪم ڪن ٿيون، يعني سوشل پليٽ فارمن تي سرگرمي ذريعي اوھان جي سڃاڻپ آساني سان ٿي سگهي ٿي.

جديد دور جي گُھرجن موجب جاچ ڪندڙ ادارا ڪنھن ملزم جي ڳولا لاءِ سوشل ميڊيا کي ئي ڦلوريندا آھن ۽ ڪنھن تي شڪ جي صورت ۾ سندس سوشل ميڊيا پروفائيل تان ان جي پسند نا پسند ۽ لاڙن جو اندازو لڳائيندا آھن.

اهڙو ئي ڪم آمريڪا جي وفاقي تحقيقاتي اداري (ايف بي آئي) ڪيو، جنهن کي ڳجھا سرڪاري دستاويز ليڪ ڪندڙ شخص جي ڳولا ھئي. کين ان تائين پهچڻ ۾ گهڻو وقت نه لڳو.

ايف بي آئي خميس ڏينهن رياست ميساچوسٽس ۾ ڪاروائي ڪندي ايئر نيشنل گارڊ جي 21 ورهين جي ملازم جيڪ ٽيڪشيرا کي سرڪاري راز وائکا ڪرڻ جي الزام ۾ گرفتار ڪيو آھي.

آمريڪا جي اٽارني جنرل ميرڪ گارلينڊ مطابق ٽيڪشيرا تي قومي سلامتي سان لاڳاپيل ڳجھي معلومات کي ظاھر ڪرڻ جو الزام لڳايو ويندو.

جانچ ڪندڙ آفيسرن جو خيال آهي ته مشتبہ شخص آن لائن چيٽ گروپن ۾ انتهائي ڳجھا سرڪاري دستاويز پوسٽ ڪيا ھيا.

انھن ليڪ ٿيل دستاويزن ۾ يوڪرين جي جنگ سميت آمريڪا جي قومي سلامتي جي اهم معاملن بابت ڳجهي معلومات شامل آهي، جن جي سوشل ميڊيا تي اچڻ کان پوءِ آمريڪا جي حساس قومي رازن کي محفوظ بنائڻ جي صلاحيت تي سوال اٿڻ لڳا.

جانچ اختيارين کي ٽيڪشيرا تي تڏھن شڪ ٿيو جڏھن ھنن سوشل پليٽ فارم ’ڊسڪارڊ’ تي سندس پوسٽ ڪيل مواد جو جائزو ورتو. ان ويب سائيٽ تي ٽيڪشيرا گزريل ڪيترن ئي سالن کان آمريڪا جي رازن ۾ دلچسپي وٺي رھيو ھو، ۽ اڪثر ڪري بندوقن، گيمن، ۽ سندس پسنديده ميمز شيئر ڪندو ھو.

"ايسوسي ايٽڊ پريس" مطابق تحقيقاتي ويب سائيٽ ’بيلنگ ڪيٽ’ ۽ اخبار ’نيو يارڪ ٽائمز’ پهريون ڀيرو ٽيڪشيرا جي سڃاڻپ ڪئي ھئي، جڏهن ته وفاقي اختيارين تصديق ڪئي آھي ته کين ٽيڪشيرا تي شڪ آهي.

ان شخص جي باري ۾ ٻڌايو ويو آهي ته هو ايئر نيشنل گارڊ جي نوڪري دوران انتهائي ڳجهي معلومات تائين رسائي حاصل ڪري چڪو هو. ٽيڪشيرا ايئر فورس انٽيليجنس يونٽ ۾ ايئر مين هو.

اي پي موجب اختيارين جو چوڻ آهي ته ٽيڪشيرا سائبر ٽرانسپورٽ سسٽم جو ماهر هو. هن عھدي لاء سندس سيڪيورٽي ڪليئرنس به ٿي چڪي هئي تنھن ڪري کيس فوجي نيٽ ورڪ تائين رسائي ڏني وئي ۽ ان جي حفاظت جو ذمو ڏنو ويو.

ھتي سوال اهو ٿو پيدا ٿئي ته ڪيئن هڪ نوجوان سروس ميمبر جي ايڏي حساس معلومات تائين رسائي ممڪن ٿي؟ ان جو جواب ڏيندي پينٽاگون جي ترجمان برگيڊيئر جنرل پيٽرڪ ريڊار جو چوي ٿو ته اهو فوج جو اندروني عمل آهي ته اعليٰ سطح جي سيڪيورٽي ڪليئرنس وٺندڙ ڪنھن نوجوان آفيسر کي اهم ذميواري ڏني وڃي ٿي.

هن چيو ته اسان وڏي ذميواري سان پنهنجن نوجوان اهلڪارن تي اعتماد ڪندا آھيون. انهن نوجوان فوجين کي ڏسو جيڪي جنگ جي ميدان ۾ وڏي اعتماد سان فوج دستن جي اڳواڻي ڪري رھيا آهن.

'اصل ۾ OG ئي ٽيڪشيرا آهي'

اي پي جي مطابق ’ٺگ شيڪر سينٽرل‘ نالي هڪ آن لائن چيٽ گروپ ۾ اٽڪل ٻه درجن ماڻهو شامل آهن، جيڪي پنهنجين پسنديده بندوقن کان سواءِ ميمز ۽ جوڪ به شيئر ڪندا آهن.

ان گروپ جا ميمبر جنگين تي پڻ بحث ڪندا ھئا جن ۾ روس جو يوڪرين تي حملو به شامل آھي. گروپ ۾ ٽيڪشيرا سميت ڪيترائي ماڻهو سالن کان شيون شيئر ڪري رهيا هيا.

اي پي مطابق ان کان اڳ چيٽ گروپ جي هڪ ميمبر ڳجھا ڪاغذ ليڪ ڪندڙ شخص جي 'OG' جي نالي سان سڃاڻپ ڪرائي هئي.

هڪ گروپ ميمبر اي پي کي ٻڌايو ته 'او جي' اصل ۾ ٽيڪشيرا ئي هو، جيڪو مسيحيت جو مشاھدو ڪندڙ ھو ۽ چيٽ گروپ ۾ اڪثر خدا ۽ عبادت جي ڳالهه ڪندو هو. ھن چيو ته ٽيڪشيرا آمريڪي حڪومت ۽ فوج تي پڻ تنقيد ڪندو ھو.

هن ٻڌايو ته ٽيڪشيرا کي خبر ھئي ته ايف بي آئي کيس ڳولي رهي آهي.

(هن خبر ۾ شامل معلومات خبرن جي اداري ’ايسوسي ائٽڊ پريس‘ تان ورتي وئي آهي)