افغانستان جي اترئين علائقي ۾ باغين جي هڪ مرڪز تي ٿيڻ واري اوچتي حملي ۾ مزاحمتي تحريڪ جي هڪ ڪمانڊر سميت 8 لڙاڪا ماريا ويا. اها ڳالهه افغانستان جي بچاءَ واري وزارت اڱاري ڏينهن ٻڌائي آهي.
ٻڌايو ويو آهي ته قومي مزاحمتي محاذ (اين ايف آر) 2021 ۾ طالبان جي طرفان ملڪ تي قبضي ۽ اقتدار کسڻ کان پوءِ طالبان سان وڙهڻ جو عزم ڪيو هو.
قبضي کان پوءِ اين ايف آر پسپائي اختيار ڪري پنجشير صوبي جي هڪ ڏورانهين جابلو واديءَ جو رخ ڪيو هو، جڏهن پنجشير طالبان جي پاران ملڪ تي مڪمل قبضي تائين ان جي خلاف وڙهڻ وارو آخري صوبو وڃي بچيو هو.
قومي مزاحمتي محاذ ۽ هڪ ٻئي گروه، ’افغانستان فريڊم فرنٽ’، اولهه جي ملڪن جي حمايت واري افغان حڪومت جي اڳوڻي سڪيورٽي عملي تي مشتمل هئي.
بچاءَ جي وزارت هڪ ٽوئيٽ ۾ چيو آهي ته 313 سينٽرل ڪور صوبي پروان جي سالانگ ضلعي ۾ باغين جي هڪ ٽڪاڻي تي ڪاروائي ڪئي جنهن ۽ اڪمل اميريءَ نالي هڪ ڪمانڊر سميت 8 ڄڻا ماريا ويا.
انهن لڙاڪن پنجشير ۽ ڪابل جي پسگردائيءَ واري علائقي، پروان تي اوچتي حملي جي دوران راڪيٽ سان هلڻ واري هڪ گرينيڊ، ڪلاشنڪوف ۽ ٻين رائيفلن ۽ رات جو ڏسڻ واري دوربينن تي قبضو ڪري ورتو.
وزارت ٻڌايو ته اسلامي امارات جا مجاهد ڪنهن گروپ کي اسان جي سلامتيءَ ۽ اسان جي ماڻهن جي ڀلائيءَ لاءِ جاکوڙ ڪرڻ وارن کي نقصان پهچائڻ جي اجازت نه ڏيندا.
اين ايف آر ۾ پرڏيهي ناتن جي معاملن جي اڳواڻ علي ميثم نظاري قتل ٿيڻ واري ڪماندڙ جي ساراه ڪئي ۽ فوجي ڪاروائيءَ جي مذمت ڪئي.
هڪ ٽوئيٽ ۾ هن چيو ته افغان عوام جي مزاحمت جي شهيدن جي رت جو هر قطرو آزادي، وقار ۽ انصاف جي گهر جي جڙن کي پاڻي پهچائيندو ۽ اسان کي فتح جي ويجهو وٺي ويندو.
(هن خبر جو مواد ايسو سي ايٽڊ پريس تان ورتو ويو آهي)
