آمريڪا جي بچاءَ واري کاتي چيو آهي ته اهم نوعيت جا پوشيده دستاويز عام ٿيڻ جي ڪري ڪيتريون ئي ايجنسيون قومي سلامتيءَ تي پوڻ واري اثر جو جائزو وٺي رهيون آهن.
آچر ڏينهن هڪ بيان ۾ پينٽاگان جي نائب پريس سيڪريٽري، سيرينا سنگهه چيو آهي ته بچاءَ وارو محڪمو سوشل ميڊيا سائيٽس تي گردش ڪندڙ دستاويزن جي تصويرن جي اصلي هئڻ جو جائزو وٺي رهيو آهي.
هن چيو ته لڳي ائين ٿو ته انهن منجهه حساس ۽ حد درجي جو خفيه مواد موجود آهي.
سيرينا سنگهه چيو ته قومي سلامتي پينٽاگان جي سڀني کان اولين ترجيح آهي.
ڊپٽي پريس سيڪريٽريءَ چيو ته آمريڪا جا اختياريءَ وارا اتحادين ۽ شراڪت دارن سان رابطي ۾ آهن ۽ دستاويز سامهون اچڻ بابت اختيار جو ذمو رکندڙ ڪانگريس جي تعلق وارين ڪاميٽين کي اطلاع ڏنو ويو آهي.
ان کان اڳ جمعي ڏينهن آمريڪا جي انصاف واري محڪمي چيو هو ته ان معاملي جي ڇنڊ ڇاڻ شروع ڪري ڏني وئي آهي.
سوشل ميڊيا تي گردش ڪندڙ معلومات ۾ روس جي يوڪرين ۾ جنگ ۽ آمريڪي اتحادين جا ان جي باري ۾ جائزا شامل آهن.
(هن رپورٽ ۾ شامل مواد اي پي، اي ايف پي ۽ رائيٽرز تان ورتو ويو آهي)
