آمريڪا جي سامونڊي فوج پنهنجي ايٽمي آبدوز وچ اوڀر جي علائقي ڏانهن رواني ڪئي آهي، جيڪا 154 ’ٽام هاڪ’ ميزائيلن سان ليس آهي.
سامونڊي فوج جي ترجمان ڇنڇر ڏينهن آبدوز کي رواني ڪرڻ جي تصديق ڪئي آهي. اهو قدم تازي ڇڪتاڻ کي نظر ۾ رکندي کنيون ويو آهي، جنهن ڇڪتاڻ جو ڪارڻ ايران ٻڌايو ٿو وڃي. آمريڪي بحريه ڪڏهن به پنهنجي آبدوز جو اتو پتو نه ڏيندي آهي.
خليجي رياست بحرين ۾ تعينات پنجين آمريڪي سامونڊي ٻيڙي جي ڪمانڊر ٽموٿي هاڪنز جوهري آبدوز جي مشن ۽ تعيناتيءَ جو سبب بيان نه ڪيو آهي.
هن ٻڌايو ته آمريڪي رياست جارجيا جي ڪنگز بي تي لنگرانداز ايٽمي آبدوز کي روانو ڪيو ويو آهي جيڪا جمعي جي ڏينهن سويز ڪينال ٽپي وئي آهي.
هاڪنز جي چواڻي، آبدوز زمين تي حملي جي صلاحيت وارا 154 ٽام هاڪ ميزائيل کڻي وڃڻ جي صلاحيت رکي ٿي ۽ خطي جي آبي سلامتي ۽ استحڪام ۾ مدد ڏيڻ جي لاءِ آمريڪي ’ففٿ فليٽ’ سان گڏ تعينات ڪئي ويندي آهي.
پنجون سامونڊي ٻيڙو هرمز جي سوڙهي لنگهه واري علائقي ۾ گشت تي لڳل آهي، جيڪو خليج فارس جي چوٽيءَ کان ٿيندو آبناءِ مان گزرندو آهي. آبناءِ هرمز منجهان دنيا جو 20 سيڪڙو تيل جي آمد رفت جو واهپو ٿيندو آهي.
آمريڪا، برطانيه ۽ اسرائيل الزام لڳائيندا رهيا آهن ته تازن ورهن دوران ايران جي پاران تيل جي سامونڊي ٽينڪرن ۽ واپارا جي غرض سال هلندڙ سامونڊي جهازن کي نشانو بڻايو ويندو آهي. ليڪن، ايران انهن الزامن جي ترديد ڪندو رهيو آهي.
آمريڪي سامونڊي فوج سان ڇڪتاڻ ۽ ڪيترا ئي ڀيرا هڪ ٻئي جي آمهون سامهون اچڻ جا اطلاع ملندا رهيا آهن، جنهن جي لاءِ، سندس چوڻ آهي ته اهي تمام زورآوريءَ وارا واقعا هيا.
گزريل سال شام جي اتر اوڀر جي علائقي ۾ ايران جي پاران ڪيل راڪيٽ حملي ۾ هڪ آمريڪي ڪنٽريڪر مارجي ويو هو ۽ ٻيا ست ڄڻا آمريڪي زخمي ٿيا هيا، جنهن تي آمريڪا جوابي ڪاروائي ڪندي شام ۾ ايراني حمايت واري فوج تي فضائي حملا ڪيا هيا.
سامونڊي جهاز يا آبدوز منجهان هلايل ’ٽام هاڪ ڪروز ميزائيل’ 2500 ڪلوميٽر جي فاصلي تائين هدف کي نشانو بڻائڻ جي صلاحيت رکن ٿا.
سال 2003 ۾ جڏهن آمريڪا جي اڳواڻيءَ ۾ عراق تي حملو ڪيو ويو هو، ان لڙائيءَ جي شروعاتي ڏينهن دوران ۽ 2018 ۾ شام ۾ ڪيميائي هٿيارين جي استعمال جي اطلاعن کان پوءِ ٽام هاڪ ڪروز ميزائيل استعمال ڪيا ويا هيا.
(هن رپورٽ ۾ شامل مواد خبرن جي اداري، ’ايسو سي ايٽڊ پريس’ تان ورتو ويو آهي)
