اسرائيلي فوج جمعي جي ڏينھن لبنان ۽ غزه تي جيٽ جهازن سان بمباري ڪئي. اهي حملا مسجد اقصيٰ ۾ گذريل ٻن ڏينهن دوران ٿيندڙ پُرتشدد ڪاررواين کانپوءِ ڪيا ويا آهن.
اسرائيل جو چوڻ آهي ته هُن اِھي هوائي حملا لبنان ۽ غزه پاران اسرائيل تي ٿيندڙ راڪيٽ حملن جي جواب ۾ ڪيا آھن.
اسرائيلي فوج موجب سندن جيٽ جهازن جمعي جي صبح جو حماس جي هٿيارن جي ڪارخانن تي حملو ڪيو، ۽ جهازن کي نشانو بنائيندڙ مشين گن کي به تباه ڪيو.
اسرائيلي فوج جي فضائي آپريشن دوران غزه ۾ ڌماڪا ٻڌڻ ۾ ايندا رھيا. غزه کان به اسرائيل ڏانھن راڪيٽ فائر ڪيا ويا. ان دوران اسرائيل جي پسگردائي وارن شهرن ۾ سائرن وڄندا رهيا، جڏهن ته راڪيٽ حملن ۾ ڪنهن جاني نقصان جو اطلاع نه مليو آھي.
حماس هڪ بيان ۾ چيو ته "اسان صهيوني (يھودي) قبضي کي هن اشتعال انگيزي ۽ غزه ۾ ڪاروائي جو ذميوار قرار ڏيون ٿا".
اسرائيلي وزيراعظم بن يامين نيتن ياهو جو چوڻ آهي ته اسرائيلي جوابي ڪاروائي سبب ملڪ جي دشمنن کي وڏي قيمت ادا ڪرڻي پوندي.
اسرائيل جي لبنان تي بمباري
اسرائيلي فوج جمعي ڏينھن صبح جو غزه سان گڏ لبنان جي ڏاکڻي علائقي تي پڻ جيٽ جهازن سان بمباري ڪئي.
ڏکڻ لبنان ۾ رشيديه ڪيمپ ۾ رهندڙ فلسطيني مھاجرن جو چوڻ آهي ته ھنن ٽن وڏن ڌماڪن جا آواز ٻڌا.
اسرائيلي فوج دعويٰ ڪئي آهي ته خميس تي لبنان مان 34 راڪيٽ فائر ڪيا ويا، جن مان 25 کي فضائي دفائي نظام ’آئرن ڊوم’ ذريعي ڪيرايو ويو، جڏهن ته اسرائيلي علائقي ۾ ڪرندڙ پنج راڪيٽن جي باري ۾ اڃا جانچ ڪئي پئي وڃي.
اسرائيلي اختيار وارن لبنان مان فائر ٿيندڙ راڪيٽن جو الزام فلسطين جي هٿياربند تنظيم حماس تي لڳايو آهي.
لبناني وزيراعظم نجيب ميڪاتي پنهنجي ملڪ مان ڪنهن به اھڙي حملي جي مذمت ڪئي آهي جنهن سان خطي جي سلامتي خطري ۾ پئجي وڃي، جڏهن ته حزب الله پاران اڃا تائين ڪوبه تبصرو سامھون نه آيو آهي.
اسرائيل تي راڪيٽ حملن کان اڳ حزب الله جي هڪ عملدار هاشم سيف الدين هڪ بيان ۾ چيو هو ته مسجد اقصيٰ ۾ ڪنهن به قسم جي تبديلي علائقي ۾ باهه ٻارڻ جو سبب بڻجي سگهي ٿي.
واضح رهي ته اسرائيلي پوليس اربع ڏينهن مسجد اقصيٰ ۾ ٻه ڀيرا ڪاروائي ڪئي ھئي، جنهن دوران ھنن مسجد جي اندر اسٽن گرنيڊ پڻ اڇلايا. ان ڪاروائي جون ڪيتريون ئي وڊيوز سوشل ميڊيا تي وائرل به ٿيون.
اسرائيلي اختيارين دعويٰ ڪئي هئي ته مسجد ۾ ڪجهه نوجوانن طرفان رڪاوٽون لڳائڻ کان پوءِ پوليس اندر داخل ٿي.
مسجد الاقصيٰ جي واقعي بعد اسرائيل تي راڪيٽ حملن ۽ ان جي جوابي ڪارروائي کانپوءِ خطي ۾ هڪ ڀيرو ٻيهر ڇڪتاڻ وڌڻ جا خدشا آهن.
اسرائيل جي ملٽري انٽيلي جينس جي اڳوڻي سربراه تامير هيمين ٽوئيٽر تي لکيو ته جيتوڻيڪ اهي راڪيٽ حزب الله طرفان فائر نه ڪيا ويا پر ان ڳالھ تي يقين ڪرڻ ناممڪن آهي ته حزب الله کي انهن جي خبر نه هئي.
آمريڪا انهن راڪيٽ حملن جي مذمت ڪندي چيو آهي ته اسرائيل کي پنهنجي بچاء جو حق حاصل آهي. آمريڪا اسرائيل پاران مسجد اقصيٰ ۾ نمازين تي تشدد ڪرڻ تي پڻ ڳڻتي جو اظهار ڪيو آهي.
(هن خبر لاءِ مواد خبرن جي اداري 'رائٽرز' تان ورتو ويو آھي)
