مصر: اغوا شدہ طیارے سے بیشتر مسافر رہا

مصر کی قومی فضائی کمپنی ایجپٹ ایئر کے اغوا ہونے والے ایک طیارے کے بیشتر مسافروں کو قبرص میں طیارہ اترنے کے بعد رہا کرا لیا گیا ہے۔

ہائی جیکر طیارے کو استنبول لے جانا چاہتا تھا مگر طیارے میں طویل سفر کے لیے ایندھن موجود نہ ہونے کی وجہ سے اسے قبرص کے شہر لارنکا کے ایئرپورٹ پر اتار لیا گیا۔

قبرص کے حکام کا کہنا ہے کہ طیارے میں سوار بیشتر افراد کو رہا کر دیا گیا ہے اور وہ طیارے سے باہر آ گئے ہیں۔

مصری ایئرلائن کا طیارہ ساحلی شہر اسکندریہ سے دارالحکومت قاہرہ جاتے ہوئے اغوا ہوا۔

مصر کی قومی فضائی کمپنی کا کہنا ہے کہ چار غیر ملکی اور جہاز کا عملہ اغوا کیے جانے والے طیارے میں موجود ہیں۔

طیارے پر 26 غیرملکی سوار تھے جن میں آٹھ امریکی، چار برطانوی، چار ڈچ، دو بیلجیئین، ایک فرانسیسی، ایک اطالوی، دو یونانی اور ایک شامی شہری شامل ہیں۔

لارنکا ایئرپورٹ پر فضائی آپریشن معطل کر دیا گیا ہے اور اس طرف آنے والی پروازوں کا رخ دوسرے شہروں کی جانب موڑ دیا گیا ہے۔

مصر کے ہوا بازی کے حکام نے کہا کہ یہ طیارہ ایم ایس 181 ایئربس ہے۔