بھارت: کرونا سے اموات، قبرستانوں میں جگہ کم پڑنے لگی

نئی دہلی کے مضافات میں قائم جدید قبرستان میں جگہ کم پڑ جانے کے سبب قبریں باہری دیوار تک پہنچ چکی ہیں۔

قبرستان میں تدفین کے لیے آنے والے لواحقین میں سے بعض وبا سے محفوظ رہنے کی احتیاطی تدابیر پر عمل کرتے نظر آتے ہیں۔

محکمۂ صحت کے اعداد و شمار کے مطابق گزشتہ 24 گھنٹوں میں ملک بھر میں مزید دو لاکھ 34 ہزار سے زائد افراد کے وبا سے متاثر ہونے کی تصدیق ہوئی۔

قبرستان کے منتظمین میں شامل محمد شمیم کا کہنا ہے کہ تدفین کے لیے آنے والی لاشوں کو جگہ اور اسٹاف کی کمی کے سبب واپس بھیجنے پر مجبور ہیں۔

قبرستان کے منتظمین کا مزید کہنا ہے کہ جمعے کو تدفین کے لیے 19 لاشیں لائی گئیں تاہم وہ 15 لاشوں کی تدفین کر سکے۔

بھارت میں وبا سے ایک لاکھ 75 ہزار سے زائد افراد ہلاک ہو چکے ہیں۔

وبا کے سبب ہلاک ہونے والے افراد کو تابوتوں میں دفنایا جا رہا ہے۔ تاہم اطلاعات کے مطابق کئی لاشوں کی تدفین سادہ سفید چادر میں بھی کی گئی ہے۔

بھارت میں مسلسل کیسز میں اضافہ ہو رہا ہے جب کہ اموات کی شرح بھی بڑھ رہی ہے۔