ہیری اور ولیم کی موجودگی میں لیڈی ڈیانا کے مجسمے کی رونمائی

لیڈی ڈیانا کے مجسمے کی تقریب رونمائی لندن کے کنسنگٹن پیلس کے سنکن گارڈن میں ہوئی۔

شہزادی ڈیانا کی ساٹھویں سالگرہ نے شہزادہ ہیری اور ولیم کو قریب کر دیا۔ دونوں بھائیوں میں اختلافات اس وقت مزید بڑھ گئے تھے جب رواں برس مارچ میں امریکی ٹی وی میزبان اوپرا ونفری کو انٹرویو کے دوران ہیری نے شاہی محل پر تنقید کی تھی۔ 

لیڈی ڈیانا کے کانسی سے بنے مجسمے کے ساتھ ان کی دو بہنوں اور ایک بھائی کو بھی دیکھا جا سکتا ہے۔

لیڈی ڈیانا کی پسندیدہ جگہوں میں سے ایک سنکن گارڈن میں منعقد ہونے والی اس نجی تقریب میں شہزادہ ولیم اور ہیری شریک تھے۔

والدہ کے مجسمے کی رونمائی کے موقع پر دونوں بھائیوں کا کہنا تھا کہ " ہمیں والدہ کی محبت، طاقت اور کردار یاد ہے جس نے بہتری کے لیے بے شمار زندگیوں کو  بدل دیا۔"

شہزادہ ہیری اور ولیم کا کہنا تھا کہ ہر روز ہماری یہی خواہش ہوتی ہے کہ والدہ اب بھی ہمارے ساتھ ہوتیں اور ہمیں امید ہے کہ ان کا یہ مجسمہ ہمیشہ ان کی زندگی اور اس کی میراث کے طور پر دیکھا جائے گا۔

لیڈی ڈیانا کے اس مجسمے کو اسکلپچر آرٹسٹ ایئن رینک بروڈلی نے ڈیزائن کیا ہے۔

اس مجسمے کے نیچے لیڈی ڈیانا کا نام اور نقاب کشائی کی تاریخ بھی درج ہے۔

والدہ کے مجسمے کی تقریبِ رونمائی میں شہزادہ ہیری اور ولیم کو ایک دوسرے سے بات چیت کرتے ہوئے بھی دیکھا گیا۔

دونوں بھائیوں کے درمیان آخری مرتبہ ملاقات اپریل میں اپنے دادا شہزادہ فلپ کی آخری رسومات کے موقع پر ہوئی تھی۔

شہزادہ ہیری اور ولیم کی والدہ لیڈی ڈیانا 1997 میں 36 برس کی عمر میں ایک کار حادثے میں ہلاک ہو گئی تھیں۔