دنیا بھر کے مسلمان ملکوں اور دوسرے مقامات پر جمعے کے روز ہزاروں لوگوں نے غزہ کی پٹی میں فلسطینیوں کے ساتھ یک جہتی کے اظہار میں مظاہرے کیے ۔ انہو ں نے غزہ پر اسرائیل کی ناکہ بندی اور ان فضائی حملوں کے خاتمے کا مطالبہ کیا جو وہ عسکریت پسند گروپ حماس کے جنگجووں کی جانب سے جنوبی اسرائیل پر حملے کے بعد کر رہا ہے ۔
ادھر اٹلی کے شہر رو م سمیت کچھ اور شہروں کی یہودی برادریوں نے حماس کے ہاتھوں یرغمال بنائے گئے اسرائیلیوں کے ساتھ یک جہتی کے لیے تقاریب منعقد کیں۔
مغربی کنارے میں مظاہرین نے نماز جمعہ کے بعد اسرائیلی فوجی چیک پوائنٹس کی طرف مارچ کیا ۔ اسی طرح وہ عراق میں اردن کے ساتھ ملک کی سرحدی گزرگاہ پر ، اردن میں ، مصر بھر کے مختلف مقامات میں ، ترکی کے دار الحکومت انقرہ اور اس کے سب سے گنجان آباد شہر استنبول میں ، اور انڈو نیشیا ، ملائیشیا ،مراکش اور جنوبی افریقہ میں اکٹھے ہوئے ۔
غزہ: بے گھر فلسطینیوں کے لیے خیمہ بستی قائم
ان مظاہروں کی کچھ مزید تفصیلات یہ ہیں ۔
مغربی کنارہ
جمعے کے روز مقبوضہ مغربی کنارے کے اہم شہروں میں نماز جمعہ کے بعد مظاہرے پھوٹ پڑے ۔ فلسطینی مساجد سے امڈپڑے اور رملہ ، الخلیل ، اور بیت الحم میں اسرائیلی چیک پوائنٹس کی طرف بڑھے جہاں انہوں نے فوجیوں پر پتھراؤ کیا اور ٹائر جلائے ۔ اسرائیل سیکیورٹی فورسز نے جواب میں ان پر آنسو گیس پھینکی اور گولیاں چلائیں ۔
فلسطینی وزارت صحت نے رپورٹ دی ہے کہ فوجیوں کی گن فائرنگ میں 21 لوگ زخمی ہوئے ۔ سب سے زیادہ کشیدگی الخلیل میں ہوئی جہاں حماس کے سر گرم کارکنوں نے بڑے مظاہروں کی اپیل کی تھی۔
مصر:
مصر میں ہزاروں شہریوں نے غزہ میں فلسطینیوں کےساتھ اظہار یک جہتی کےلیے شمالی افریقہ کے اس پورے ملک کے شہروں اور قصبوں میں مظاہرے کیے ۔ ایک غیر معمولی اقدام میں مصری حکومت نے جمعے کو مظاہرین کو 27 مقامات پر اکٹھے ہونے کی اجازت دی اور انہیں ترتیب دینے تک میں مدد بھی کی ۔
مرکزی قاہرہ میں سینکڑوں لوگ قاہرہ کی مسجد الازہر کے احاطے میں اکٹھے ہوئے ۔ انہوں نے جمعے کی نماز کے بعد مسجد اقصی ٰ کے تحفظ کے حق میں نعرے لگائے ۔
بیسیوں مظاہرین تحریر چوک میں اکٹھے ہوئے جہاں احتجاج کی حکومت نے اجازت نہیں دی تھی۔ سیکیورٹی فورسز نے ان کے گرد گھیرا ڈالاہوا تھا۔ سرکاری ٹی وی نے ہر بڑے مصری شہر میں سرکاری مظاہروں کے مقامات سے مظاہرین کو پرچم لہراتے اور فلسطینیوں کے حق میں نعرے لگاتے ہوئے دکھایا ۔
لبنان:
جنوبی بیروت کے ایک مضافاتی علاقے میں لبنانی عسکریت پسند گروپ حزب اللہ کے درجنوں حامیوں اور دوسرے لوگوں نے غزہ کی ناکہ بندی ختم کرنے اور وہاں کے فلسطینیوں کی حمایت کا مطالبہ کرتے ہوئے مظاہرہ کیا ۔
حزب اللہ کے قانون ساز علی عمار نے کہا کہ ہم غزہ کے ہیروز، غزہ کے لوگوں ، بوڑھوں ، مردوں ، عورتوں اور بچوں کو سیلوٹ کرتے ہیں۔ مظاہرین نے حزب اللہ ، لبنانی اور فلسطینی پرچم لہراتے ہوئے ایک امریکی پرچم کو جلایا اور اسرائیل کے خلاف نعرے لگائے ۔
ترکیہ:
ترکیہ میں جہاں حکومت نے غزہ ہسپتال میں ایک دھماکے کے متاثرین کے ساتھ یک جہتی کے اظہار میں تین دن کے سوگ کا اعلان کیا تھا، ہزاروں لوگوں نے استنبول اور دار الحکومت انقرہ میں نماز جمعہ کے بعد مساجد کے باہر مظاہرے کیے ۔
استنبول میں اسلامی گروپس کے ساتھ منسلک مظاہرین نے ترک اور فلسطینی پرچم لہرائے ۔ انہو ں نے پلے کارڈ اٹھا ئے ہوئے تھے او ر وہ غزہ میں اسرائیل کی کارروائیوں کی مذمت میں نعرے لگا رہے تھے۔
کچھ پلے کارڈز پر لکھا تھا” قتل عام بند کرو ” اور” قاتل اسرائیل فلسطین سے نکل جاؤ۔” ڈاکٹروں کے خون آلود کوٹ پہنے ایک درجن مرد ہسپتال کے دھماکے پر احتجاج کرتے ہوئے شیر خوار بچوں کی لاشوں کے طور پر گڑیاں اٹھائے ہوئے تھے جب کہ کچھ مظاہرین نے اسرائیلی وزیر اعظم کے ایک پتلے اور ایک اسرائیلی پرچم کو نذر آتش کیا۔
اس ہفتے کے شروع میں ہونے والے مظاہروں کے برعکس جمعے کے مظاہروں میں تشدد کے کسی واقعے کی رپورٹ نہیں ملی۔
واشنگٹن ڈی سی: یہودی تنظیموں کی غزہ میں سیز فائر کے لیے ریلی
عراق:
عراق میں سینکڑوں مظاہرین اردن کے قریب مغربی تریبلی سرحدی گزر گاہ پر اس مظاہرے کے لیے اکٹھے ہوئے جسے ایران کی پشت پناہی کے حامل سیاسی گروپس اور عراق میں قائم ملیشیاؤں کے ایک اتحاد نے ترتیب دیا تھا۔
ایران نواز اتحاد نے بغداد میں انتہائی حفاظتی بین الاقوامی زون کی ایک مرکزی گیٹ کے قریب بھی ایک مظاہرے کی اپیل کی تھی جہا ں امریکی سفارت خانہ واقع ہے تاکہ اسرائیل اور حماس کے ساتھ جاری جنگ کی توثیق پر اس کی مذمت کی جا سکے
اردن:
حماس کے حامی مظاہرین کااردن کی سیکیورٹی فورسز کے ساتھ تصادم ہواا جنہوں نے انہیں مقبوضہ مغربی کنارے کے ساتھ واقع سرحد کی طرف مارچ سے روکا تھا اور پولیس نے کم از کم دو افراد کو گرفتار کیا۔ سرحد جانےوالی تمام سڑکیں بند تھیں اور چند ہزار لوگوں کو دار الحکومت عمان اور سرحد کےدرمیان ایک علاقے میں مظاہرے کی اجازت دی گئی تھی۔
مظاہرین نے حماس کے حق میں نعرے لگائے اور سرحد تک رسائی بند کرنے پر اردن کی حکومت کی مذمت کی۔ انہوں نے یہ مطالبہ بھی کیا کہ اسرائیل کے ساتھ تمام سفارتی تعلقات منقطع کر لیے جائیں اور اس کے سفیر کو اردن سے نکال دیا جائے۔
مراکش:
مراکش کے علاقے صالے میں مظاہرین نے، نماز کے بعد ایک مسجد کے باہر بینرز کے ساتھ فلسطینیوں کے حق میں نعرے لگائے۔
مظاہرین میں سے ایک نے کہا کہ اسے امید ہے کہ یہ پر امن اجتماع غزہ کے لوگوں کی مدد کرے گا۔ اس نے کہا ، ہم کم از کم یہ چاہتے ہیں کہ ان تک دوائیں پہنچ سکیں یا جنگ روک دی جائے ۔ اس نے کہا کہ فلسطینیوں کے حمایت میں مظاہروں کو تشد د کے بغیر اور قانون کے دائرے کے اندر کیا جانا چاہیے ۔
ملائیشیا اور انڈو نیشیا
ملائیشیا میں لگ بھگ ایک ہزار مسلمانوں نے نما ز جمعہ کے بعد کوالالمپور کی مصروف سڑکوں پر اسرائیل کو سرزنش اور غزہ میں ہلاکتیں بند کرنے کے مطالبے کرتے ہوئے مارچ کیا۔
انڈو نیشیا کے دار الحکومت جکارتہ میں مظاہرین نے اسرائیل کے لیے امریکی حمایت کی مذمت کے لیے کئی مساجد سے امریکی سفارت خانے تک مارچ کی۔
ایسے ہی مظاہرے سفارت خانے سے کچھ فاصلے پر واقع اقوام متحدہ کے مشن کے سامنے اور انڈو نیشیا کی وزارت خارجہ کے احاطے میں بھی ہوئے ۔
سفارت خانے اور قریب واقع صدارتی محل اور اقوام متحدہ کے مشن کے گرد لگ بھگ ایک ہزار پولیس اہلکار متعین تھے ۔
اٹلی
روم کی یہودی کمیونٹی نے دار الحکومت کے مرکزی سینیگاگ کے باہر ایک روائتی ڈنر ٹیبل پر ان لگ بھگ 203 لوگوں کو یاد کیا جن کے بارے میں خیال ہے کہ انہیں حماس نے یرغمال بنایا ہوا ہے ۔۔ میز کے سامنے ہر یرغمال کےلیے ایک خالی کرسی رکھی گئی تھی۔
ہر کرسی کے پیچھے ایک فلائر پر ہر لا پتہ شخص کا نام ، عمر اور فوٹو موجود تھا۔ میز پر موم بتیاں ، وائن اور جمعے کے ڈنر پر تناول کیے جانےوالے دوسرے روائتی کھانے رکھے گئے تھے ۔
روم کی یہودی کمیونٹی کے سر براہ وکٹر فدلون نے کہا کہ فلسطینی لوگ بھی مصیبت کا شکار ہیں اور حماس کے یرغمال ہیں ۔ اور ہمیں امید ہے کہ ہر ایک کے لیے کوئی مناسب حل سامنے آئے گا۔
جنوبی افریقہ
جنوبی افریقہ کی افریقی نیشنل کانگریس کی زیر قیادت فلسطینیوں کے حامی مظاہرین نے جمعے کے روز دار الحکومت پریٹوریا میں اسرائیلی سفارت خانے کے سامنے احتجاج کیا ۔
فلسطینی پرچم لہراتے ہوئے اور غزہ پر اسرائیل کی بمباری کی مذمت کے بینرز اٹھائے ایک ہزار سے زیادہ مظاہرین نے سڑکوں پر مارچ کرتے ہوئے ٹریفک کو مفلوج کر دیا۔جنوبی افریقہ میں یہ ایسا سب سے بڑا مظاہرہ تھا جہاں فلسطینی نصب العین کو مسلسل نمایاں حمایت حاصل رہی ہے ۔
اسی دوران جنوبی افریقہ کے صدر سیرل رامافوسا کے دفتر نے بتایا ہے کہ صدر ہفتے کو قاہرہ میں مصری صدر عبد ل فتح السیسی کی دعوت پر مصر میں امن پر ایک سر براہی اجلاس میں شرکت کریں گے ۔ اس اجلاس میں توقع ہے کہ اسرائیل اور غزہ میں جاری جنگ پر بات چیت ہوگی ۔
( اس رپورٹ کا مواد اے پی سے لیا گیا ہے۔)
فورم