انتخابات کی تیاریاں مکمل، ووٹنگ کا آغاز صبح آٹھ بجے ہو گا
پاکستان میں بارہویں عام انتخابات کے لیے الیکشن کمیشن کی تیاریاں مکمل ہیں اور اب سے کچھ دیر بعد یعنی صبح آٹھ بجے ووٹنگ کا آغاز ہو گا۔
پاکستان بھر کے قومی و صوبائی اسمبلیوں کے 855 حلقوں پر انتخابات ہوں گے اور 12 کروڑ سے زائد رجسٹرڈ ووٹر اپنا حقِ رائے دہی استعمال کر سکیں گے۔
استحکامِ پاکستان کے لیے آزادانہ و منصفانہ انتخابات ضروری ہیں: امریکی رکنِ کانگریس شیلا جیکسن
پاکستان کے پارلیمانی انتخابات کو امریکہ میں بھی بڑی توجہ اور دلچسپی سے دیکھا جا رہا ہے، کیونکہ جنوبی ایشیا کا ایک اہم اور جوہری قوت کا حامل ملک ہونے کے ساتھ ساتھ امریکہ کے ساتھ اس کے تعلقات کی طویل تاریخ ہے، جس میں اتار چڑھاؤ آتے رہے ہیں۔
پاکستان کے انتخابات کے بارے میں وی او اے اردو سروس نے امریکی کانگریس کے دو ارکان سے بات کی۔ دونوں کا کہنا ہے کہ جمہوریت کے استحکام اور ترقی کے لیے انتخابات منصفانہ اور آزادانہ ہونے چاہیئں۔
امریکی رکن کانگریس وومن شیلا جیکس لی نے،جو امریکی ایوان نمائندگان میں پاکستان کاکس کی بانی اور چیئر ہیں کہا ہے کہ پاکستان میں آٹھ فروری کو آزادانہ انتخابات ہونے چاہئیں۔ ان کا کہنا تھا کہ پاکستان جیسے بڑے ملک کے لیے، ایک ایسے مسلمان ملک کے لیے جو پاکستان جتنا بڑا ہو، آزادانہ انتخابات کا ہونا ضروری ہے تاکہ وہاں جمہوری حکومت قائم ہو ۔
امریکی رکن کانگریس کا کہنا تھا کہ میں نے پاکستان کی موجودہ اور (سابقہ ) اتحادی حکومت کے ساتھ اور امریکہ میں اور پوری دنیا میں مقیم پاکستانیوں سے بات چیت کی ہے، اور ہم بہترین کی امید کر رہے ہیں۔
اس سوال پر کہ پاکستان کے کئی سیاسی رہنماؤں اور ایمنسٹی انٹرنیشنل نے قبل از انتخابات تشدد پر گہری تشویش کا اظہار کیا ہے، کیا امریکہ کو بھی پاکستان میں انتخابات سے قبل ہونے والے تشدد کے بعض واقعات پر تشویش ہے؟
کتنے حلقوں پر پولنگ ہوگی؟
پاکستان کے بارہویں انتخابات کے سلسلے میں جمعرات کو ملک بھر کے مجموعی طور پر 855 قومی و صوبائی نشستوں پر انتخابات ہو رہے ہیں۔
قومی اسمبلی کی 266 میں سے 265 نشستوں پر آج پولنگ ہو گی جب کہ پنجاب اسمبلی کی 297 میں سے 296، سندھ اسمبلی کی 130، خیبر پختونخوا اسمبلی کی 115 میں سے 113 اور بلوچستان اسمبلی کی 61 جنرل نشستوں پر ووٹنگ ہو گی۔
واضح رہے کہ امیدواروں کے انتقال کی وجہ سے قومی اسمبلی کے حلقہ این اے 08 باجوڑ، پنجاب اسمبلی کے حلقہ پی پی 266 رحیم یار خان، خیبر پختونخوا اسمبلی کے حلقہ پی کے 22 باجوڑ اور پی کے 91 کوہاٹ کی نشستوں پر انتخابات نہیں ہو رہے۔
قومی و صوبائی اسمبلیوں کے انتخابات میں مجموعی طور پر 17 ہزار 800 سے زیادہ امیدوار میدان میں ہیں جن میں 16 ہزار 930 مرد، 882خواتین اور چارخواجہ سرا شامل ہیں۔