عمران خان کی حکومت گرانے میں امریکی مداخلت کا الزام بالکل غلط تھا: ڈونلڈ لو کی امریکی کانگریس میں گواہی

بلوچستان کے وزیر اعلیٰ میر سرفراز بگٹی کے مطابق گوادر پورٹ اتھارٹی (جی پی اے) پر دہشت گردوں نے حملہ کیا تھا۔ سیکیورٹی فورسز کی کارروائی میں آٹھ دہشت گرد ہلاک ہوئے ہیں۔ ان کا ایک بیان میں کہنا تھا کہ بلوچستان سے دہشت گردی کا قلع قمع کریں گے۔ وزیراعلیٰ میر سرفراز بگٹی نے یہ واضح نہیں کیا کہ اس کارروائی میں فورسز یا عام شہریوں کا کسی قسم کا نقصان ہوا ہے یا نہیں۔

پاکستان کے صوبہ بلوچستان کے ساحلی شہر گوادر کی بندرگاہ پر واقع پورٹ کمپلیکس میں نامعلوم مسلح افراد کے حملے کے بعد فائرنگ کا سلسلہ جاری ہے۔

اطلاعات کے مطابق کمپلیکس میں مسلح افراد نے گھسنے کی کوشش کی ہے۔ اس دوران شدید فائرنگ کی آوازیں بھی سنی جا رہی ہیں۔ مقامی میڈیا کے مطابق سیکیورٹی اداروں کے اضافی اہلکار اس مقام پر پہنچ گئے ہیں اور وہ حملہ آوروں کا مقابلہ کر رہے ہیں۔ اس حملے کے حوالے سے سرکاری طور پر مزید کوئی بیان سامنے نہیں آیا۔

وزارتِ قانون نے مظاہر نقوی کی بطور سپریم کورٹ جج برطرفی کا نوٹیفکیشن جاری کردیا۔

مظاہر علی اکبر نقوی کو سپریم جوڈیشل کونسل کی رائے کے نتیجے میں برطرف کیا گیا۔ سپریم جوڈیشل کونسل نے مظاہر نقوی کو مس کنڈکٹ کا مرتکب قرار دیا تھا۔
وزارتِ قانون کے نوٹیفکیشن کے مطابق مظاہر نقوی کی برطرفی 10 جنوری 2024 سے ہوگی۔

اسلام آباد ہائی کورٹ نے ڈپٹی کمشنر عرفان نواز میمن، ایس ایس پی آپریشنز جمیل ظفر اور ایس ایچ او ناصر منظور کی سزا معطل کردی۔

اسلام آباد ہائی کورٹ کے چیف جسٹس عامر فاروق اور جسٹس میاں گل حسن اورنگزیب پر مشتمل دو رکنی بینچ نے توہینِ عدالت کیس میں سزا کے خلاف اپیل پر سماعت کی۔

عدالت نے ڈپٹی کمشنر عرفان نواز میمن، ایس ایس پی آپریشنز جمیل ظفر اور ایس ایچ او ناصر منظور کو توہین عدالت کیس میں جسٹس بابر ستار کی طرف سے دی جانے والی سزا معطل کردی۔

واضح رہے کہ تحریکِ انصاف (پی ٹی آئی) کے رہنما شہریار آفریدی کی گرفتاری کے معاملے پر جسٹس بابر ستار نے ڈپٹی کمشنر اسلام آباد، ایس ایس پی آپریشن اور تھانہ مارگلہ کے ایس ایچ او کو توہینِ عدالت کا مرتکب قرار دیتے ہوئے قید و جرمانے کی سزا سنائی تھی۔