شیخ حسینہ استعفے کے بعد بھارت میں موجود؛ ڈھاکہ میں صورتِ حال بدستورہ کشیدہ

بنگلہ دیش کے آرمی چیف نے شیخ حسینہ کے استعفے کے پس منظر میں سیاسی جماعتوں کے نمائندوں سے ملاقات کی ہے۔

بنگلہ دیش کی فوج کے شعبۂ تعلقاتِ عامہ آئی ایس پی آر کے مطابق آرمی چیف وقارالزمان اور سیاسی جماعتوں کے نمائندوں کے درمیان آرمی ہیڈ کوارٹر میں اجلاس منعقد ہوا ہے۔

آئی ایس پی آر کا کہنا ہے کہ اجلاس میں عبوری حکومت کے قیام سے متعلق امور زیرِ بحث آئے ہیں۔ عبوری حکومت سے متعلق ہونے والے فیصلوں سے جلد صدر محمد شہاب الدین کو آگاہ کردیا جائے گا۔

اجلاس میں بی این پی، جماعتِ اسلامی سمیت مختلف سیاسی جماعتوں کے رہنما شریک ہوئے ہیں۔

شعبۂ تعلقاتِ عامہ کے مطابق آرمی چیف جلد عبوری حکومت کی تشکیل کے لیے جلد طلبہ اور اساتذہ کے نمائندوں سے بھی ملاقاتیں کریں گے۔