امریکی صدارتی مباحثہ: بائیڈن اور ٹرمپ کی ایک دوسرے کی پالیسیوں پر تنقید

صدارتی مباحثے میں جو بائیڈن اور ڈونلڈ ٹرمپ دونوں نے کئی حقائق اور اعداد و شمار کو درست انداز میں پیش نہیں کیا۔

بائیڈن نے مباحثے کے آغاز میں ہی دعویٰ کیا کہ انہوں نے 15 ہزار ملازمت کے مواقع پیدا کیے۔ جب کہ درست نمبر ڈیڑھ کروڑ تھا۔

اس کے علاوہ بائیڈن نے کہا کہ ایک انسولین شاٹ کی قیمت 400 ڈالر کے مقابلے میں 15 ڈالر ہے۔ جب کہ میڈی کیئر حاصل کرنے والے عمر رسیدہ امریکیوں کے لیے انسولین کی قیمت 35 ڈالر تھی۔ قیمت میں یہ کمی جو بائیڈن کی جانب سے 2022 میں مہنگائی میں کمی کے لیے کی گئی قانون سازی کے بعد ہوئی تھی۔

ٹرمپ نے کہا کہ امریکی معیشت اس قابل ہوگئی تھی کہ ہم وبا سے قبل اپنے قومی قرضے ادا کرنے والے تھے۔ لیکن یہ دعویٰ درست نہیں ہے۔ ٹرمپ کے دور میں بجٹ خسارہ بڑھا کیوں کہ انہوں نے 2017 میں جو ٹیکس کٹوتیاں کی تھی ان کی ادائیگیاں نہیں ہوسکیں۔

ٹرمپ کو بجٹ کا 585 ارب ڈالر کا خسارہ ورثے میں ملا تھا جو 2019 میں بڑھ کر 984 ارب ڈالر ہوگیا تھا۔ وائٹ ہاؤس آف مینجمنٹ اینڈ بجٹ کے مطابق وبا کے بعد 2020 میں یہ خسارہ تین ٹریلین ڈالر تک پہنچ گیا تھا۔

ٹرمپ نے یہ دعویٰ بھی کیا تھا کہ ’لاکھوں‘ لوگوں کو قیدخانوں اور ذہنی صحت کے مراکز سےملک میں آںے دیا گیا۔ اس دعوے کا کوئی ثبوت دستیاب نہیں ہے۔

اسقاطِ حمل سے متعلق سوال پر صدر جو بائیڈن نے ریاستوں کی جانب سے اسقاطِ حمل پر پابندیوں کا ذمے دار سابق صدر ٹرمپ کو قرار دیا۔

بائیڈن نے اسقاطِ حمل سے متعلق مشہور زمانہ رو بنام ویڈ فیصلے کو کالعدم قرار دیے جانے اور امریکہ میں حاملہ افراد پر اس کے اثرات سے متعلق ٹرمپ کے تعلق کی نشاندہی کی۔

صدر بائیڈن نے خبردار کیا کہ اگر ٹرمپ دوسری مدت کے لیے صدر بنے تو ملک بھر میں اسقاطِ حمل پر مزید پابندیاں لگ سکتی ہیں۔

سابق صدر ڈونلڈ ٹرمپ جواب دیتے ہوئے کہا کہ اگر وہ صدر منتخب ہوئے تو وہ اسقاطِ حمل کی دواؤں تک رسائی نہیں روکیں گے۔ انہوں نے اپنے اس مؤقف کو دہرایا کہ اسقاطِ حمل سے متعلق قوانین ریاستوں پر چھوڑ دینے چاہئیں۔

اس پر صدر بائیڈن نے جواب دیا کہ اسقاطِ حمل کا معاملہ ریاستوں پر چھوڑ دینا ایسا ہی ہے جیسے انہیں شہری حقوق کے تحفظ کا اختیار سونپ دیا جائے۔

سابق صدر ڈونلڈ ٹرمپ نے شکوہ کیا کہ امریکہ پہنچنے والے مہاجرین کو 'لگژری ہوٹلز'میں ٹھہرایا گیا ہے جب کہ سابق فوجی سڑکوں پر رہ رہے ہیں۔

توقع کے مطابق ٹرمپ نے مہاجرین کے جرائم پر بہت زیادہ زور دیا۔ انہوں نے یہ بھی کہا کہ مہاجرین 'ذہنی صحت کے اداروں' اور 'پاگل خانوں' سے غیر قانونی طور پر امریکہ آ رہے ہیں۔ تاہم انہوں نے اس دعوے کے لیے کوئی ثبوت فراہم نہیں کیا ہے۔ وہ یہ دعویٰ اپنی انتخابی ریلیوں میں بھی دہراتے رہے ہیں۔

ٹرمپ نے یہ بھی کہا کہ ان کے دورِ حکومت میں 'سرحدیں تاریخ میں سب سے زیادہ محفوظ تھیں۔' اس دعوے پر بھی بے انتہا سوالات اٹھتے رہے ہیں۔

صدر بائیڈن نے امیگریشن سے متعلق اپنے نکات پر اصرار کیا اور کہا کہ انہوں نے اسائلم کو معطل کرنے کا انتظامی حکم جاری کیا جس کے بعد غیر قانونی تارکینِ وطن میں 40 فی صد کمی آئی ہے۔

سابق صدر ڈونلڈ ٹرمپ نے افغانستان سے امریکی فوج کے انخلا کو امریکہ کی تاریخ کا سب سے شرم ناک دن قرار دیا۔ ٹرمپ نے کہا کہ "ہم افغانستان سے نکل رہے تھے۔ لیکن ہم عزت، قوت اور طاقت کے ساتھ نکل رہے تھے۔"

صدر بائیڈن نے اس کا جواب دیتے ہوئے کہا کہ جب ٹرمپ صدر تھے تو اس وقت بھی افغانستان میں لوگ مر رہے تھے۔ انہوں نے اس بارے میں کچھ نہیں کیا۔