بھارت کے دارالحکومت دہلی میں 8 ماہ کی ایک بچی کو جنسی زیادتی کا نشانہ بننے کے بعد تشویش ناک حالت میں اسپتال داخل کرا دیا گیا ہے۔
پریس ٹرسٹ آف انڈیا کی ایک رپورٹ میں کہا گیا ہے کہ بچی کے 27 سالہ کزن کو بچوں کو جنسی تشدد سے تحفظ کے ایکٹ کے تحت حراست میں لے لیا گیا ہے۔
رپورٹ کے مطابق ، بچی کے والدین جب اتوار کے روز اپنی ملازمت کے بعد گھر پہنچے تو ان کی بچی خون میں لت پت تھی جسے وہ فوری طور پر اسپتال لے گئے جہاں اس کا تین گھنٹوں تک آپریشن ہوا۔
اسپتال ذرائع کا کہنا ہے کہ بچی انتہائی نگہداشت کے وارڈ میں ہے، تاہم اس کی حالت اب خطرے سے باہر ہے۔
خواتین کے حقوق کی ایک تنظیم’ دہلی کمشن فار وومن‘کی سربراہ سواتی ملیوال نے اسپتال میں بچی کو دیکھنے کے بعد اپنے ایک ٹویٹ میں کہاہے کہ یہ ایک بدترین واقعہ ہے۔ 8 ماہ کی ایک بچی پر سفاکانہ جنسی حملہ کیا گیا اور وہ اسپتال میں زندگی اور موت کی کشمکش میں ہے۔
اسپتال ذرائع کا کہنا ہے کہ بچی کو اتوار کی شام انتہائی تشویش ناک حالت میں اسپتال لایا گیا تھا۔
پولیس نے بتایا کہ یہ واقعہ دہلی کے مغربی حصے سبھاش نگر میں اس وقت پیش آیا جب بچی کی ماں اور باپ دونوں اپنی ملازمت کے سلسلے میں گھر سے باہر تھے۔
بچی کے والد نے پولیس کو بتایا کہ ہم دونوں میاں بیوی نے کام پر جاتے وقت اپنی بچی کو اسی عمارت میں اپنے ایک رشتے دار کے پاس چھوڑ دیا۔
بچی کی ماں جو لوگوں کے گھروں میں جا کر کرتی ہیں، جب واپس آئیں تو بچی خون سے لت پت تھی اور درد کی شدت سے چیخ رہی تھی۔
بچی کے والدین نے پولیس کو بتایا کہ انہیں بچی کے 27 سالہ کزن پر شبہ ہے جو موقع سے غائب تھا۔ پولیس نے کئی گھنٹوں کے بعد اسے گرفتار کر لیا جس نے تفتیش کے دوران جرم کا إقرار کر لیا۔
اس سے قبل دہلی میں سن 2012 میں ایک نوجوان طالبہ کے ساتھ چلتی بس میں گینگ ریپ کے بعد سڑک پر پھینکنے کا بدترین واقعہ پیش آیا تھا ۔ طالبہ کئی دنوں تک اسپتال میں زیر علاج رہنے کے بعد ہلاک ہوگئی تھی، جس پر صرف بھارت میں ہی نہیں بلکہ دنیا بھر میں خواتین کے حقوق کے لیے کام کرنے والی تنظیموں نے احتجاجي مظاہرے لیے تھے۔
حالیہ برسوں میں دہلی میں خواتین اور لڑکیوں کے ساتھ جنسی زیادتی کے کئی واقعات پیش آ چکے ہیں۔
کچھ عرصہ پہلے دہلی کے نواحی علاقے ہریانہ میں 15 اور 11 سال کی دو لڑکیوں کو جنسی زیادتی کا نشانہ بنانے کے بعد تشدد کر کے قتل کر دیا گیا تھا۔
