صدر ٹرمپ نے حلف اٹھالیا، امریکہ کو دوبارہ 'عظیم' بنانے کا اعلان

امریکہ کے سابق نائب صدر مائیک پینس بھی منتخب صدر ڈونلڈ ٹرمپ کی حلف برداری کی تقریب میں شریک ہوں گے۔

پہلی مدت کے اختتام پر انتخابی نتائج کی توثیق کے معاملے پر صدر ٹرمپ اور مائیک پینس کے تعلقات خراب ہو گئے تھے۔

''ایکس' پر اپنی پوسٹ میں مائیک پینس کا کہنا تھا کہ آج وہ دن ہے جب امریکی شہری جمہوریت اور اقتدار کی پرامن منتقلی کا جشن مناتے ہیں۔

اُن کا کہنا تھا کہ "ہم اپنے تمام ساتھی امریکیوں کی حوصلہ افزائی کرتے ہیں کہ وہ صدر ٹرمپ اور نائب صدر وینس کے لیے دعا کرنے کے لیے ہمارے ساتھ شامل ہوں کیوں کہ وہ اس عظیم قوم کی قیادت کی زبردست ذمہ داری سنبھال رہے ہیں۔"

سبک دوش ہونے والے امریکی صدر جو بائیڈن نے کہا ہے کہ اُنہوں نے منتخب صدر ڈونلڈ ٹرمپ کے نام خط لکھا ہے۔

امریکہ میں یہ بھی روایت ہے کہ سبک دوش ہونے والا صدر آنے والے صدر کے نام ایک خط لکھتا ہے جو وائٹ ہاؤس کے اوول آفس کے دراز میں رکھا جاتا ہے۔

خبر رساں ادارے 'ایسوسی ایٹڈ پریس' کے مطابق صدر بائیڈن نے یہ نہیں بتایا کہ اُنہوں نے خط میں کیا لکھا ہے۔ ڈونلڈ ٹرمپ نے بھی چار سال قبل صدارت سے سبک دوش ہونے سے قبل جو بائیڈن کے نام خط لکھا تھا۔

مزید تفصیلات دیکھیے اس ویڈیو میں۔۔

امریکہ کے منتخب صدر ڈونلڈ ٹرمپ اپنی اہلیہ میلانیا ٹرمپ کے ہمراہ وائٹ ہاؤس پہنچ گئے ہیں۔ سبک دوش ہونےو الے صدر جو بائیڈن اور اُن کی اہلیہ نے استقبال کیا۔

ڈونلڈ ٹرمپ اور اُن کی اہلیہ وائٹ ہاؤس میں جو بائیڈن اور اُن کی اہلیہ جل بائیڈن سے چائے پر ملاقات کریں گے جس کے بعد وہ حلف برداری کے لیے کیپٹل ہل جائیں گے۔

امریکہ کے منتخب صدر سینٹ جونز چرچ میں سروس میں شرکت کے بعد وائٹ ہاؤس کے لیے روانہ ہو گئے ہیں۔ جہاں صدر جو بائیڈن اور اُن کی اہلیہ منتخب صدر اور اُن کی اہلیہ میلانیا ٹرمپ کا استقبال کریں گی۔

ڈونلڈ ٹرمپ اور اُن کی اہلیہ سبک دوش ہونے والے صدر جو بائیڈن اور اُن کی اہلیہ کے ساتھ چائے پر ملاقات کریں گے جس کے بعد وہ کیپٹل ہل کے لیے روانہ ہوں گے۔