لبنان میں حزب اللہ کے خلاف کارروائی، اسرائیل نے جنگ بندی کی تجویز مسترد کر دی

اسرائیل کے جنوب میں ساحلی شہر ایلات پر بدھ کی شب ڈرون حملہ کیا گیا ہے۔

اسرائیلی فوج کے مطابق نیوی نے ڈرون کی نشان دہی کر لی تھی۔

ریسکیو اہلکاروں کے مطابق زمین پر دو افراد زخمی ہوئے ہیں۔ ان کو معمولی چوٹیں آئی ہیں۔

مقامی میڈیا پر چلنے والی ویڈیوز میں نظر آ رہا ہے کہ بندرگاہ کے قریب ایک عمارت سے دھواں اٹھ رہا ہے۔

فوج کا کہنا ہے کہ یہ ڈرون مشرق کی جانب سے آیا تھا۔

دوسری جانب عراق کی عسکری تنظیم ’اسلامی مزاحمت‘ نے ایک بیان میں دعویٰ کیا ہے کہ اس نے اسرائیل کے ساحلی شہر پر ڈرون حملہ کیا ہے۔

اسلامی مزاحمت کی جانب سے پہلے بھی متعدد بار اسرائیل پر ڈرون حملوں کی دعویٰ کیا جاتا رہا ہے۔

لبنان میں فرانس کے سفارت خانے نے ایک بیان میں کہا ہے کہ فرانس کا ایک 87 سالہ شہری ساحلی شہر صور میں ایک عمارت منہدم ہونے سے ہلاک ہو گیا ہے۔

بیان کے مطابق اس شخص کی ہلاکت پیر کو اس وقت ہوئی جب ان کی عمارت کے قریب ایک زور دار دھماکہ ہوا تھا۔

امریکہ کے محکمۂ دفاع (پینٹاگان) نے بدھ کو کہا ہے کہ اسرائیل کے لبنان میں جاری آپریشن میں امریکہ انٹیلی جینس سپورٹ فراہم نہیں کر رہا۔

پینٹاگان کی نائب ترجمان سبرینا سنگھ نے بھی کہا ہے کہ اسرائیل کی لبنان میں زمینی کارروائی کے امکانات نظر نہیں آ رہے۔

جب ان سے سوال کیا گیا کہ کیا امریکہ اسرائیل کے لبنان میں آرپریشن میں کسی قسم کی مدد کر رہا ہے جس میں انٹیلی جینس سپورٹ بھی شامل ہے؟

تو اس سوال کے جواب میں سبرینا سنگھ نے کہا کہ نہیں کوئی مدد نہیں کی جا رہی۔

لبنان کے وزیرِ اعظم نجیب میکاتی نے لبنانی اور اسرائیلی سرحد پر 21 روزہ جنگ بندی کے عالمی مطالبے کو خوش آئند قرار دیا ہے۔

خبر رساں ادارے ’رائٹرز‘ کے مطابق جب ان سے سوال کیا گیا کہ کیا جنگ بندی کا معاہدہ ہو سکتا ہے؟ تو ان کا کہنا تھا کہ بالکل، اس کی امید ہے۔

نجیب میقاتی کا کہنا تھا کہ جنگ بندی معاہدے کی کامیابی کا امکان اسرائیل کے بین الاقوامی معاہدوں پر عمل درآمد پر ہے جو اس وقت اپنی افواج لبنان کی سرحد پر منتقل کر رہا ہے۔