آمريڪا جي اٽارني جنرل ميرڪ گارلينڊ ٻڌايو آهي ته وفاقي ايجنٽن خميس ڏينهن نيشنل گارڊ جي هڪ ڪارڪن کي حراست ۾ ورتو آهي.
هن کي تمام گهڻي ڪلاسي فائيڊ ملٽري دستاويزن جي ليڪ ٿيڻ جي ڪيس ۾ ’پرسن آف انٽريسٽ’ طور ڏٺو پيو وڃي.
ڇنڊ ڇاڻ ڪرڻ وارن عمل دارن چيو آهي ته گرفتار سيڪيورٽي اهل ڪار انٽيلي جينس معاملن ۾ مهارت رکندڙ آهي ۽ هن ’آن لائين چيٽ گروپس’ ۾ دستاويز شائع ڪيا هيا.
اٽارني جنرل گرفتار ٿيل فرد جي سڃاڻپ جيڪ ڊگلس ٽيڪشيرا نالي سان ڪئي آهي.
هن جي خلاف قومي بچاءَ متعلق ڪلاسي فائيڊ معلومات کي غير قانوني طور تي کڻڻ ۽ پاڻ وٽ رکڻ جو الزام مڙهيو ويو آهي.
هو ايئر فورس نيشنل گارڊ جو ملازم ٻڌايو ٿو وڃي.
تازي ترين ليڪس ۾ يوڪرين جي جنگ ۽ قومي سلامتيءَ جي ٻين اهم معاملن جي متعلق تمام گهڻي ڪلاسي فائيڊ ڄاڻ ليڪ ٿيون آهن، ۽ انهن جي ڪري حساس قومي رازن جي تحفظ جي اهليت تي سوال کڙا ٿيا آهن.
جيڪ ٽيڪشيرا جي عمر 21 سال آهي. هو گارڊ مين آهي، جنهن کي ايف بي آئي جي ايجنٽن سندس گهر مان حراست ۾ ورتو.
ان موقعي تي ڪنهن به قسم جو ڪو اڻ ٿيڻو واقعو پيش نه آيو.
اٽارني جنرل ميرڪ گارلينڊ ٻڌايو ته جيڪ ٽيڪشيرا تي جاسوسيءَ جي ايڪٽ هيٺ ڪيس درج ڪيو ويندو.
(خبر جي معلومات ايسو سي ايٽڊ پريس تان ورتي وئي آهي)
