جی سیون ممالک کی اسرائیل پر حملے کی مذمت ’متعصبانہ‘ ہے: ایران
ایران نے کہا ہے کہ اسرائیل پر اس کے حملے کی مذمت میں جاری کیا گیا جی سیون ممالک کا بیان ’متعصابانہ اور غیر ذمے دارانہ‘ ہے۔
وزارتِ خارجہ کے ترجمان کا کہنا ہے کہ جی سیون ممالک اور خاص طور پر امریکہ جارحیت کرنے والے فریق (اسرائیل) کی دفاعی، مالی اور سیاسی مدد کرنے کی پالیسی کی وجہ سے مغربی ایشیا میں عدم استحکام کے ذمے دار ہیں۔
ایران نے اسرائیل پر حملے کے خلاف احتجاج کے لیے جرمنی اور آسٹریا میں اپنے سفیر کی طلبی پر بھی ردِ عمل دیا ہے۔
ایرانی سرکاری میڈیا کے مطابق جمعرات کو تہران میں ان ملکوں کے سفیروں کو بھی جواباً طلب کیا گیا ہے۔
اسرائیل کی جنوبی لبنان میں مزید علاقے خالی کرنے کی وارننگ
اسرائیل نے جنوبی لبنان کے مزید دیہات اور قصبوں کو خالی کرنے کی وارننگ جاری کردی ہے۔
یہ دیہات اور قصبات 2006 کی جنگ کے بعد اقوام متحدہ کی جانب سے بفر زون قرار دیے گئے علاقے کے شمال میں ہیں۔
اس وارننگ کے بعد ممکنہ طور پر اسرائیل سرحدی علاقوں میں جاری اپنی کارروائیوں کا دائرہ وسیع کرکے انہیں جنوبی لبنان میں تک پھیلا سکتا ہے۔
اسرائیل کے حملے میں ایک لبنانی فوجی ہلاک
لبنان کی فوج نے اپنے ایک بیان میں کہا ہے کہ جنوبی لبنان میں اسرائیل کے حملے میں اس کا ایک اہل کار ہلاک ہوگیا ہے۔
بیان میں کہا گیا ہے کہ ہلاک ہونے والا فوجی جنوبی لبنان میں ایک چوکی پر ڈیوٹی انجام دے رہا تھا۔
لبنانی فوج نے مزید کہا ہے کہ اسرائیل کے حملے کے بعد جوابی فائر بھی کیے گئے ہیں۔
امریکہ کی قیادت میں ہونے والے آپریشن کے نتیجے میں غزہ سے یزیدی خاتون بازیاب
امریکہ کی قیادت میں ہونے والے ایک آپریشن میں لگ بھگ دس سال قبل داعش کے ہاتھوں اغوا ہونے والی ایک یزیدی خاتون کو بازیاب کرالیا گیا ہے۔
امریکی حکام کے مطابق اس آپریشن میں اردن اور بغداد کی حکومت نے بھی مدد کی ہے۔
بازیاب ہونے والی خاتون کا تعلق عراق اور شام میں بسنے والی قدیم مذہبی اقلیت یزیدی کمیونٹی سے ہے۔ 2014 میں اس کمیونٹی کا قتلِ عام کیا گیا تھا جس میں اس کے پانچ ہزار افراد مارے گئے تھے اور ہزاروں کو اغوا کیا گیا تھا۔
غزہ میں جاری اسرائیلی کارروائیوں کی وجہ سے خاتون کی بازیابی کی کوششیں تقریباً چار ماہ تک جاری رہیں۔
امریکہ کے محکمۂ خارجہ کے ترجمان نے ایک بیان میں کہا ہے کہ یکم اکتوبر کو خاتون کی بازیابی کے بعد انہیں عراق میں ان کے خاندان سے ملادیا گیا ہے۔
بازیاب ہونے والی خاتون کی عمر 21 برس ہے اور انہیں 11 برس کی عمر میں اغوا کیا گیا تھا جس کے بعد غزہ منتقل کردیا تھا۔
ترجمان نے بتایا کہ یزیدی خاتون کا اغوا کار حال ہی میں مارا گیا تھا جس کے بعد یہ فرار ہونے میں کامیاب ہوئیں اور بعدازاں نہیں غزہ سے بازیاب کرا لیا گیا۔