غزہ میں جھڑپ کے دوران اسرائیل کے مزید چار فوجی ہلاک

اسرائیل کی فوج نے کہا ہے کہ شمالی غزہ میں اس کے مزید چار اہلکاروں کی ہلاکت ہوئی ہے۔ فوج نے منگل کو ایک بیان میں اہلکاروں کی ہلاکت کی تصدیق کی ہے۔

خبر رساں ادارے 'رائٹرز' کے مطابق اسرائیلی فوج نے بیان میں کہا ہے کہ فوج کے چاروں اہلکار پیر کو ہونے والی ایک جھڑپ میں نشانہ بنے تھے۔

غزہ میں اسرائیل کی زمینی کارروائی کے آغاز کے بعد سے اب تک مجموعی طور پر 376 فوجی ہلاک ہو چکے ہیں۔

اسرائیل کے وزیرِ دفاع یسرائیل کٹز نے کہا ہے کہ لبنان میں حملے جاری رہیں گے اور جنگ بندی اس وقت تک نہیں ہوگی جب تک اسرائیل اس جنگ کے اہداف حاصل نہیں کر لیتا۔

سوشل میڈیا ہر ایک بیان میں یسرائیل کٹز نے کہا کہ اسرائیل کسی ایسے انتظم پراتفاق نہیں کرے گا جس میں یہ ضمانت نہ دی جائے کہ دہشت گردوں کو آزادی نہیں دی جائے گی اور لبنان میں جنگ کے اہداف حاصل نہیں ہو جاتے۔

ان کے بقول ان اہداف میں حزب اللہ کو غیر مسلح کرنا اور اس کے کارکنوں کو دریائے اللیطانی کے پار بھیجنا بھی شامل ہے۔ ان اقدامات سے شمالی اسرائیل کے شہری اپنے علاقوں میں دوبارہ آباد ہو سکیں گے۔

اسرائیل کے شمال میں واقع شہر حیفا پر لبنان سے متعدد ڈرون داغے گئے ہیں۔

اسرائیلی میڈیا کے مطابق حیفا شہر میں سائرن بجائے گئے ہیں تاکہ شہری پناہ گاہوں میں خود کو محفوظ کر سکیں۔

رپورٹس کے مطابق ایک ڈرون زمین پر ایک تعلیمی ادارے کے قریب گرنے کی اطلاعات ہیں۔ تاہم اس سے کسی قسم کا جانی نقصان نہیں ہوا۔

اسرائیل کی داخلی سیکیورٹی کی ایجنسی ‘شین بیت‘ نے دعویٰ کیا ہے کہ اس نے وزیرِ قومی سیکیورٹی اتمار بن گویئر اور ان کے بیٹے کو قتل کرنے کا منصوبہ ناکام بنایا ہے۔

بن گویئر کے بیٹے اسرائیلی ایئر فورس میں زیرِ تربیت پائلٹ ہیں۔

اسرائیلی میڈیا کے مطابق مغربی کنارے میں الخلیل کے علاقے سے چار فلسطینیوں کو اس منصوبے کے الزام میں حراست میں لیا گیا ہے جن کے بارے میں دعویٰ کیا گیا ہے کہ ان کے حماس سے روابط تھے۔ ان چاروں کو منصوبے پر عمل سے قبل ہی گرفتار کر لیا گیا ہے۔

تحقیقات میں دعویٰ کیا جا رہا ہے کہ یہ چاروں افراد اسرائیلی وزیرِ کی نقل و حرکت پر نظر رکھے ہوئے تھے جب کہ ان کو دستیاب سیکیورٹی کا بھی جائزہ لے رہے تھے۔

یہ بھی کہا گیا ہے کہ ان منصوبہ سازوں نے بعد ازاں ساری توجہ وزیر کے بیٹے پر مرکوز کر لی تھی اور الخلیل میں ان کی رہائش گاہ پر آمد پر نظر رکھے ہوئے تھے۔

اسرائیلی میڈیا کی رپورٹ کے مطابق ان حملہ آوروں نے اسلحے کے حصول کی کوشش کی تھی جب کہ وہ حملے کے لیے متبادل طریقوں پر غور کر رہے تھے جن میں گاڑی میں بارودی مواد بھر کر دھماکہ کرنا بھی شامل تھا۔

بن گویئر لگ بھگ دو برس قبل دسمبر 2022 میں اسرائیل کے وزیرِ قومی سیکیورٹی مقرر ہوئے تھے۔ رپورٹس کے مطابق ان دو برسوں میں ان کو تین بار قتل کرنے کی سازش سامنے آ چکی ہے۔

بن گویئر وزیرِ اعظم بن یامین نیتن یاہو کی آٹھ جماعتوں پر مشتمل اتحادی حکومت میں شامل انتہائی دائیں بازو کی پارٹی ’اوتزما یہودت‘ یعنی یہودی قوت کے رکنِ پارلیمان ہیں۔ اس جماعت کے 120 رکنی ایوان (کینست) میں چھ ارکان ہیں۔