براہِ راست یحیٰ سنوار کی ہلاکت، حزب اللہ کا اسرائیل سے جنگ جاری رکھنے کا اعلان

لبنان کی عسکری تنظیم حزب اللہ نے اسرائیل کے خلاف جنگ جاری رکھنے کا اعلان کیا ہے اور ایک بیان میں کہا ہے کہ فلسطینی عسکری رہنما یحییٰ سنوار کی ہلاکت کے باوجود ان کی مزاحمت ایک نئے مرحلے میں داخل ہو گئی ہے۔

خبر رساں ادارے 'رائٹرز' کے مطابق حزب اللہ نے جمعے کو ایک بیان جاری کیا ہے جس میں عسکری تنظیم نے اسرائیل کے خلاف کشیدگی کے ایک نئے مرحلے کا آغاز کرنے کا اعلان کیا ہے۔

اسرائیل نے جمعرات کو غزہ میں ایک فوجی کارروائی کے دوان حماس کے رہنما یحیٰ سنوار کو ہلاک کرنے کا دعویٰ کیا ہے اور اس ضمن میں ایک ویڈیو بھی جاری کی ہے۔ تاہم حماس نے اسرائیلی دعوے پر کوئی بیان جاری نہیں کیا ہے لیکن حماس کے ذرائع کا کہنا ہے کہ اسرائیلی کارروائی میں مارے جانے والے یحیٰ سنوار ہی تھے۔

امریکہ کے صدر جو بائیڈن نے کہا ہے کہ حماس کے رہنما یحییٰ سنوار کی اسرائیلی فوج کے ہاتھوں ہلاکت ’ اسرائیل کے لیے، امریکہ اور دنیا کے لیے ایک اچھا دن ہے‘۔

انہوں نے یحییٰ کی ہلاکت کو حماس کی قید میں رکھے گئے اسرائیلی یرغمالوں اور غزہ میں ایک سال سے جاری جنگ کے خاتمے کا ایک موقع بھی قرار دیا۔

اس سے قبل اسرائیل کے وزیرِ خارجہ اسرائیل کاٹز نے تصدیق کی تھی کہ جمعرات کو غزہ میں اسرائیلی کارروائی کے دوران حماس کے سربراہ یحییٰ سنوار مارے گئے ہیں۔

جو بائیڈن نے ایک بیان میں کہا ہےکہ یحیٰ سنوار کی ہلاکت پر ان کے وہی احساسات ہیں جب امریکہ نے نائن الیون کے حملوں کے ذمہ دار القاعدہ کے رہنما اسامہ بن لادن کو ہلاک کیا تھا۔

ان کا کہنا تھا کہ سات اکتوبر کے ماسٹر مائنڈ کی ہلاکت اس بات کو ثابت کرتی ہے کہ دنیا بھر میں کہیں بھی، کوئی بھی دہشتگرد انصاف سے بچ نہیں سکتا، چاہے اس پر کتنا وقت ہی کیوں نہ لگ جائے۔

صدر بائیڈن نے کہا کہ وہ اسرائیلی وزیراعظم بن یامین نیتن یاہو اور دیگر اسرائیلی رہنماؤں سے بات کریں گے تاکہ ان کو یحییٰ سنوار کی ہلاکت پر مبارک باد دے سکیں اور اسرائیلی یرغمالوں کی گھروں کو واپسی اور اس جنگ کو ایک ہی مرتبہ ہمیشہ کے لیے ختم کرنے پر تبادلہ خیال کر سکیں۔

مزید پڑھیے

یحییٰ سنوار حماس کے وہ لیڈر تھے جنہوں نے گزشتہ برس اکتوبر میں اسرائیل پر ایک ایسے حملے کا کلیدی منصوبہ تیار کیا تھا جس نے دنیا کو چونکا دیا اور ایسی تباہی کو جنم دیا جو ابھی تک پھیل رہی ہے اور جس کا کوئی خاتمہ نظر نہیں آتا۔

جمعرات کو اسرائیل نے کہا کہ غزہ میں فوجیوں نے سنوار کو ہلاک کر دیا ہے۔ حماس کی جانب سے ان کی موت کی فوری طور پر کوئی تصدیق نہیں کی گئی۔

اس پراسرار شخصیت سے جنگی محاذ کے کے دونوں اطراف لوگ خوفزدہ تھے۔ انہوں نے حماس کے مسلح ونگ کے سربراہ محمد ضیف کے ساتھ مل کر جنوبی اسرائیل پر سات اکتوبر 2023 کا حیران کن حملہ تیار کیا تھا۔ اسرائیل نے کہا تھاکہ اس نے جولائی میں جنوبی غزہ میں ہونے والے اس فضائی حملے میں ضیف کو ہلاک کیا جس میں 70 سےزیادہ فلسطینی ہلاک ہوئے تھے۔

غزہ میں جنگ کی رفتار کے تعین کے لیے 61 سالہ حماس رہنما سے بڑی کوئی بھی شخصیت نہیں تھی۔ جنونی، نظم و ضبط اور آمرانہ مزاج کے حامل ، سنوار شاذ و نادر سامنے آنے والے ایک تجربہ کار عسکریت پسند تھے، جنہوں نے اسرائیلی جیلوں میں گزارے برسوں میں عبرانی زبان سیکھی اور اپنے دشمن کا بغور مطالعہ کیا۔

حماس کے جلاوطن رہنما اسماعیل ہنیہ ایران کے دورے کے دوران ایک دھماکے میں مارے گئے جس کا الزام اسرائیل پر عائد کیا گیا۔ اس کے فورأ بعد سنوار کو حماس کے اعلیٰ رہنما کے طور پر ان کی جگہ لینے کے لیے منتخب کیا گیا، اگرچہ وہ غزہ میں روپوش تھے۔

مزید پڑھیے