ایس سی او سربراہی اجلاس؛ وزیرِ اعظم شہباز شریف کا مندوبین کے اعزاز میں عشائیہ

بیلاروس کے وزیرِ اعظم رومن گولووچینکو 23 ویں ایس سی او اجلاس میں شرکت کے لیے پاکستان پہنچ گئے ہیں۔

شنگھائی تعاون تنظیم (ایس سی او) اجلاس منگل سے شروع ہو گیا ہے جو بدھ تک جاری رہے گا۔ اس اجلاس میں چین، روس سمیت مختلف ممالک کے سربراہان و وفد شریک ہیں۔

اسلام آباد ایئرپورٹ پہنچنے پر وفاقی وزیرِ قانون اعظم نذیر تارڑ نے بیلاروس کے وزیرِ اعظم کا استقبال کیا۔

تاجکستان کے وزیرِ اعظم قاہر رسول زادہ شنگھائی تعاون تنظیم (ایس سی او) اجلاس میں شرکت کے لیے پاکستان پہنچ گئے ہیں۔

اسلام آباد انٹرنیشنل ایئرپورٹ پر وفاقی وزیرِ تجارت جام کمال خان نے تاجک وزیرِ اعظم کا استقبال کیا۔

اس موقع پر تاجکستان کے وزیرِ اعظم کے لیے ریڈ کارپیٹ بچھایا گیا تھا جب کہ بچوں کی جانب سے دونوں ممالک کے جھنڈے بھی تھامے گئے تھے۔

ترکمانستان کے ڈپٹی چیئرمین برائے کابینہ راشد میری دوف اسلام آباد پہنچ گئے ہیں۔

وہ اسلام آباد میں ہونے والی دو روزہ ایس سی او (شنگھائی تعاون تنظیم) سمٹ میں شرکت کریں گے۔

قازقستان کے وزیرِ اعظم اولزاف بیکٹینوف شنگھائی تعاون تنظیم کے اجلاس میں شرکت کے لیے اسلام آباد پہنچ گئے ہیں۔

وفاقی وزیر عبدالعلیم خان نے اسلام آباد ایئر پورٹ پر قازقستان کے وزیرِ اعظم کا استقبال کیا اور انہیں گلدستے پیش کیے۔