پی آئی اے کے نجکاری میں تاخیر کیوں ہو رہی ہے؟
عام انتخابات سے قبل ایک غیر منتخب نگراں حکومت نے ستمبر 2023 میں ہی فیصلہ کر لیا تھا کہ پاکستان کی قومی ایئرلائن پی آئی اے کے بڑھتے ہوئے قرضوں اور مالی خسارے کے باعث اسے فروخت کرنے کے سوا کوئی چارہ نہیں ہے۔
نگراں حکومت میں ہی پاکستان ایئر لائن (پی آئی اے) کی نجکاری کا عمل باقاعدہ طور پر شروع کر دیا گیا تھا۔ تاہم لگ بھگ 13 ماہ ہونے کے باوجود حکومت اس ادارے کی نجکاری میں کامیاب نہیں ہو سکی ہے۔
گزشتہ ماہ ستمبر میں وزارتِ نجکاری نے بتایا تھا کہ پی آئی اے کی نجکاری کے لیے حکومت نے چھ کمپنیوں کو شارٹ لسٹ کیا ہے۔ ان کمپنیوں میں وائی بی ہولڈنگز، ایئر بلیو، فلائی جناح، پاکستان ایتھانول کا کنسورشیم، عارف حبیب کارپوریشن کی قیادت میں کنسورشیم اور بلو ورلڈ سٹی گروپ شامل ہیں۔
نجکاری کمیشن بورڈ نے اپنے بیان میں کہا تھا کہ پی آئی اے کی نجکاری کی موجودہ صورتِ حال کا جائزہ لینے اور فنانشل ایڈوائزر کی سفارشات کی روشنی میں کوالیفائیڈ کمپنیوں کے لیے طے کی جانے والی شرائط کو تبدیل کرنے پر بھی غور کیا گیا ہے۔
اس بارے میں معلومات رکھنے والے ذرائع کا کہنا ہے کہ پی آئی اے کی خریداری میں دلچسپی رکھنے والے اداروں کا مطالبہ ہے کہ حکومت 60 فی صد شیئرز کے بجائے پی آئی اے کے 100 فی صد شیئرز خریدار کمپنی کے حوالے کرے۔
مزید جانیے
’پاکستان کاروباری ماحول بہتر بنانے کی کوشش کر رہا ہے‘
پاکستان کے وفاقی وزیرِ خزانہ محمد اورنگزیب نے کہا ہے کہ پاکستان بیرونی سرمایہ کاری کے لیے کاروباری ماحول بہتر بنانے کی کوشش کر رہا ہے۔
امریکہ کے دارالحکومت واشنگٹن ڈی سی میں صحافیوں سے ہفتے کو گفتگو میں وفاقی وزیرِ خزانہ نے مزید کہا کہ پاکستان کو اپنی معیشت کے ڈی این اے کو تبدیل کرنا ہوگا جس کے لیے درآمدات پر انحصار میں کمی شامل ہے۔
سرکاری اداروں کی نجکاری کا ذکر کرتے ہوئے محمد اورنگزیب نے کہا کہ حکومتی اداروں کی نجکاری کرنی ہوگی جس کے لیے پاکستان انٹرنیشنل ایئرلائنز (پی آئى اے) کی نجکاری کا زیادہ تر عمل نومبر میں مکمل کر لیا جائے گا۔
نجکاری کے حوالے سے انہوں نے مزید کہا کہ اسلام آباد کے بین الاقوامی ہوئی اڈے کی پرائیویٹائزیشن پہلے ہی مرحلے میں کر دی جائے گی۔
ضلع کرم میں سیکیورٹی اہلکاروں پر حملہ، دو اہلکار زخمی
- By شمیم شاہد
خیبر پختونخوا کے قبائلی ضلعے کرم کے علاقے چار خیل میں فرنٹیر کور (ایف سی) کے بم ڈسپوزل یونٹ کے اہلکاروں پر مبینہ حملہ کیا گیا ہے۔
سیکیورٹی ذرائع سے ملنے والی معلومات کے مطابق مبینہ دہشت گردوں نے سیکیورٹی اہلکاروں پر فائرنگ کی ہے۔ فائرنگ کی زد میں آ کر دو اہلکار زخمی ہوئے ہیں۔
اطلاعات کے مطابق زخمی اہلکاروں کو اسپتال منتقل کر دیا گیا ہے۔دونوں زخمی اہلکاروں کی حالت تشویش ناک بتائی جا رہی ہے۔
کارِ سرکار میں مداخلت، ایمان مزاری شوہر سمیت گرفتار
اسلام آباد کی پولیس نے کارِ سرکار میں مداخلت کے الزام میں ایمان مزاری ایڈووکیٹ کو شوہر سمیت گرفتار کر لیا ہے۔
ایمان مزاری کو آب پارہ پولیس نےحراست میں لیا۔ایمان مزاری اور ان کے شوہر کے خلاف کار سرکار میں مداخلت کا مقدمہ درج کیا گیا تھا۔