اسرائیل پر جنگ بندی کے لیے ’دباؤ‘ کم نہیں ہونے دیں گے: امریکہ

لبنان کی وزارتِ تعلیم نے کہا ہے کہ سیکیورٹی خطرات کے باعث اسکولوں میں تعلیمی سال شروع نہیں ہوپائے گا۔

وزیرِ تعلیم کا کہنا ہے کہ موجودہ حالات کی وجہ سے لبنان میں نیا تعلیمی سال چار نومبر تک مؤخر کیا جارہا ہے۔

اسرائیل کے وزیرِ دفاع یوو گیلنٹ نے کہا ہے کہ ایران نے اسرائیل کو نقصان پہنچانے کی کوشش کی تو اس کا حال بھی غزہ جیسا ہوگا۔

انہوں ںے حالیہ حملے سے متعلق بیان میں کہا ہے کہ ایران ہماری فضائیہ کو چھونے میں بھی ناکام رہا ہے اور ہمارے کسی طیارے کو نقصان نہیں پہنچا ہے۔

ان کا کہنا تھا کہ جو بھی سمجھتا ہے کہ ہمیں نقصان پہنچا کر ہمیں کارروائی سے روک سکتا ہے وہ غزہ اور بیروت کو دیکھ لے۔

جنوبی اسرائیل کے شہر بئر السبع میں مسلح حملہ آور کی فائرنگ سے ایک خاتون ہلاک اور کم از کم 10 افراد زخمی ہوگئے ہیں۔

ایمرجنسی سروس کے مطابق ایک فوجی نے حملہ آور کو ہلاک کردیا ہے۔

مقامی میڈیا کا کہنا ہے کہ حملہ آور کا تعلق مقامی عرب کمیونٹی سے تھا۔

پولیس نے حملے کو دہشت گردی کا واقعہ قرار دیا ہے تاہم اس کے لیے شواہد فراہم نہیں کیے ہیں۔

اسرائیل میں پہلے ہی سات اکتوبر کے حملوں کو ایک سال مکمل ہونے پر فورسز کو ہائی الرٹ پر رکھا گیا ہے۔

اسرائیل کے وزیرِ اعظم نیتن یاہو نے لبنان سے ملحقہ سرحد کا دورہ کیا ہے۔

وزیرِ اعظم ہاؤس سے جاری ہونے والے بیان کے مطابق نیتن یاہو نے لبنانی سرحد پر تعینات 36 ویں ڈویژن سے ملاقات کی ہے۔

نیتن یاہو کا یہ دورہ ایسے وقت ہوا ہے جب اسرائیل کو جنوبی لبنان میں زمینی کارروائی کا آغاز کی تقریباً ایک ہفتہ ہوچکا ہے۔