مشرقِ وسطیٰ میں کشیدگی بڑھنے کے امکانات پر ایشیا میں تشویش ہے: بلنکن

اسرائیل کی فوج نے کہا ہے کہ غزہ کے شمالی علاقوں میں لڑائی کے دوران اس کے مزید تین اہلکار ہلاک ہوئے ہیں۔

بیان کے مطابق جمعرات کو ان اہلکاروں کی اموات اس وقت ہوئیں جب ان کی عسکریت پسندوں سے جھڑپ ہوئی۔

اسرائیلی فوج کا کہنا ہے کہ اس جھڑپ میں ایک میجر اور دو اہلکار مارے گئے۔

گزشتہ برس سات اکتوبر کے بعد غزہ میں شروع کی گئی زمینی کارروائی کے دوران اسرائیلی فوج کے 353 اہلکار ہلاک ہو چکے ہیں۔

سوئیڈن کی پولیس نے کہا ہے کہ وہ گوتھنبرگ شہر میں ایک اسرائیلی ٹارگٹ کے قریب فائرنگ کے واقعے کی تحقیقات کر رہی ہے۔

خبر رساں ادارے 'رائٹرز' کے مطابق سوئیڈن کے قومی نشریاتی ادارے کا کہنا ہے کہ یہ یونٹ اسرائیلی ڈیفنس الیکٹرانس فرم البٹ سسٹمز کا تھا۔

پولیس نے جمعرات کو ایک بیان میں کہا کہ اس نے جائے وقوعہ سے ایک مشتبہ نوجوان کو حراست میں لیا ہے اور مشتبہ اقدامِ قتل اور اسلحے سے متعلق جرائم کی تفتیش شروع کردی ہے۔

اگرچہ پولیس کی جانب سے کمپنی کی شناخت نہیں کی گئی۔ لیکن ایلبٹ سسٹمز سوئیڈن کے سی ای او ٹوبیان وینبرگ نے 'رائٹرز' کو بتایا ہے کہ جمعرات کو اس کی حدود کے باہر ایک واقعہ پیش آیا جس میں کوئی زخمی نہیں ہوا۔

امریکہ کے وزیرِ خارجہ اینٹنی بلنکن نے کہا ہے کہ مشرقِ وسطیٰ میں تنازع بڑھنے کے امکانات پر ایشیا میں گہری تشویش پائی جاتی ہے۔

خبر رساں ادارے 'رائٹر' کے مطابق جمعے کو لاؤس میں ایسٹ ایشیا سمٹ کے دوران بلنکن نے کہا کہ واشنگٹن سفارت کاری کے ذریعے صورتِ حال کنٹرول کرنے کی کوششوں میں مصروف ہے۔ اس سمٹ کا اہم موضوع مشرقِ وسطیٰ میں کشیدگی کے گرد ہی تھا۔

اینٹی بلنکن نے پریس کانفرنس کے دوران کہا کہ امریکہ کی اہم توجہ ان تنازعات کو پھیلنے سے روکنا ہے اور ہم ہر روز اس پر کام کر رہے ہیں۔

امریکی وزیرِ خارجہ کا کہنا تھا کہ ہم ڈیٹرنس اور ڈپلومیسی کے ذریعے بہت محنت کر رہے ہیں تاکہ اسے ہونے سے روکا جا سکے۔ ان کے بقول غزہ میں بچوں، عورتوں اور مردوں کی حالتِ زار کے بارے میں ہمیں گہری تشویش ہے۔