خیبرپختونخوا اسمبلی میں ووٹنگ مکمل
خیبر پختونخوا اسمبلی میں سینیٹ کی 12 نشستوں پر ووٹنگ کا عمل مکمل ہو گیا ہے اور تمام 145 ارکان نے ووٹ کاسٹ کر دیے ہیں۔
بیشتر ارکان مقررہ وقت شام پانچ بجے تک اسمبلی میں موجود تھے اور ووٹ کاسٹ نہیں کر سکے تھے جس کے باعث الیکشن کمیشن نے انہیں ووٹ کاسٹ کرنے کے لیے وقت دیا تھا۔ سینیٹ کے لیے آخری ووٹ رکنِ اسمبلی شہرام خان تر کئی نے کاسٹ کیا۔
سینیٹ انتخابات کے لیے پولنگ کا وقت ختم
پاکستان کے ایوانِ بالا سینیٹ کی 37 نشستوں کے لیے ہونے والی پولنگ کا مقررہ وقت ختم ہو گیا ہے جس کے بعد ووٹوں کی گنتی کا عمل جاری ہے۔
وفاقی دارالحکومت اسلام آباد سے سینیٹ کی دو، خیبرپختونخوا اور بلوچستان سے 12، 12 جب کہ سندھ اسمبلی سے سینیٹ کی 11 نشستوں کے لیے بدھ کو ووٹنگ ہوئی۔ پنجاب اسمبلی سے پہلے ہی 11 ارکان بلامقابلہ منتخب ہو گئے تھے۔
بلوچستان کے تمام 65 ارکان نے اپنا حقِ رائے دہی استعمال کیا۔ لیکن قومی اسمبلی کے 342 میں سے 341 ارکان کو ووٹ ڈالنا تھا تاہم جماعتِ اسلامی کے رکن اکبر چترالی نے اپنا ووٹ کاسٹ نہیں کیا۔
اسی طرح سندھ اسمبلی میں 168 میں سے 167 نے اپنا حقِ رائے دہی استعمال کیا جب کہ جماعتِ اسلامی کے رکن عبدالرشید نے پارٹی پالیسی کے تحت ووٹ کاسٹ نہیں کیا۔
خیبرپختونخوا اسمبلی میں اراکین کی کل تعداد 145 ہے اور مقررہ وقت تک صرف 116 ارکان نے ہی ووٹ کاسٹ کیا۔ اسمبلی ہال میں اب بھی کئی ارکان موجود ہیں جنہیں الیکشن کمیشن کے حکام نے ووٹ ڈالنے کی اجازت دے دی ہے۔
بلوچستان اسمبلی میں ووٹنگ کا عمل مکمل
بلوچستان اسمبلی میں سینیٹ انتخاب کے لیے ووٹنگ کا عمل مقررہ وقت سے قبل ہی مکمل ہو گیا ہے۔
صوبائی اسمبلی کے تمام 65 ارکان نے اپنا حقِ رائے دہی استعمال کر لیا ہے۔ اسمبلی کا آخری ووٹ میر حمل کلمتی نے کاسٹ کیا۔
