بعض عناصر الیکشن میں مداخلت کے الزامات لگا کر فوج کو بدنام کر رہے ہیں: کور کمانڈرز کانفرنس

الیکشن کمیشن آف پاکستان نے سنی اتحاد کونسل کے کوٹے کی مخصوص نشستیں دیگر سیاسی جماعتوں میں تقسیم کر دی ہیں۔

منگل کو الیکشن کمیشن نے قومی اسمبلی میں غیر مسلموں کی خالی تین نشستیں مسلم لیگ(ن)، پیپلز پارٹی اور جے یو آئی کو الاٹ کی ہیں۔ پنجاب سے قومی اسمبلی کی خواتین کی دو مخصوص نشستیں پیپلز پارٹی اور ایک مسلم لیگ (ن)کو دی گئی ہے۔

خیبر پختونخوا سے قومی اسمبلی کی خواتین کی چار نشستیں ن لیگ اور دو دو نشستیں پیپلز پارٹی اور جے یو آئی کو الاٹ کی گئی ہیں۔

اس کے علاوہ صوبائی اسمبلی میں مخصوص نشتیں بھی دیگر جماعتوں کو الاٹ کی گئی ہیں۔

سندھ اسمبلی میں خواتین کی دو مخصوص نشستیں پیپلز پارٹی اور ایم کیو ایم میں تقسیم کی گئی ہیں جب کہ سندھ اسمبلی میں اقلیتوں کی ایک نشست پیپلز پارٹی کو دی گئی ہے۔

خیبر پختونخوا اسمبلی میں اقلیتوں کی باقی تین نشستیں پیپلز پارٹی، مسلم لیگ ن اور جمعیت علمائے اسلام میں تقسیم کی گئی ہیں۔ خیبر پختونخوا اسمبلی میں خواتین کی خالی 10 نشستوں میں سے جے یو آئی کو خواتین کی مزید آٹھ نشستیں مل گئی ہیں اور دو نشستیں مسلم لیگ ن کو الاٹ کی گئی ہیں۔

پاکستان فوج کے شعبہ تعلقاتِ عامہ آئی ایس پی آر کی جانب سے جاری کردہ کور کمانڈرز کانفرنس کے اعلامیے کے مطابق مسلح افواج نے دیے گئے مینڈیٹ کے مطابق عام انتخابات کے انعقاد کے لیے عوام کو محفوظ ماحول فراہم کیا اور افواجِ پاکستان کا انتخابی عمل سے کوئی تعلق نہیں تھا۔

اعلامیے کے مطابق کچھ مخصوص مگر محدود سیاسی عناصر، سوشل میڈیا اور میڈیا کے کچھ سیگمنٹس مداخلت کے غیر مصدقہ الزامات کے ساتھ پاکستان کی مسلح افواج کو بدنام کر رہے ہیں جو قابلِ مذمت ہے۔

آئی ایس پی آر کے اعلامیے کے مطابق آرمی چیف کی زیرِ صدارت کور کمانڈرز کانفرنس میں اس بات پر تشویش کا اظہار کیا گیا کہ بعض عناصر کی جانب سے معاشرے میں مایوسی اور تقسیم ڈالنے کے لیے جھوٹی اور جعلی خبریں پھیلائی جا رہی ہیں۔

کور کمانڈرز کانفرنس کے اعلامیے میں کہا گیا کہ وزیرِ اعظم کے عزم کے مطابق نو مئی کے منصوبہ سازوں، اشتعال دلانے والوں، حوصلہ افزائی کرنے والوں اور شہدا کی یادگاروں کی بے حرمتی کرنے والوں اور فوجی تنصیبات پر حملہ کرنے والوں کو یقینی طور پر قانون اور آئین کی متعلقہ دفعات کے تحت انصاف کے کٹہرے میں لایا جائے گا۔

سپریم کورٹ آف پاکستان ذوالفقار علی بھٹو کیس پر صدارتی ریفرنس پر بدھ کو اپنی رائے سنائے گی۔

چیف جسٹس قاضی فائز عیسیٰ کی سربراہی میں نو رکنی لارجر بینچ نے چار مارچ کو صدارتی ریفرنس پر رائے محفوظ کی تھی۔

واضح رہے کہ ذوالفقار علی بھٹو کی پھانسی کے خلاف صدارتی ریفرنس 2011 میں دائر کیا گیا تھا۔

خیبر پختونخوا کے وزیرِ اعلیٰ علی امین گنڈا پور نے اتوار کو دھاندلی کے خلاف احتجاج کا اعلان کیا ہے۔

اڈیالہ جیل میں عمران خان سے ملاقات کے بعد میڈیا سے گفتگو میں علی امین گنڈا پور نے کہا کہ تحریکِ انصاف انتخابات میں ہونے والی دھاندلی اور مخصوص نشستیں نہ ملنے کے خلاف پشاور میں اتوار پر امن احتجاج کرے گی۔

علی امین گنڈا پور کے مطابق وہ خود احتجاج کی قیادت کریں گے۔

ان کا مزید کہنا تھا کہ عمران خان سے خیبر پختونخوا کی صوبائی کابینہ کے حوالے سے مشاورت ہو گئی ہے۔ ایک بہترین ٹیم لے کر آ رہے ہیں۔