لاہور میں پی ٹی آئی کے احتجاج کے دوران پولیس کی پکڑ دھکڑ، متعدد کارکن گرفتار

پاکستان پیپلزپارٹی (پی پی پی) کے سینیٹر بہرا مند تنگی نے سوشل میڈیا پلیٹ فارمز فیس بک، ایکس، انسٹا گرام اور یوٹیوپ پر پابندی لگانے کی قرارداد سینیٹ میں جمع کرا دی ہے۔

سینیٹ نے بہرامند تنگی کی قرارداد پیر کو سینیٹ کے ہونے والے اجلاس میں زیرِ غور لانے کے لیے ایجنڈے میں شامل کر دی ہے۔

سینیٹ کے ایجنڈا نمبر 32 پر پاکستان پیپلز پارٹی کے صوبہ خیبرپختونخوا سے منتخب سینیٹر بہرامند تنگی کی قرارداد کو زیرِ غور لانے اور منظور یا مسترد کرنے کے لیے شامل کیا گیا ہے۔

قرارداد میں کہا گیا ہے کہ سوشل میڈیا پلیٹ فارمز کے ذریعے جعلی قیادت کو فروغ دے کر نوجوان نسل کو دھوکہ دینے کی کوشش کی جا رہی ہے۔ لہذٰا سوشل میڈیا پلیٹ فارمز پر پابندی عائد کی جائے۔

لاہور پولیس نے دفعہ 144 کے نفاذ کے باوجود ریلی نکالنے پر پی ٹی آئی کے متعدد کارکنوں کو حراست میں لے لیا ہے۔

انتخابات میں مبینہ دھاندلی کے خلاف پی ٹی آئی کے کارکن لاہور کی مال روڈ پر احتجاج کے لیے پہنچے تو اس سے قبل ہی پولیس کی بھاری نفری وہاں تعینات تھے۔

پولیس نے لاہور کے حلقے این اے 117 سے پی ٹی آئی ٹکٹ ہولڈر علی اعجاز بٹر کو حراست میں لے لیا۔ این اے 119 سے ٹکٹ ہولڈر شہزاد فاروق، پی پی 149 سے ٹکٹ ہولڈر حافظ ذیشان رشید کو بھی حراست میں لے لیا گیا۔

وزیرِ اعظم پاکستان کے انتخاب کے لیے مسلم لیگ (ن) کے صدر شہباز شریف اور عمر ایوب خان کے کاغذاتِ نامزدگی جمع کرا دیے گئے ہیں۔

محمد شہباز شریف کے کاغذات نامزدگی جمع کرانے والوں میں ممبر قومی اسمبلی خواجہ آصف، سید خورشید شاہ، احسن اقبال، سردار محمد یوسف، عطا تارڑ، عون چوہدری، طارق بشیر چیمہ اور حنیف عباسی شامل تھے۔

عمر ایوب کے کا غذات نامزدگی جمع کرانے والوں میں سابق اسپیکر قومی اسمبلی اسد قیصر، ملک محمد عامر ڈوگر، علی محمد، بیرسٹر گوہر خان شامل تھے۔

وزارت عظمیٰ کے کاغذات نامزدگی سیکریٹری جنرل قومی اسمبلی طاہر حسین نے وصول کیے۔

اس موقع پر اسپیشل سیکریٹری قانون سازی قومی اسمبلی محمد مشتاق اور اسپیشل سیکریٹری سید شمعون ہاشمی بھی موجود تھے۔

نو مارچ کو ہونے والے صدارتی انتخابات کے لیے محمود خان اور آصف زرداری کے کاغذاتِ نامزدگی جمع کرا دیے گئے ہیں۔

آصف زرداری کے کاغذاتِ نامزدگی سندھ ہائی کورٹ اور اسلام آباد ہائی کورٹ میں جمع کرائے گئے۔ دوسری جانب پشتونخواہ ملی عوامی پارٹی (پی کے میپ) کے محمود خان اچکزئی سنی اتحاد کونسل (پی ٹی آئی) کے اُمیدوار ہوں گے۔

محمود خان اچکزئی کے کاغذاتِ نامزدگی اسلام آباد ہائی کورٹ میں جمع کرائے گئے۔

الیکشن کمیشن آف پاکستان کے مطابق صدارتی انتخابات کے لیے پولنگ نو مارچ کو صبح نو بجے سے شام پانچ بجے تک ہو گی۔