سندھ اسمبلی میں اسپیکر اور ڈپٹی اسپیکر کا انتخاب
پاکستان پیپلزپارٹی کے اُمیدواروں نے سندھ اسمبلی میں اسپیکر اور ڈپٹی اسپیکر کا میدان مار لیا ہے۔
پیپلزپارٹی کے اُمیدوار اویس قادر شاہ اسپیکر جب کہ مسیحی رُکن صوبائی اسمبلی انتھونی نوید ڈپٹی اسپیکر منتخب ہو گئے ہیں۔
سید اویس قادر شاہ کو 111 جب کہ متحدہ قومی موومنٹ (ایم کیو ایم) کی ایڈووکیٹ صوفیہ سعید شاہ کو 36 ووٹ ملے۔ ڈپٹی اسپیکر کے انتخاب میں بھی صورتِ حال یہی رہی۔ پیپلزپارٹی کے انتھونی نوید کو 111 ووٹ جب کہ ایم کیو ایم کے راشد خان کو 36 ووٹ ملے۔
صدر نے اجلاس نہ بلایا تو اسپیکر خود اجلاس طلب کر سکتے ہیں: اسحاق ڈار
پاکستان مسلم لیگ (ن) کے رہنما سینیٹر اسحاق ڈار کہتے ہیں کہ اگر صدرِ پاکستان نے قومی اسمبلی کا اجلاس نہ بلایا تو اسپیکر 29 فروری کو خود اجلاس طلب کر سکتے ہیں۔
لاہور میں صحافیوں سے گفتگو کرتے ہوئے اسحاق ڈار کا کہنا تھا کہ آئین میں بڑا واضح ہے کہ اگر اجلاس نہیں بلایا جاتا تو 21ویں روز اسپیکر کو اجلاس بلانے کااختیار ہے۔
اُن کا کہنا تھا کہ صوبوں میں بھی اگر گورنر اجلاس نہیں بلاتا تو وہاں بھی یہی اصول لاگو ہوگا۔
پنجاب اسمبلی میں قائدِ ایوان کا انتخاب پیر کو ہو گا
پنجاب اسمبلی میں اسپیکر اور ڈپٹی اسپیکر کے انتخاب کے بعد قائدِ ایوان منتخب کرنے کے لیے پولنگ پیر کو ہو گی۔
وزیرِ اعلٰی کے لیے مسلم لیگ (ن) کی مریم نواز جب کہ سنی اتحاد کونسل کے رانا آفتاب اُمیدوار ہیں۔
وزیر اعلیٰ کے لیے کاغذات نامزدگی اتوار کی شام پانچ بجے تک جمع کروائے جائیں گے۔
سندھ اسمبلی میں اسپیکر اور ڈپٹی اسپیکر کے انتخاب کے لیے پولنگ جاری
سندھ اسمبلی میں اسپیکر اور ڈپٹی اسپیکر کے انتخاب کے لیے پولنگ کا عمل جاری ہے۔
پیپلز پارٹی کی جانب سے سید اویس شاہ اسپیکر اور انتھونی نوید ڈپٹی اسپیکر کے امیدوار ہیں۔
ایم کیو ایم کی جانب سے ایڈووکیٹ صوفیہ رشید اسپیکر اور راشد خان ایڈووکیٹ ڈپٹی اسپیکر کے امیدوار ہیں۔