مولانا فضل الرحمٰن کا اپوزیش میں بیٹھنے کا اعلان
جمعیت علمائے اسلام (ف) کے سربراہ مولانا فضل الرحمن نے کہا کہ ان کی جماعت قومی اسمبلی میں اسپیکر، ڈپٹی اسپیکر اور وزیر اعظم کےانتخاب کا بائیکاٹ کرے گی۔
نومنتخب ارکان کے حلف کے لیے بلائے گئے قومی اسمبلی کے اجلاس میں شرکت کے بعد مولانا فضل الرحمن نے میڈٰیا سے بات کرتے ہوئے کہا کہ گزشتہ شب مسلم لیگ (ن)، پیپلز پارٹی، بلوچستان عوامی پارٹی اور استحکام پاکستان پارٹی کا وفد ملاقات کے لیے آیا تھا جن سے اچھی گفتگو رہی۔
انہوں نے کہا کہ سیاسی رہنماؤں سے ذاتی تعلق اور بے تکلفی ہے لیکن ہماری پالیسی ہے کہ ہم ووٹ نہیں دیں گے اور اپوزیشن میں بیٹھیں گے۔
امولانا فضل الرحمٰن کا کہنا تھا کہ جے یو آئی پارلیمنٹ کی اگلی کسی کارروائی میں حصہ نہیں لے گی۔جس پارلمنٹ کا نتیجہ عوام کے ہاتھ میں نہ ہو، بلکہ اسٹیبلشمنٹ کے ہاتھ میں ہو، ہمارا کوئی حق نہیں کہ ہم اس پارلیمنٹ کا حصہ ہوں۔
ان کا مزید کہنا تھا کہ ہم اس پارلیمنٹ کو عوام کا نمائندہ کم اور اسٹیبلشمنٹ کا نمائندہ زیادہ مانتے ہیں۔
قومی اسمبلی کا ایوان مکمل نہیں، اجلاس مؤخر کیا جائے: بیرسٹر گوہر علی خان
پاکستان تحریکِ انصاف کے چیئرمین بیرسٹر گوہر علی خان نے کہا ہے کہ قومی اسمبلی کا ایوان ابھی مکمل نہیں ہے۔ اسپیکر قومی اسمبلی الیکشن کمیشن کے خلاف رولنگ دیں۔
قومی اسمبلی کی رکنیت کا حلف لینے کے بعد ایوان میں خطاب کرتے ہوئے بیرسٹر گوہر علی خان نے کہا کہ قومی اسمبلی میں 60 خواتین اور 10 اقلیتوں کی نشستیں ہیں۔ تحریکِ انصاف کے حامی آزاد امیدواروں کے لیے اقلیتوں کی تین اور خواتین کی 20 نشستیں مخصوص ہیں۔
انہوں نے کہا کہ اس وقت قومی اسمبلی کا ایوان نامکمل ہے۔ تحریکِ انصاف کے حامی 23 امیدواروں کے ایوان میں موجود ہونے کی ضرورت ہے۔ قومی اسمبلی کا اجلاس اس وقت تک مؤخر کیا جائے جب تک آزاد ارکان ایوان میں نہ آ جائیں۔
بیرسٹر گوہر نے دعویٰ کیا کہ عوامی مینڈیٹ کے مطابق تحریکِ انصاف کے حامی کامیاب امیدواروں کی تعداد 186 ہے۔اسپیکر سے درخواست ہے کہ وہ الیکشن کمیشن کے خلاف بھی رولنگ جاری کریں۔
قومی اسمبلی کا اجلاس جمعے تک ملتوی
قومی اسمبلی کے اسپیکر راجہ پرویز اشرف نے ایوان کی کارروائی جمعے کی صبح 10 بجے تک ملتوی کرنے کر دی ہے۔
جمعرات کو قومی اسمبلی کے افتتاحی اجلاس کی کارروائی کے دوران نو منتخب اراکین نے اسمبلی کی رکنیت کا حلف اٹھایا۔ اس دوران تحریکِ انصاف کے حمایت یافتہ کامیاب ہونے والے آزاد امیدواروں نے ایوان میں احتجاج بھی کیا اور عمران خان سمیت دیگر رہنماؤں کی رہائی کا مطالبہ کیا۔
آزاد امیدوار سنی اتحاد کونسل کے پلیٹ فارم سے اسمبلی کا حصہ ہیں ۔
وزیرِ اعظم کا انتخاب تین مارچ کو ہوگا، شیڈول جاری
قومی اسمبلی سیکریٹریٹ نے وزیرِ اعطم کے انتخاب کے لیے شیڈول کا اعلان کر دیا ہے۔
نوٹی فکیشن کے مطابق وزیرِ اعظم کے انتخاب کا عمل تین مارچ بروز اتوار کو ہو گا۔
قائدِ ایوان کے انتخاب کے لیے کاغذاتِ نامزدگی ہفتے کی دوپہر دو بجے تک قومی اسمبلی کے سیکریٹریٹ کے شعبہ قانون سے وصول کیے جا سکتے ہیں۔
قومی اسمبلی کا اجلاس اتوار دن 11 بجے شروع ہو گا۔